ބިންހެލުމުގައި ނިޔާވި މީހުންގެ ޢަދަދު 46،000 އަށް އަރައިފި

ތުރްކިޔޭ އާއި ސީރިޔާ އަށް އައި ބާރުގަދަ ބިންހެލުން ތަކުގެ ސަބަބުން ދެ ޤައުމުން ނިޔާވި މީހުންގެ ޢަދަދު 46،000 އަށް އަރައިފިއެވެ.

ކާރިސާ އަށް ބާރަ ދުވަސް ވެފައި ވާއިރު ބިންހެލުން ތަކުގެ ސަބަބުން 84،000 އިމާރާތެއް ވަނީ ރެނދުލައި ހަލާކުވެފައެވެ. އަދި ވީ އެންމެ އަވަހަކަށް އެއިމާރާތްތައް ތަޅައިލުމަކީ އެންމެ ރައްކާތެރި ގޮތް ކަމުގައި ކަމާއި ގުޅޭ މާހިރުން ވަނީ އިރުޝާދު ދީފައެވެ.

ތުރްކިޔޭ އިން މިހާތަނަށް 40،642 މީހުން ނިޔާވެފައިވާއި އިރު އަވަށްޓެރި ސީރިޔާއިން 5800 މީހުން ނިޔާވެފައިވެއެވެ. އަދި މި ޢަދަދަށް ބަދަލު ނާންނަތާ 5 ވަރަކަށް ދުވަސްވެއްޖެއެވެ.

ބިންހެލުމުގެ ސަބަބުން ވީނުވީއެއް ނޭނގި ގެއްލިފައި ތިބި މީހުންގެ ޢަދަދެއް ތުރްކިޔޭ އަދި ސީރިޔާގެ ވެސް ރަސްމީ ފަރާތަކުން ހާމަކޮށްފައެއް ނުވެއެވެ. އަދި މިކަމުގެ ސަބަބުން ދެ ޤައުމުގެވެސް ބިންހެލުމުގެ އަސަރު ކުރި ފަރާތްތަކުން ތިބީ ހިތްހަމަނުޖެހިފައެވެ.

މީގެ އިތުރުން ތުރްކިޔޭގެ ރައްޔިތުން ތިބީ އިމާރާތްތައް ހެދުމުގެ މަސައްކަތް ކޮށްފައި ހުރި މީހުން އެކަންތަކުގައި އޮޅުވާލައި މަކަރު ހަދައިފައި ހުރުމުން އާއިލާތަކަށް ލިބުނު ގެއްލުން ތަކާއި މެދު ވަރަށް ބޮޑަށް ހިތްހަމަނުޖެހިފައެވެ.

މީގެ ތެރެއިން އެއްބައި އިމާރާތް "ރޮނެސަންސް ރެޒިޑެންސް" އޭ ކިޔާ އިމާރާތްތަކެވެ. މިއީ ތުރްކިޔޭގެ އަންޓާކްޔާ ގައި ހުންނަ އިމާރާތްތަކެކެވެ. އެ އިމާރާތްތަކަކީ އާތް ކުއޭކް ސޭފް ފެންވަރަށް ހަދައިފައި ހުރި އިމާރާތްތަކެއް ކަމަށް އެތަންތަން ހެދި ކުންފުނިން ވަނީ ބުނެފައެވެ. ނަމަވެސް ބިންހެލުމުގައި އެއިމަރާތް ވެއްޓި 100 އެއްހާ މީހުން ވަނީ މަރުވެފައެވެ.

"އަހަރެމެން ކައިރީގައި ބުނީ އާތްކުއޭކް ސޭފް އޭ، އެކަމަކު ވީގޮތް ފެންނަން މިއޮތީ، ވަރަށް ގޯސް ކޮށް މިކަން ކޮށްފައި މިއޮތީ، ރަނގަޅަށް ސިމެންތި ވެސް އަޅާފައި ނެތް، ދަނގަޑުވެސް ބޭނުން ކޮށްފައި ހުރީ ވަރަށް މަދުން" އެއިމާރާތުގައި ދިރިއުޅުނު މީހެއްގެ ބޭބެ ހަމްޒާ އަލްޕަސްލަން ބުނެފައިވެއެވެ.

ތުރްކިޔޭގެ ސަރުކާރުން ވަނީ އިމާރާތްކުރާ ކުންފުނިތަކުން މިފަދަ ކަންކަން ކުރާކަން ޝައްކުވާނަމަ ފިޔަވަޅު އަޅާނެ ކަމަށް ބުނެފައެވެ. އަދި މިހާތަނަށް 100 ކުންފުންޏަކަށް ވަނީ ފިޔަވަޅު އަޅާއިފައެވެ.