އެލައިޑް އިންޝުއަރެންސާއި ސީއޭ މޯލްޑިވްސް ގުޅިގެން މެންބަރުންނަށް ޚާއްޞަ ފައިދާތައް ފޯރުކޮށްދިނުމަށް އެއްބަސްވުމުގައި ސޮއިކޮށްފި

ރާއްޖޭގެ އެކައުންޓެންސީ ދާއިރާ ހަރުދަނާކޮށް ކުރިއެރުވުމަށާއި، އެ ދާއިރާގައި މަސައްކަތްކުރާ ފަންނީ ފަރާތްތަކަށް ހާއްސަ ފުރުސަތުތަކެއް ފަހިކޮށްދިނުމުގެ ގޮތުން އެލައިޑް އިންޝުއަރެންސް ކޮމްޕެނީ އޮފް ދަ މޯލްޑިވްސް އާއި އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސް (ސީއޭ މޯލްޑިވްސް) އާ ދެމެދު މިއަދު ފަހުމުނާމާއެއްގައި ސޮއިކޮށްފިއެވެ.

މި އެއްބަސްވުމުގެ މައިގަނޑު މަގްސަދަކީ ދެ ފަރާތް ގުޅިގެން އެކައުންޓެންސީ ދާއިރާގެ ފަންނީ ތަރައްގީއަށް މަސައްކަތްކުރުމާއި، މަޢުލޫމާތާއި ތަޖުރިބާ ބަދަލުކުރުމުގެ އިތުރުން ސީއޭ މޯލްޑިވްސްގެ މެންބަރުންނަށް ލިބޭ މަންފާތައް އިތުރުކުރުމެވެ. މީގެ އިތުރުން، ދާއިރާގެ ނަޒާހަތްތެރިކަން ދެމެހެއްޓުމާއި، މާލީ ދެފުށް ފެންނަކަން އިތުރުކުރުމާއި، ރާއްޖޭގެ މާލީ ދާއިރާގެ ކުރިއެރުމަށް ބޭނުންވާ މުހިންމު ދިރާސާތައް ގުޅިގެން ކުރުމަށް ވެސް މި އެއްބަސްވުމުގައި ވަނީ ހިމަނާފައެވެ.

މި އެއްބަސްވުމުގެ ދަށުން، އެލައިޑް އިންޝުއަރެންސްގައި މަސައްކަތްކުރާ މުވައްޒަފުންގެ ތެރެއިން ޝަރުތު ހަމަވާ ފަރާތްތައް ސީއޭ މޯލްޑިވްސްގެ މެންބަރަކަށް ވުމަށް ބާރުއެޅުމާއި، އެކައުންޓެންސީ ދާއިރާގެ މީހުން ބިނާކުރުމަށް ގުޅިގެން މަސައްކަތް ކުރުމަށް ވަނީ ނިންމާފައެވެ.

މި ފަހުމުނާމާގެ ސަބަބުން ސީއޭ މޯލްޑިވްސްގެ މެންބަރުންނަށް ގިނަގުނަ އިނާޔަތްތަކެއް ލިބިގެންދާނެއެވެ. އެގޮތުން، އެކައުންޓެންސީ ދާއިރާގެ ލައިސަންސް ހޯދުމަށް ބޭނުންވާ 'ޕްރޮފެޝަނަލް އިންޑެމްނިޓީ ތަކާފުލް' ހާއްސަ އަގުތަކެއްގައި ލިބޭނެ އިންތިޒާމާއި، ލިޔެކިޔުންތައް ހުށަހެޅުމުގައި ލުއި ފަސޭހަ ގޮތްތަކެއް ހަމަޖެހިގެންދާނެއެވެ. މީގެ އިތުރުން، ސީއޭ މޯލްޑިވްސްގެ މެންބަރުންނާއި ދާއިމީ މުވައްޒަފުންނަށް 'ގްރޫޕް ހެލްތު ތަކާފުލް' އަދި 'ގްރޫޕް ޓާމް ލައިފް ތަކާފުލް' ގެ ހިދުމަތް ވެސް ހާއްސަ އުސޫލެއްގެ ދަށުން ފޯރުކޮށްދިނުމަށް ވަނީ ހަމަޖެހިފައެވެ.

މި އިސްނެގުމަކީ ރާއްޖޭގެ މާލީ ދާއިރާ އިތުރަށް ހަރުދަނާކޮށް، ބައިނަލްއަގުވާމީ މިންގަނޑުތަކަށް ފެތޭ ފަދަ ދެފުށް ފެންނަ ނިޒާމެއް ބިނާކުރުމަށް އެލައިޑާއި ސީއޭ މޯލްޑިވްސް އިން ކުރާ މަސައްކަތުގެ މުހިންމު ފިޔަވަޅެކެވެ. މީގެ ސަބަބުން ދާއިރާގެ ފަންނީ ފެންވަރު މަތިވެ، މާލީ އިދާރާތަކަށް އޮންނަ އިތުބާރު ބޮޑުވެގެންދާނެ ކަމަށް ދެ ފަރާތުން ވެސް ގަބޫލުކުރެއެވެ.