ޕީޕީއެމް/ޕީއެންސީގެ ފަރާތުން މަޖިލީހުގެ މާފަންނު ހުޅަނގު ދާއިރާގެ މެންބަރު ކަމަށް އަޙުމަދު (ޤައުމީލޭ)!

ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ޕީޕީއެމް/ޕީއެންސީ ޓިކެޓްގައި މާފަންނު ހުޅަނގު ދާއިރާއަށް ކުރިމަތިލާނެ ކެންޑިޑޭޓެއް ކަނޑައެޅުމަށް ބާއްވާ ޕްރައިމަރީގައި ޕީއެންސީގެ ސެނެޓް މެންބަރު އަޙުމަދު ހަމްދުالله ރަޝީދު (ޤައުމީލޭ) ވާދަކުރައްވަން ނިންމައިފިއެވެ.

އަހުމަދު ވިދާޅުވެފައިވާ ގޮތުގައި، އޭނާ މާފަންނު ހުޅަނގު ދާއިރާގެ މެމްބަރުކަމަށް ކުރިމަތިލެއްވީ ރައީސުލްޖުމްހޫރިއްޔާ ޑރ މުހައްމަދު މުއިއްޒު ސަރުކާރާއި ގުޅިގެން ދާއިރާގެ ރައްޔިތުން ބޭނުންވާ ތަރައްޤީ އެންމެ ފުރިހަމަގޮތުގައި ހާސިލް ކޮށްދިނުމަށް ކަމަށެވެ. އެގޮތުން މަގުތައް ހެދުމާއި، ފާކިންގ އަދި ބޯހިޔާވަހިކަމުގެ މައްސަލަ ފަދަ މައްސަލަތައް ހައްލުކޮށްދިނުމަށް ސަރުކާރާއި ގުޅިގެން މަސައްކަތް ކުރައްވާނެ ކަމަށް އޭނާ ވިދާޅުވި އެވެ.

މ.ބީޗްހެވަން އަޙުމަދު ހަމްދުالله ރަޝީދު އަކީ މާލޭ އިންގްލިޝް ސްކޫލުން ތަޢްލީމް ހާސިލް ކުރުމަށްފަހު ޤައުމީ ޔުނިވަރ ސިޓީން ނެވިގޭޝަން ދާއިރާއިން މަތީ ތަޢްލީމް ހާސިލް ކުރައްވާފައިވާ ބޭފުޅެކެވެ.

ކޮންސްޓްރަކްޝަން ގެ ދާއީރާއިން ވަޒީފާގެ މާހައުލަށް ނުކުންނެވި އަހުމަދުގެ އަމިއްލަ ކޮންސްޓްރަކްޝަން ކުންފުންޏެއްވެސް އޮވެއެވެ. އޭނާ މިވަގުތު މާލޭ ސިޓީކައުންސިލްގެ ވޭސްޓް މެނޭޖްމަންޓް ސެކްޝަންގެ އޮޕަރޭޝަން މެނޭޖަރެއްގެ މަޤާމު އަދާކުރައްވަމުންދާއިރު، މިއަދާއި ހަމައަށް ތިން ކުންފުންޏެއްގައި އެކި މަޤާތަކެއްގައި ވަނީ މަސައްކަތްކުރައްވާފައެވެ. އެގޮތުން ސައިޓް ސުޕަވައިޒަރ ،ސިވިލްސުޕަރވައިޒަރ، ސައިޓް މެނޭޖަރ، އަދި ކޮންސްޓްރަކްޝަން މެނޭޖަރ ކަން ވެސް ވަނީ ކުރައްވާފައެވެ.

މީސްމީޑިއާގައި ގައުމީލޭ ގެ ނަމުން މަޝްހޫރުވެފައިވާ އަހުމަދު ސިޔާސީ ގޮތުން މިހާތަނަށް ކުރައްވާފައިވާ މަސައްކަތްތަކަށް ބަލާލާއިރު، އޭނާ އަކީ ޕީ.ޕީ.އެމް އުފެދުނީއްސުރެން ޕީ.ޕީ.އެމް ފިކުރުގައި މަސައްކަތް ކުރައްވަމުން އަންނަ ޕީ.އެން.ސީ ސެނެޓް މެމްބަރެކެވެ. އަދި މާފަންނު ހުޅަނގުދާއިރާގެ ސްޓިއަރިންކޮމެޓީގެ ރައީސްވެސް މެއެވެ.

އޭނާ އަކީ ޕީ.ޕީ.އެމް ޕީ.އެންސީ އިދިކޮޅު ގައި އޮވެގެން މިހާތަނަށް ކުރިއަށް ގެންގޮސްފައިވާ މަގުމަތީ ހަރަކާތްތަކުގައި އިސްކޮށް ހަރަކާތްތެރިވެފައިވާ ބޭފުޅެކެވެ. އެގޮތުން، ކުރީގެ ރައީސް ޔާމީން އަބްދުލްގައްޔޫމް މިނިވަންކުރުމަށް ގޮވާލާ ހިންގުނު ހަރަކާތްތަކާއި އިންޑިޔާ އައުޓް ހަރަކާތްތައް ހިމެނެއެވެ. އެ ހަރަކާތްތަކުގެ ތެރެއިން 53 ފަހަރެއްގެ މަތިން މުއްދަތު ޖަހާ 265 ދުވަހު އޭނާ ވަނީ ޖަލުގައި ބަންދުކޮއްފައެވެ.