ޢީދު ބަންދުގެ އެއް ދުވަހު ބޭންކު ހުޅުވާނެ

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ނިންމާފައިވާ ގޮތަށް، އަޟްޙާ އީދާ ގުޅިގެން އަންނަ ބަންދު ދުވަސްތަކުގެ ތެރެއިން އެއްދުވަހު ބޭންކް އޮފް މޯލްޑިވްސް (ބީއެމްއެލް) ހުޅުވާނެ ކަމަށް އެ ބެންކުން ބުނެފިއެވެ.

އެގޮތުން މިކަމާއި ގުޅިގެން ބެންކުން ނެރެފައިވާ ނޫސް ބަޔާނުގައި ބުނެފައިވަނީ އީދު ބަންދުގެ ދުވަސްތަކުގެ ތެރެއިން ބެންކު ހުޅުވާފައި ހުންނާނީ 26 ޖޫން ވަނަ ދުވަހުގެ ހެނދުނު 8:30 އިން މެންދުރުފަހު 2:00 އަށް ކަމަށެވެ.

މިއާއިއެކު ބީއެމްއެލްއިން ވަނީ ބަންދު ދުވަސްތަކުގައި، އިންޓަރނެޓް ބޭންކިންގ އަދި މޯބައިލް އެޕް މެދުވެރިކޮށް ކަސްޓަމަރުން ބޭންކިންގ ހިދުމަތް ހޯއްދެއްވުމަށް އެދިފައެވެ.

މީގެ އިތުރުން ބެންކުން ބުނެފައިވަނީ ރާއްޖޭގެ އެކި ކަންކޮޅުތަކުގައި ގާއިމްކޮށްފައިވާ ސެލްފް ސަރވިސް ބޭންކިންގ ސެންޓަރތައް މެދުވެރިކޮށް ޖަމާކުރުމާއި، ފައިސާ ނެގުމާއި ފައިސާ ފޮނުވުމުގެ ހިދުމަތް 24 ގަޑިއިރު ލިބޭނެ ކަމަށެވެ.

އަދި މީހުން ދިރިއުޅޭ ރަށްތަކުގައި ގާއިމްކޮށްފައިވާ ކޭޝް އެޖެންޓުން މެދުވެރިކޮށް އަސާސީ ބޭންކިންގ ހިދުމަތްތައްވެސް ކަސްޓަމަރުންނަށް ލިބިގެންދާނެ ކަމަށް ވެސް ބެންކުން ވަނީ ބުނެފައެވެ.

ބީއެމްއެލްއިން ވަނީ އެންމެހާ ކަސްޓަމަރުންނަށް އަޟްޙާ އީދުގެ ތަހުނިޔާ ދަންނަވާފައެވެ.