ނޯވޭގެ ފުޓްބޯޅަ ފެޑަރޭޝަނުން ފީފާގެ ރައީސް އިންފަންޓީނޯގެ އިސްތިއުފާއަށް ގޮވާލައިފި

ފީފާގެ ރައީސް ޖިއާނީ އިންފެންޓީނޯއަށް އިތުބާރު ގެއްލިފައިވާ ކަމަށް ބުނެ އޭނާ މަޤާމުން ވަކިވުމަށް ނޯވޭގެ ފުޓުބޯޅަ ފެޑެރޭޝަނުގެ ރައީސާ ލީޒޭ ކްލެވެނެސް ގޮވާލައްވައިފިއެވެ.

އެންއެފްއެފުން ބޭއްވި ޖުލައިމަހުގެ ބޯޑު ބައްދަލުވުމަށްފަހު ދަ ގާޑިއަން އާ ވާހަކަދައްކަވަމުން ކްލެވެނެސް ވިދާޅުވީ، އިންފެންޓީނޯއާ މެދު އެ ފެޑެރޭޝަނުގެ އިތުބާރު މިހާރު މުޅިން ގެއްލިފައިވާ ކަމަށެވެ. އެގޮތުން ކޮންމެ އަހަރަކު ކޮންމެ ދައުރެއްގައި ކަންބޮޑުވާންޖެހޭ ގޮތަށް ކަންކަން ގޮސްފައިވާ ކަމަށާއި މިހާރު ފެޑެރޭޝަނަށް އިންފެންޓީނޯއާ އެކު ކުރިއަށް ދެވެން ނެތް ކަމަށް އެކަމަނާ ވިދާޅުވިއެވެ.

ނޯވޭގެ ފުޓްބޯޅަ ފެޑަރޭޝަނުން އިންފަންތީނޯއާ ދެކޮޅުކަން ހާމަކޮށްފައިމިވަނީ ވަރލްޑްކަޕް ހިމެނޭ ގޮތުން ފީފާގެ މުބާރާތްތަކުގެ ވިޔަފާރީ ޙައްޤުތައް ވިއްކުމުގެ ޕްލޭނެއް އިންފެންޓީނޯ ހުށަހެޅި ހިސާބުން ބައިނަލްއަޤުވާމީ ފުޓުބޯޅައިގައި ބޮޑެތި ދެބަސްވުންތައް އުފެދުމާ ގުޅިގެންނެވެ. 20 ބިލިއަން ޑޮލަރުގެ އަގެއް ކަނޑައަޅައިގެން ދަށު ކުންފުންޏެއް ހަދައި ވޯލްޑް ކަޕާއި އެ ނޫންވެސް މުބާރާތްތަކުގެ ވިޔަފާރިއާއި އިވެންޓް ހިންގުން އެ ކުންފުނީގެ ދަށަށް ބަދަލުކުރުމަށް އެ ޕްލޭނުގައި ހިމެނިއެވެ. އެ ކުންފުނީގެ 20 އިންސައްތައާ ހަމައަށް ޕްރައިވެޓް އިންވެސްޓަރުންނަށް ވިއްކުމުގެ ހުށަހެޅުން ބޮޑެތި ފާޑުކިޔުންތައް ލިބުމާ ގުޅިގެން ވަނީ އަނބުރާ ގެންގޮސްފައެވެ.

ފީފާއިން ބުދަ ދުވަހު އެ ޕްލޭނާ ގުޅޭ ގޯސްތަކަށް މާފަށް އެދުނު ނަމަވެސް ޔޫއެފާއިން ބުރާސްފަތި ދުވަހު ބުނީ ވޯލްޑް ކަޕް ހިމެނޭ ގޮތުން ފީފާ މުބާރާތްތައް ބޮއިކޮޓް ކުރުމަށް ހުށަހެޅި ހުށަހެޅުން ނެގުމުގެ ޝަރުޠުތައް އަދިވެސް ފުރިހަމަ ނުވާ ކަމަށެވެ. ފީފާގެ މި ހުށަހެޅުން އަނބުރާ ގެންދިޔަ ނަމަވެސް އިންފެންޓީނޯގެ ލީޑާޝިޕާ ދެކޮޅަށް ކުރާ ޕްރެޝަރު ދަނީ ވަރުގަދަވަމުންނެވެ.

އިންފަންޓީނޯ އާ ދެކޮޅަށް ވިލާތުގެ އިތުރުން އޭޝިއާގެ ފުޓްބޯޅަ ފެޑަރޭޝަންތަކުންވެސް ގެންދަނީ ބަޔާންތައް ނެރެމުންނެވެ.