އަޅުގަނޑުގެ ވެރިކަމުގައި ދިވެހިރާއްޖެއަށް ދަނޑުވެރިކަމުގެ ރަން ޒަމާން ގެންނާނަން: ޤާސިމް

ދިވެހިރާއްޖެއަށް ދަނޑުވެރިކަމުގެ ރަން ޒަމާން ގެނެސްދެއްވާނެ ކަމަށް ޖުމްހޫރީ ޕާޓީގެ ލީޑަރ އަދި އެ ޕާޓީގެ ރިޔާސީ ކެނޑިޑޭޓް ޤާސިމް އިބްރާހިމް ވިދާޅުވެއްޖެއެވެ.

ޤާސިމް ވިދާޅުވީ ދިވެހީންގެ މި ޢިއްޒަތްތެރި ބިމުގައި، ދިވެހީންގެ މުނާސަބު ފެހި ދަނޑުގައި، ދިވެހީންގެ މުރާލިކަމާ އެކުގައި، ރުވަމުން މިދާ ގަސްތައް الله ތަޢާލާގެ އިރާދަފުޅާ މިންވަރުފުޅުން ފޯދޭނެ ކަމަށެވެ.

އަދި ދިވެހި ޒުވާން ދަނޑުވެރިޔާ ރަމްޒީފަދަ އެތަކެއް ހާސް ދަނޑުވެރީން މި ޤައުމުގެ މުސްތަޤްބަލަށްޓަކާ ބޭނުންވާ ކަމަށް ޤާސިމް ވިދާޅުވިއެވެ.

"އަޅުގަނޑުގެ ވެރިކަމެއްގައި ދަޑުވެރިކަން ޒަމާނީ ޓެކްނޯލިޖީއާއި އެކު ތަރައްޤީ ކޮށް، ޤައުމުގެ ފުޑްސެކިއުރިޓީއަށް އިސްކަންދީ، ދިވެހިރާއްޖޭގެ ދަނޑުވެރިކަމުގެ ރަންޒަމާން ގެންނާނަށް. އިންޝާ الله" ޤާސިމް ވިދާޅުވިއެވެ.

އެކި ދާއިރާ ތަކުގެ މަސައްކަތްތެރިންނާ ބައްދަލު ކުރައްވައި، ޤާސިމް ގެންދަވަނީ އެ ދާއިރާތަކުގެ އަޑު އައްސަވަމުންނެވެ.

އެގޮތުން މަސްވެރިންގެ ދަތިތައް ހައްލުކޮށްދެވޭނީ ސީދާ މަސްވެރިންގެ ގާތުން ހާލު އަހައިގެން ކަމަށް ވިދާޅުވެ ޤާސިމް ވަނީ މި ހަފްތާ ތެރޭގައި ބައެއް މަސްވެރިންނާ ބައްދަލު ކުރައްވާފައެވެ.

‏"ދިވެހި މަސްވެރިންނަށް ދިމާވެފައިވާ އެކިދަތިތަށް ހައްލު ކުރުމުގައި ފާއިތުވި ހުރިހާ ސަރުކާރުތަކުންވެސްް ވަނީ އެކި މިންވަރަށް އިހްމާލުވެފަ، އެކަންކަމަށް ހައްލުގެނެވޭނީ، މަސްވެރިންނާއި ގާތުން މަސައްކަތްކޮށް، މަސްވެރިންގެ ހާލަތު ސީދާ މަސްވެރިންގެ ފަރާތުން އަޑުއަހައިގެން" މަސްވެރިންނާ ބައްދަލު ކުރެއްވުމަށްފަހު ޤާސިމް ކުރެއްވި ޓްވީޓުގައި ވިދާޅުވިއެވެ.

މިއަހަރު ސެޕްޓެމްބަރު މަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ޖުމްހޫރީ ޕާޓީގެ ފަރާތުން ޤާސިމް ވާދަކުރުމަށް މިހާރުވަނީ ހަމަޖެހިފައެވެ.

ރިޔާސީ އިންތިޚާބާއި ގުޅިގެން އެކި ދާއިރާތަކާއި ގުޅޭ އެކި ވަޢުދުތައް ކޮންމެ ކެނޑިޑޭޓަކުވެސް ރައްޔިތުންނާއި ހަމައަށް ގެނެއެވެ.

މިހާރުގެ ސަރުކާރުންވެސް ވެރިކަމަށް  އައުމަށް ކެމްޕޭނު ކުރިއިރު މަސްވެރިންނަށް ގިނަ ވަޢުދުތަކެއް ވެފައި ވާއިރު، އެކަންކަން ކުރެވިފައި ނުވާކަމަށް ބުނެ އިދިކޮޅުން އަންނަނީ ބުނަމުންނެވެ.