ވޯލްޑްކަޕް ޗެންޕިއަންކަން ހޯދާފައިވާ ގައުމުތަކުގެ މެދުގައި 35 އަހަރުން މަތީގެ މުބާރާތެއް ބާއްވަނީ

އެލީޓް ޕްލޭޔަރސް ގްރޫޕް (އީޕީޖީ) އިން އިންތިޒާމްކޮށްގެން މިއަހަރުގެ ޖޫން 04-11 އަށް އިންގްލެންޑްގައި އީޕީޖީ ކަޕްގެ ނަމުގައި 35 އަހަރުން މަތީގެ ފުޓްބޯޅަ މުބާރާތެއް ބާއްވަން ނިންމައިފިއެވެ.

މިމުބާރާތަކީ އެލީޓް ޕްލޭޔަރސް ގްރޫޕާއި މިދިޔައަހަރު ގުޅުނު ކުޅިވަރު ވިޔަފާރިވެރިންގެ ގުރޫޕަކުން ދުނިޔޭގެ ޗެންޕިއަންކަން ހޯދާފައިވާ ގައުމުތަކަށް ހުޅުވާލައިގެން ބާއްވާ މުބާރާތެކެވެ. އެގޮތުން މި މުބާރާތުގައި ވާދަކުރުމަށް ހަމަޖެހިފައިވާ ގައުމުތަކަކީ ބްރެޒިލް، އިޓަލީ، ޖަރުމަނު، އާޖެންޓީނާ، ފުރާންސް، އުރުގުއާއީ، ސްޕެއިން އަދި އިންގްލެންޑް އެވެ.

ޖުމްލަ 7 މެޗު ކުޅުމަށް ހަމަޖެހިފައިވާ މިމުބާރާތް ކުރިއަށް ގެންދިއުމަށް ހަމަޖެހިފައިވަނީ ނޮކްއައުޓް އުސޫލުންނެވެ. އެގޮތުން ޖޫން 4 އަދި 5 ވަނަ ދުވަހު ކުއާޓާ ފައިނަލުގެ ހަތަރު މެޗު ކުޅުމަށް ހަމަޖެހިފައިވާއިރު ސެމީ ފައިނަލުގެ ދެމެޗު ވެސް ކުޅުމަށް ހަމަޖެހިފައިވަނީ ޖޫން މަހުގެ 8 ވަނަ ދުވަހުއެވެ. އަދި މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ ޖޫން މަހުގެ 11 ވަނަ ދުވަހުއެވެ.

މިމުބާރާތަށް ކޮންމެ ގައުމަކުން ވެސް 18 ކުޅުންތެރިންގެ ސްކޮޑުން ނެގުމަށް ހަމަޖެހިފައިވާއިރު، ޓީމު ލިސްޓްގައި ހިމެނޭނީ 35 އަހަރު ފުރި ނުވަތަ އެއަށްވުރެ އުމުރުން ދޮށީ ކުޅުންތެރިންނެވެ. އަދި އެއިން ކޮންމެ ކުޅުންތެރިއަކީ ގައުމީ ޓީމަށް ކުޅެފައިވާ ނުވަތަ މަތީ ފެންވަރުގައި މަދުވެގެން 100 މެޗު ކުޅެފައިވާ ކުޅުންތެރިއަކަށް ވާން ޖެހެއެވެ.

މީގެ އިތުރުން މުބާރާތުގައި މެޗެއްގެ ދިގުމިނަކީ 70 މިނެޓެވެ. އެއީ 35 ނިނެޓުގެ ދެހާފެވެ. އަދި މެޗުތެރޭގައި ސްކޮޑުގައި ހިމެނޭ 18 ކުޅުންތެރިން ބޭނުންވަރަކަށް ބަދަލުކުރުމުގެ ފުރުސަތު އޮންނާނެއެވެ.

މުބާރާތުގައި ވާދަކުރާ ކޮންމެ ގައުމެއްގެ ކެޕްޓަނުންގެ ގޮތުގައި ތިބީ އީޕީޖީގެ ފައުންޑަރުންނެވެ. އެގޮތުން ސްޓީވް މެކްމަނަމަން އިންގްލެންޑް ލީޑު ކުރާއިރު، އާޖެންޓީނާގެ ކެޕްޓަނަކީ އެސްޓެބާން ކެމްބިސޯ އެވެ. ބްރެޒިލްގެ ޓީމު އެމާސަން ލީޑު ކުރާއިރު، ކްރިސްޓިއަން ކަރެމްބެއު (ފްރާންސް)، ކެވިން ކުރަނީ (ޖަރުމަނު)، އިޓަލީގެ މާކޯ މަޓެރާޒީ، ސްޕެއިންގެ މިޝެލް ސަލްގާޑޯ އަދި އުރުގުއޭގެ ޑިއޭގޯ ލުގާނޯ އެވެ.

މީގެ އިތުރުންވެސް ބްރެޒިގެ ރޮނާލްޑީނިއޯ، ރޮބާޓޯ ކާލޯސް، ކަފޫ، ކާކާ އަދި އާޖެންޓީނާގެ ހާނަން ކޮރޮސްޕޯ، ފްރާންސްގެ ތިއެރީ ހެންރީ، ޖަރުމަނުގެ އޮޒިލް އަދި ކަދީރާ ބައިވެރިވާއިރު، އިންގްލެންޑް ޓީމުގައި ހިމެނޭ ފާހަގަކޮށްލެވޭ ބައެއް ކުޅުންތެރިންނާކީ އޭޝްލީ ކޯލް، ޖޯ ކޯލް، ރިއޯ ފާޑިނަންޑް، ޑޭވިޑް ޖޭމްސް، ފްރޭންކް ލަމްޕާޑް އަދި ރޮބީ ފައުލާ އެވެ.