އީވާ އާއި ރައީސް ނަޝީދުގެ މައްސަލަ ނިމެންދެން މަޖިލީހުގެ ދައުރު ދަންމާލަން އެދިއްޖެ!
މަޖިލީހުގެ ނާއިބު ރައީސް އީވާ އަބްދުالله އާއި ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލަ ނިމެންދެން މަޖިލީހުގެ މި ދައުރު ދަންމާލުމަށް މަޖިލީހުގެ މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ) އެދިލައްވައިފި އެވެ.
މިހާރު ކުރިއަށްދާ ރައްޔިތުންގެ މަޖިލީހުގެ ދެވަނަ ދައުރުގެ 13 ވަނަ ޖަލްސާއަށް ޝަރީފް ވަނީ އީވާގެ އިތުބާރު ނެތް ކަމުގެ މައްސަލަ ބައްލަވަން ރައީސް ނަޝީދު ރިޔާސަތަށް ވަޑައިނުގަންނަވާތީ، އެމަނިކުފާނު މުޅި މަޖިލީހުގެ އިމްތިޔާޒަށް އަރައިގެންފައިވާ ކަމަށް ބުނެ އިންތިޔާޒާ ބެހޭ މައްސަލައެއް މަޖިލީހަށް ހުށަހަޅުއްވާފައެވެ.
އެ މައްސަލައިގެ ބަހުސް ފައްޓަވަމުން މަވޯޓާ ވަނީ، މަޖިލީހުގެ މިދައުރަށް ހުށަހެޅިފައިފާ މުހިންމު ގާނޫނު ތަކާއި، ނަޝީދާއި، އީވާގެ އިތުބާރު ނެތް ކަމުގެ މައްސަލަ ނިމެންދެން ދައުރު ދަންމާލައްވަން އެދިލައްވާފައެވެ.
"މިހާރު ރައްޔިތުންގެ މަޖިލީހަށް ހުށަހެޅިފައިވާ ރައްޔިތުންގެ މަޖިލީހުގެ ރައީސް އާއި، ނާއިބު ރައީސްގެ މައްސަލަ އާއި، މަޖިލިސް ގަވާއިދަށް އިސްލާހް ގެނެސް، އެ މައްސަލަ ކުރިއަށް ގެންދެވޭނެ ގޮތަކަށް ހުށަހެޅި އިސްލާހުތަކާ، އަދި މުހިންމު ގާނޫނުތައް މަޖިލީހުގެ ނިމެންދެން، މި މަޖިލިސްގެ މި ދައުރު ނުނިންމާ ދަންމާލަން އަޅުގަނޑު އެދެން."
މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ)
ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތް ކަމުގެ މައްސަލަ އެމްޑީޕީން މަޖިލީހަށް ހުށަހެޅީ 54 މެމްބަރުންގެ ސޮޔާއެކުއެވެ. އަދި އީވާގެ އިތުބާރު ނެތް ކަމުގެ މައްސަލަ މަޖިލީހުގެ އިދާރާއަށް ހުށައަޅައިފައިވަނީ 50 މެމްބަރުންގެ ސޮޔާއި އެކުއެވެ.
އެއާއެކު އެ ދެ ބޭފުޅުންވެސް ވަނީ އެ މައްސަލައިގައި ގޮތެއް ނިމެންްދެން މަޖިލީހުގެ ރިޔާސަތު ބެއްލެވުމަށް އުޒުރުވެރިވެލައްވާކަމަށް ވިދާޅުވެ މަޖިލީހަށް ސިޓީއެއް ފޮނުއްވައިފައެވެ.
އެހެންކަމުން މަޖިލީހުގެ މި ދައުރު މިހަފްތާގައި ނިމޭއިރުވެސް އެ ދެ މައްސަލަ ކުރިއަށް ނުގެންދެވޭނެ ކަމަށް ބެލެވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
