ދެން އުފެދޭނީ ދި ޑިމޮކްރެޓްސްއިން ބަސް ކިޔާނެ ސަރުކާރެއް: އާޒިމް

މި އަހަރުގެ ރިޔާސީ އިންތިޚާބަށް ފަހު ދެން އުފެދިގެންދާނީ ދި ޑިމޮކްރެޓްސް ޕާޓީން ފުރިހަމަޔަށް ބަސް ކިޔާނެ އަދި އެ ޕާޓީ ފުރިހަމަޔަށް ހިއްސާވާނެ ސަރުކާރެއް ކަމަށް ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެ އެވެ.

އާޒިމް މި ފަދައިން ވިދާޅުވެފައި ވަނީ އާދިއްތަ ދުވަހުރޭ "ދި ޑިމޮކްރެޓްސް" އިން ބޭއްވި ހަރުގެ ޖަލްސާގައި ވާހަކަދައްކަވަމުން ނެވެ.

އާޒިމް ވިދާޅުވީ ދަ ޑޮމިކްރެޓްސް ޕާޓީ ރަޖިސްޓާ ކުރުން އިލެކްޝަން ކޮމިޝަނުން ފަސްކުރި ނަމަވެސް، އެ ޕާޓީ އުފައްދާނެ ކަމަށެވެ. އަދި ރަޖިސްޓާ ވެސް ކުރާނެ ކަމަށެވެ.

އޭގެ އިތުރުން އާޒިމް ވިދާޅުވީ ކުރިއަށް އޮތް ރިޔާސީ އިންތިޚާބުގައި ވެސް ދި ޑިމޮކްރެޓްސް އިން ވާދަކުރާނެ ކަމާށެވެ.

އަންނަ ރިޔާސީ އިންތިޚާބުގައި އެމްޑީޕީ ބަލިކޮށް މި ސަރުކާރު ބަދަލުކުރާނެ ކަމަށާއި، އެއަށްފަހު އުފެދިގެންދާނީ ދި ޑިމޮކްރެޓްސް ހިއްސާވާ ސަރުކާރެއްކަމަށް އޭނާ ވިދާޅުވި އެވެ.

"މި ޕާޓީ އުފެދޭނެ. އުފެދިގެން ނިކުމެ އިރާދަކުރެއްވިއްޔާ ވެރިކަން ވެސް އަޅުގަނޑުމެން ކުރާނީ. އަޅުގަނޑުމެންގެ ސަރުކާރަކުން ކުރާނީ. އަޅުގަނޑުމެންގެ ބަހެއް ނެތް ސަރުކާރެއް ދެނެއް އިރާދަކުރެއްވިއްޔާ އަންނާކަށް ނެތް"

އަލީ އާޒިމް

ދި ޑިމޮކްރެޓްސް އަކީ ސަރުކާރު ހިންގާ މައި ޕާޓީގައި ތިބި މަޖިލީސް މެމްބަރުންނާއި، އަދި ޕާޓީއަށް ގިނަ ދުވަސްތަކެއް ވަންދެން ޚިދުމަތްކޮށްދެއްވި ބަޔަކު ޕާޓީން ވަކިވެ އުފައްދާ ސިޔާސީ ޕާޓީއެކެވެ.

ދި ޑިމޮކްރެޓްސްގެ މެމްބަރުން ގެންދަނީ ސަރުކާރަށް ގިނަ ފާޑުކިޔުންތަކެއް ވެސް އަމާޒުކުރަމުން ނެވެ.

އެގޮތުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ރައްޔިތުންނަށް ވީ ވައުދުތައް ފުއްދުމުގައި ފެއިލްވެފައިވާ ކަމަށާއި، އެމަނިކުފާނަށް ދެވަނަ ދައުރެއް ދޭން ޖެހޭ އެއްވެސް ސަބަބެއް ނެތްކަމަށް ދި ޑިމޮކްރެޓްސް ގެ މެމްބަރުން ދަނީ ވިދާޅުވަމުން ނެވެ.

އަދި މި ސަރުކާރު ބަދަލުކުރުމަށްޓަކައި ކޯލިޝަން ހަދަން ޖެހުނު ކޮންމެ ބަޔަކާއެއްކޮށް ކޯލިޝަން ހަދައި މަސައްކަތް ކުރާނެކަމަށް އެ ޕާޓީގެ މެމްބަރުން ދަނީ ވިދާޅުވަމުން ނެވެ.