ފަސޭހަކަމާއި އެކު މަޑުއްވަރީ އަތުން މޮޅުވެ ދުވާފަރުން ސެމީގެ ފުރުސަތު ބޮޑުކޮށްފި

ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް "ސޮނީ ސްޕޯޓްސް ގޯލްޑަން ފުޓްސަލް ޗެލެންޖު 2024" ގެ ރ. އަތޮޅު، އަތޮޅު ބުރުގެ ގުރޫޕް އެކެއްގައި މިއަދު ހަވީރު މަޑުއްވަރީ އާއި ދެކޮޅަށް ކުޅުނު މެޗު ފަސޭހަކަމާއި އެކު 6-0 ގެ ނަތީޖާއަކުން ކާމިޔާބުކޮށް ދުވާފަރުން ސެމީގެ ފުރުސަތު ބޮޑުކޮށްފިއެވެ.

މުބާރާތުގައި ދުވާފަރުން ކުޅުނު ފުރަތަަމަ މެޗުގައި 4-0 ގެ ނަތީޖާއަކުން އަލިފުށި އަތުން އެޓީމު މޮޅުވެފައި ވާއިރު، މަޑުއްވަރީގެ ފުރަތަަމަ މެޗުގައި މީދޫ އަތުން އެޓީމު ވަނީ 3-0 ގެ ނަތީޖާއަކުން ބަލިވެފައެވެ.

ހުޅުމާލޭ ރެހެންދި ދެ ނަންބަރު ފުޓްސަލް ދަނޑުގައި މިއަދު ހަވީރު ކުޅެވުނު މެޗުގެ ފުރަތަަމަ ހާފުގައި ދުވާފަރުން މޮޅަށް ކުޅެ މެޗު ޑޮމިނޭޓުކުރީ ދުވާފަރުން ނެވެ. އަދި ފުރަތަމަ ހާފުގައިި އެޓީމުން އެއް ލަނޑު ކާމިޔާބުކުރި ނަމަވެސް ދެވަނަ ހާފުގައި އެޓީމުން ވަނީ އިތުރު ފަސް ލަނޑު ކާމިޔާބުކޮށްފައެވެ.

މިމެޗުގައި ދުވާފަރުގެ އިސްމާއިލް އީސާ ދެލަނޑު ކާމިޔާބު ކުރި އިރު އެޓީމުގެ އަހުމަދު އީސާ، މުސްލިމް މުހައްމަދު، އަބްދުﷲ ލޫތު އިބްރާހިމްގެ އިތުރުން އަހުމަދު އީރަސް މިއިން ކޮންމެ ކުޅުންތެރިއެއް ވަނީ އެއް ލަނޑު ކާމިޔާބުކޮށްފައެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ދުވާފަރުގެ އަބްދުﷲ ލޫތު އިބްރާހިމް އެވެ.

މިމެޗުން ލިބުނު ތިން ޕޮއިންޓާއެކު ކުޅުނު ދެ މެޗުން ވެސް މޮޅުވެ ދުވާފަރުން 6 ޕޮއިންޓް ހޯދާފައިވާއިރު، ގުރޫޕްގެ އެއްވަނައިގައި މިވަގުތު އޮތީ އެޓީމެވެ. އަދި ދެވަނަގައި ތިން ޕޮއިންޓާއެކު ލަނޑުގެ ތަފާތުން މިވަގުތު އޮތީ މީދޫ އެވެ. ތިން ޕޮއިންޓާއެކު ގުރޫޕުގެ ތިންވަނަ އަލިފުށި އޮތްއިރު ކުޅުނު ދެ މެޗުން ވެސް ބަލިވެ ގުރޫޕްގެ ފުލުގައި އޮވެއެވެ މަޑުއްވަރީ އެވެ.

މިއަހަރުގެ މުބާރާތުގައި ޖުމްލަ 129 ޓީމު ބައިވެރިވެފައިވާއިރު، މުބާރާތުގައި 320 މެޗު ކުޅުމަށް ވަނީ ހަމަޖެހިފައެވެ. އަދި މިއަހަރުގެ މުބާރާތުގައި ރ. އަތޮޅުން 7 ޓީމު ބައިވެރިވެފައިވާއިރު، މިއަތޮޅުގެ އަތޮޅު ބުރު ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 7 ޓީމު ދެ ގްރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން އެންމެ ރަގަޅު ނަތީޖާއެއް ހޯދާ ދެޓީމަށް ސެމީ ފައިނަލުން ޖާގަ ލިބޭއިރު، ފައިނަލުގައި ވާދަކުރާ ދެޓީމަށް މުބާރާތުގެ ޒޯނު ބުރުން ފުރުސަތު ލިބިގެންދާނެ އެވެ.