ޕީޕީއެމްގެ މެމްބަރުންތަކެއް ގޮވައިގެން ޤާލިބު އެމްޑީޕީއަށް!
ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އިން ވަކިވެވަޑައިގެންނެވި އެ ޕާޓީގެ ސެނެޓަރު އަޙުމަދު ޤާލިބު ސަރުކާރު ހިންގާ މައި ޕާޓީ އެމްޑީޕީއާއި ގުޅިވަޑައިގެންފި އެވެ.
ޤާލިބު އެމްޑީޕީއާއި ގުޅިވަޑައިގެންފައިވާކަން އެ ޕާޓީން ވަނީ ރަސްމީކޮށް އިއުލާނުކޮށްފަ އެވެ.
ޤާލިބު އެމްޑީޕީއާއި ގުޅިވަޑައިގަތީ ޕީޕީއެމްގެ މެމްބަރުންތަކަކާއި އެކުގައިކަމަށް އެމްޑީޕީން ވަނީ ހާމަކޮށްފަ އެވެ.
އެމްޑީޕީން ބުނީ ޕީޕީއެމްގެ ކުރީގެ ސެނެޓަރު ޤާލިބު އެ ޕާޓީއާއި ގުޅިވަޑައިގަތީ ޕީޕީއެމްގެ ގިނަ މެމްބަރުންތަކަކާއި ވެސް އެކުގައި ކަމަށެވެ.
ޤާލިބު އެމްޑީޕީއާއި ގުޅިވަޑައިގަތް އޭނާގެ ފޯމު އެމްޑީޕީގެ އެންމެ އިސް ލީޑަރު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ އަތްޕުޅަށް އަރުވާފައިވަނީ އިތުރު މެމްބަރުންގެ ފޯމުތަކާއި ވެސް އެކުގަ އެވެ.
އެމްޑީޕީން ވަނީ ޤާލިބަށް ހޫނު މަރުޙަބާއެއް ކިޔާފަ އެވެ.
ޤާލިބު ޕީޕީއެމުން ވަކިވީ އެ ޕާޓީގައި އެކަށީގެންވާ ފުރުސަތުތައް ލިބިވަޑައިނުގަންނަވާކަމަށް ވިދާޅުވަމުން ނެވެ.
އެހެން ނަމަވެސް ޕީޕީއެމުން އެކަން ދޮގުކުރެއެވެ.
އަދި އެ ޕާޓީން ބުނަމުން އައިސްފައިވަނީ، ސިޔާސީ ޕާޓީތަކުން ނުލިބޭ ފުރުސަތުތައް އެ ޕާޓީގެ މެމްބަރުންނަށް ހުޅުވާލާފައިވާނެ ކަމަށެވެ. އަދި ޕާޓީ ހިންގަމުން ދަނީ އަބަދުވެސް މެމްބަރުންގެ ބައިވެރިވުމާއި، ޚިޔާލާއި މަޝްވަރާގެ ތެރެއިން ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
