އިތުބާރު ނެތްކަމުގެ މައްސަލައިގެ ނޯޓިސް ހަމަވާ ދުވަހު މުރައިދޫ ގެއިން ނިކުންނާނަން: ރައީސް ނަޝީދު

ރައްޔިތުންގެ މަޖިލީހުގެ ރައީސްކަމުން ވަކިކުރުމަށް މުޙައްމަދު ނަޝީދާއި ދެކޮޅަށް ހުށައަޅާފައިވާ އިތުބާރު ނެތްކަމުގެ މައްސަލައިގެ ނޯޓިސް ހަމަވާ ދުވަހު މަޖިލީހުގެ ރައީސް ހުންނަވަން ދައުލަތުން ހަމަޖައްސާދެއްވާފައިވާ މުރައިދޫ ގެކޮޅުން ނިކުމެވަޑައިގަންނަވާނެ ކަމަށް ނަޝީދު ވިދާޅުވެއްޖެ އެވެ.

އިތުބާރު ނެތްކަމުގެ މައްސަލަ ނަޝިދާއި ދެކޮޅަށް ހުށައެޅުމާއި ގުޅިގެން މަޖިލީހުގެ ރިޔާސަތުގައި އިންނެވުމަށް އުޒުރުވެރިވާކަމަށް ނަޝީދު އަންގަވާފައިވާއިރު، މަޖިލީހުގެ ރައީސްގެ މަޤާމުގައި ހުންނަވާ ފަރާތްތަކަށް ދައުލަތުން ދޭ އިނާޔަތްތައް ނެންގެވުމާއި ދޭތެރޭ ދެކިވަޑައިގަންނަވާ ގޮތަކީ ކޮބައިތޯ އައްސަވާ މިއަދު ނަޝީދު މަޖިލީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ސުވާލުކުރައްވާފަ އެވެ.

އެ ސުވާލަށް ޖަވާބުދެއްވަމުން ނަޝީދު ވިދާޅުވީ ނަޝީދުގެ އިތުބާރު ނެތްކަމުގެ މައްސަލައިގެ ނޯޓިސް ހަމަވާ ދުވަހަކީ އެމަނިކުފާނު މަޖިލީހުގެ ރައީސަށް ދައުލަތުން ދެއްވާ އިނާޔަތްތައް ނެގުން ހުއްޓާލާނެ ދުވަސް ކަމަށެވެ.

"އިރާދަކުރެއްވިއްޔާ އަޅުގަނޑުގެ ނޯޓިސް މުއްދަތު ހަމަވާ ދުވަހު، އަޅުގަނޑު މުރައިދޫ ގެއިން ނިކުންނާނަން. އަޅުގަނޑު މުރައިދޫ ގޭގައި ހުރުން އެއީ އެއްގޮތަކަށް ވެސް ކުރާ ހިތްވާ ކަމެއް ނޫން"
މަޖިލީހުގެ ރައީސް މުޙައްމަދު ނަޝީދު

ނަޝީދު ވިދާޅުވީ ސަރުކާރުގެ ގެކޮޅަކުން ނިކުމެވަޑައިގަތަސް އެމަނިކުފާނަކީ މާލޭގައި އުޅޭނެ ބޯހިޔާވައްސެއް ނެތް ބޭފުޅެއް ނޫން ކަމަށެވެ. އަދި އެމަނިކުފާނު އަބަދުވެސް އެދެނީ ކެނެރީގެއަށް ބަދަލުވެވޭނެ ގޮތެއް ހަމަޖެހިގެން ދިއުންކަމަށް ވެސް ނަޝީދު ވިދާޅުވި އެވެ.

ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް އަމާޒުކޮށް ދިން ބޮމުގެ ހަމަލާއަށް ފަހު ނަޝީދުގެ ސެކިއުރިޓީ ވެސް ވަނީ އެތައް ގުނައެއް ވަރުގަދަ ކުރެވިފައެވެ. އަދި އެމަނިކުފާނުގެ ސެކިއުރިޓީއަށް އެކަނި މިލިއަނުން ދައުލަތުން ޚަރަދުކުރައްވަ އެވެ.

ނަޝީދުގެ ސެކިއުރިޓީއަށް ސަރުކާރުން ކުރާ ޚަރަދު ބޮޑުކަން ފާހަގަކޮށް އެމްޑީޕީގެ ބައެއް މެމްބަރުން ގެންދަވަނީ ބަހުގެ ހަމަލާތައް ރައްދުކުރައްވަމުން ނެވެ. އެކަމަށް ވެސް ނަޝީދު ވަނީ ރައްދުދެއްވާފަ އެވެ.

"ދެން އަޅުގަނޑުގެ ސެކިއުރިޓީ ބަލަހައްޓާނެ ތޯ ނޫން ތޯ، ދެން ނުބަލަހައްޓައިގެން މަރާލައިފިއްޔާ މަރުވެފަ އޮންނާނީ ދެއްތޯ؟ މިހާރުވެސް ކިރިޔާ އަޅުގަނޑު މި ހުރީ"
މަޖިލީހުގެ ރައީސް މުޙައްމަދު ނަޝީދު

ކޮމެންޓް ކުރޭ