ރައީސް ޔާމިނުގެ ފުއްގިރި މައްސަލައިގެ އަޑުއެހުމެއް މިއަދަށް ތާވަލުކޮށްފި

ރ. ފުއްގިރި ކުއްޔަށް ދޫކުރުމުގެ މުއާމަލާތާއި ގުޅުވާ ރައީސް އަބްދުﷲ ޔާމީން އަބްދުލްގައްޔޫމުގެ މައްޗަށް އުފުލާފައިވާ ދައުވާތަކާއި ގުޅިގެން ކްރިމިނަލް ކޯޓުގައި ކުރިއަށް ގެންދާ ޝަރިއަތުގެ އަޑުއެހުމެއް މިއަދު 9:00 އަށް ކްރިމިނަލް ކޯޓުގައި ތާވަލުކޮށްފި އެވެ.

ފުއްގިރި މައްސަލައިގައި މިހާރު ކުރިއަށް ދަނީ ހެކި ބަސް ނެގުމުގެ މަރުހަލާއެވެ.

އެގޮތުން މިހާތަނަށް ދައުލަތުން ހުށަހަޅާފައިވާ ހެކިންގެ ތެރެއިން ފަސް ހެކިންގެ ހެކިބަސް ވަނީ ނަގާ ނިމިފައެވެ. ހޯމަ ދުވަހު އަޮންނަ އަޑު އެހުމުގައި ނެގުމަށް ހަމަޖެހިފައިވަނީ، އެމްއެމްޕީއާރުސީގެ ކުރީގެ މުވައްޒަފެއް ކަމަށްވާ ޝިފާއުގެ ހެކި ބަސް ނެގުމެވެ.

ފުއްގިރި މައްސަލާގައި ރައީސް ޔާމީންއަށް ދައުވާކުރަނީ އެރަށް ކުއްޔަށް ދޫކުރުމުން ރިޝްވަތުގެ ގޮތުގައި 1.1 މިލިއަން ޑޮލަރު ގަބޫލުކުރައްވައި، އެ ފައިސާ ލޯންޑާ ކުރެއްވި ކަމަށް ބުނެއެވެ. އެ މައްސަލާގައި ރައީސް ޔާމީންގެ އިތުރުން ސަން އިންވެސްޓްމަންޓާއި ސަން ކޮންސްޓްރަކްޝަންގެ އިތުރުން އަހުމަދު ކްރިކް ރިޒާގެ މައްޗަށް ދައުވާކުރެއެވެ.

ނިމުނު ހަފްތާގައި ވެސް ފުއްގިރި މައްސަލައިގެ އަޑުއެހުންތައް ފުލުފުލުގައި ބާއްވާފައިވާއިރު ހެކިބަސް ނެގުމަށް 22 ގަޑިއިރު ވަނީ ހޭދަކޮށްފަ އެވެ.

ފުއްގިރި މައްސަލައިގެ އަޑުއެހުންތައް ތާވަލުކޮށްގެން ކުރިއަށް ގެންދަނީ ރައީސް ޔާމީންގެ ފަރާތްޕުޅުން ހައިކޯޓުގައި އިސްތިއުނާފުކޮށްފައިވާ އާރަށުގެ މައްސަލައަށް ހުރަސްއެޅޭ ގޮތަށްކަން ފާހަގަކޮށް އިދިކޮޅު ކޯލިޝަނުން ގެންދަނީ ކަންބޮޑުވުން ފާޅުކުރަމުން ނެވެ.

ރައީސް ޔާމީން ވެސް ވަނީ އެމަނިކުފާނުގެ އިސްތިއުނާފު މައްސަލަ ލަސްނުވާނެހެން އަޑުއެހުންތައް ތާވަލުކޮށްދިނުމަށް އެކި ފަހަރުމަތިން އެދިވަޑައިގެންފަ އެވެ.