އޮލިމްޕިކްސް/ފުޓްބޯޅަ: އެމެރިކާ ލަދުގަންނަވާލުމަށްފަހު މޮރޮކޯ ސެމީފައިނަލަށް

ފްރާންސްގެ ވެރިރަށް ޕެރިހުގައި މިހާރު ކުރިއަށްދާ އޮލިމްޕިކް ފުޓްބޯޅަ ފުރިހެން އިވެންޓްގެ ކުއާޓާ ފައިނަލުގައި އެމެރިކާ 4-0 ގެ ތަފާތުބޮޑު ނަތީޖާއަކުން ބަލިކޮށް މޮރޮކޯ އިން މުބާރާތުގެ ސެމީ ފައިނަލުން ޖާގަ ހޯދައިފިއެވެ.

މޮރޮކޯ ކުއާޓާ ފައިނަލުން ޖާގަ ހޯދީ ގުރޫޕް ސްޓޭޖުގައި ކުޅުނު ތިން މެޗުގެ ތެރެއިން ދެމެޗުން މޮޅުވެ އަނެއް މެޗުން ބަލިވެ، ލިބުނު ހަ ޕޮއިންޓާއެކު ގުރޫޕް ބީގެ އެއްވަނަ ޓީމުގެ ގޮތުގައެވެ. އަދި އެމެރިކާ ކުއާޓާ ފައިނަލުން ޖާގަހޯދީ ގުރޫޕް އޭގެ ދެވަނަ ޓީމުގެ ގޮތުގައެވެ. އެޓީމު ގުރޫޕް ސްޓޭޖުގައި ކުޅުނު ތިން މެޗުގެ ތެރެއިން ދެމެޗުން މޮޅުވިއިރު، އަނެއް މެޗުން ވަނީ ބަލިވެފައެވެ.

މިމެޗުގައި މޮރޮކޯ އިން ލީޑު ހޯދި ލަނޑު ފުރަތަމަ ހާފުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ ފޯވާޑް ސުފިއާން ރަހީމީ އެވެ. މިއީ މިމުބާރާތުގައި ކުޅުނު ހަތަރު މެޗުގައި އޭނާ ކާމިޔާބުކުރި ފަސްވަނަ ލަނޑެވެ.

މެޗުގެ ދެވަނަ ހާފުގައި އެޓީމުން އިތުރު ތިން ލަނޑު ކާމިޔާބުކުރިއިރު، އެޓީމުގެ އަލް މެހެދީ މައުހޫދް، އަކްރަފް ހަކީމީ އަދި އިލިއަސް އަކްމަކް މިއިން ކޮންމެ ކުޅުންތެރިއަކު ވަނީ އެއް ލަނޑު ކާމިޔާބުކޮށްފައެވެ.

މުބާރާތުގެ ސެމީފައިނަލުގައި މިމަހުގެ ފަސްވަނަ ދުވަހު މޮރޮކޯ އިން ނުކުންނާނީ ކުއާޓާ ފައިނަލުގައި 3-0 ގެ ނަތީޖައަކުން ޖަޕާން ބަލިކޮށް ސެމީފައިނަލުން ޖާގަ ހޯދި ސްޕެއިނާއި ދެކޮޅަށެވެ.