އެންމެންނަށް ހުޅުވާލައިގެން "ލައިފް އިންޝުއަރަންސްގެ" މައުލޫމާތު ދޭ ސެޝަނެއް؛ ބައިވެރިވުން ހިލޭ

ލައިފް އިންޝުއަރަންސް އަށް ހާއްސަ މައުލޫމާތު ސެޝަނެއް ކުރިޔަށްގެންދިޔުމަށް އެލައިޑް އިންޝުއަރަންސާއި ކްލިކް ކޮލެޖް ގުޅިގެން ތައްޔާރުވެއްޖެއެވެ.

މުޅިން ހިލޭ ބައިވެރިވެވޭ މިސެޝަން ބޭއްވުމަށް ހަމަޖެހިފައިވަނީ 3 އޮގަސްޓްގެ 2000-2200 އަށް ކަމަށް އެލައިޑުން މައުލޫމާތު ދެއެވެ.

މިސެޝަންގައި ބައިވެރިވުމުގެ ފުރުސަތު އެއްވެސް ޝަރުތަކާއި ނުލާހުޅުވާލާފައިވާއިރު، ބައިވެރިވާން ބޭނުންވާ ހުރިހާ ފަރާތްތަކުން މި ލިންކް ގައިވާ ފޯމް ފުރިހަމަ ކުރުމަށް އެދިފައިވެއެވެ.

މައުލޫމާތު ސެޝަން އާއި ގުޅޭގޮތުން އެލައިޑުން މައުލޫމާތު ދެމުން ފާހަގަކުރި ގޮތުގައި ދިރިއުޅުމުގައި ހާސިލްކުރަން ބޭނުންވާ ލަނޑުދަނޑިތަކަށް ވާސިލުވުމަށް ލައިފް އިންޝުއަރަންސް އެހީތެރިކަން ހޯދުން ބުއްދިވެރިއެވެ.

ސަބަބަކީ ލައިފް އިންޝުއަރަންސް ޕްލޭންސްތަކުގައި ހިމެނޭ ސޭވިންގ އަދި ޕްރޮޓެކްޝަން އެލިމެންޓު މެދުވެރިކޮށް ދިރިއުޅުމުގެ ކޮންމެ ހަރުފަތެއްވެސް ގިރާކުރުމަށް އިތުރު ބާރެއް ލިބިގެންދިޔުމެވެ. އަދި ކުރިމަތިވެދާނެ ހާލަތަކަށް އަބަދުވެސް ރައްކާތެރިވެ ތިބުމެވެ.

އެގޮތުން މައުލޫމާތު ސެޝަން ހާއްސަ ކުރާނެ ޕްލޭންތަކުގެ ތެރޭގައި އަންހެން ކަނބަލުންނަށް ޚާއްސަ ކަމަނަ ޕްލޭން އަދި ދަރިފުޅުގެ ސާނަވީ ތަޢުލީމުން ފެށިގެން މަތީ ތަޢުލީމު ޙާސިލްކުރުމަށް އަހީތެރިވެދޭ ސެކަންޑްރީ ސްކޫލް އެކްސްޕެންސަސް ހިމެނޭކަން އެލައިޑުން ފާހަގަކުރެއެވެ.

މީގެ އިތުރުން ވެސް ދިރިއުޅުން ބައްޓަން ކުރުމަށް އެހީވާނެ ފަދަ ތަފާތު ޕްލޭންތަކުގެ މަޢުލޫމާތު މިސެޝަންގައި ހިއްސާ ކުރާނެ ކަމަށާ، ލައިފް އިންޝުއަރަންސަށް ހާއްސަ އެކްސްޕަރޓުންގެ އެހީތެރިކަމާއި އެކު އެމީހެއްގެ ހަރަދުތަކާއި އާމްދަނީއަށް ފެތޭ ޕްލޭނެއް ކަސްޓަމައިޒް ކުރުމުގެ ފުރުސަތުވެސް ސެޝަން ތެރެއިން ހަމަޖެހިފައިވާނެ ކަމުގައި އެލައިޑުން މައުލޫމާތު ދެއެވެ.