11 ވަނަ އައިއެފްއެފްއެސްއޭ އެވޯޑްސްގައި އެލައިޑް އިންޝުއަރެންސްއަށް ޝަރަފުވެރި ދެ އެވޯޑެއް ލިބިއްޖެ
11 ވަނަ އިސްލާމިކް ފައިނޭންސް ފޯރަމް އޮފް ސައުތު އޭޝިއާ (އައިއެފްއެފްއެސްއޭ) އެވޯޑްސް 2026 ގައި އެލައިޑް އިންޝުއަރެންސްއިން ދެ އެވޯޑެއް ކާމިޔާބުކޮށްފިއެވެ.
މި ރަސްމިއްޔާތުގައި އެލައިޑްގެ އިސްލާމިކް ވިންޑޯ ކަމަށްވާ "އެލައިޑް ތަކާފުލް" އަށް "އިސްލާމިކް ފައިނޭންސް އެންޓިޓީ އޮފް ދަ އިއަރ" އެވޯޑް ލިބިފައިވާއިރު، "ކަމަނާ ތަކާފުލް" އަށް ވަނީ "އިސްލާމިކް ފައިނޭންސް ޕްރޮޑަކްޓް އޮފް ދަ އިއަރ" އެވޯޑް ލިބިފައެވެ.
މި އެވޯޑް ދިނުމުގެ ރަސްމިއްޔާތު ބޭއްވުނީ 2026 އޮކްޓޫބަރު 20 ވީ އަންގާރަ ދުވަހު، ސްރީލަންކާގެ ކޮލަމްބޯގައި ހުންނަ ޝަންގްރީ-ލާ ހޯޓަލުގައެވެ. "ބިލްޑިންގ ލެގަސީސް" މި ޝިއާރުގެ ދަށުން ޔޫޓީއޯ އެޑިއުކޮންސަލްޓުން އިންތިޒާމުކުރި މި ހަފްލާގައި ސަރަހައްދީ މާލީ އިދާރާތަކާއި، ދާއިރާގެ ފަންނީ ބޭފުޅުންނާއި މުހިންމު ހިއްސާދާރުން ބައިވެރިވެ، ދެކުނު އޭޝިއާގެ އިސްލާމިކް ބޭންކިންގ އަދި ފައިނޭންސް ދާއިރާއިން ހޯދާފައިވާ ފާހަގަކޮށްލެވޭ ކާމިޔާބީތައް ފާހަގަކޮށްފައިވެއެވެ.
މި އެވޯޑުތަކަކީ އެލައިޑްގެ މެނޭޖްމަންޓުން 2025 ވަނަ އަހަރުގެ ތެރޭގައި އެކުންފުނީގެ ތަކާފުލް ވިޔަފާރި ފުޅާކޮށް ކުރިއެރުވުމަށްޓަކައި އަޅާފައިވާ މުހިންމު ފިޔަވަޅުތަކުގެ ނަތީޖާއެކެވެ. މީގެ ތެރޭގައި ހިމެނޭ އެންމެ މުހިންމު އެއް ނިންމުމަކީ އާންމު ލައިފް އިންޝުއަރެންސް ވިއްކުން ހުއްޓާލައި، އޭގެ ބަދަލުގައި ދިރިއުޅުމުގެ ރައްކާތެރިކަމަށްޓަކައި "ފެމިލީ ތަކާފުލް" ތައާރަފުކުރުމެވެ.
މީގެ އިތުރުން، އެލައިޑްގެ ޑިޖިޓަލް ވަސީލަތްތަކުން ތަކާފުލްގެ ހިދުމަތްތަކަށް ދެވޭ ސަމާލުކަން އިތުރުކުރުމުގެ ގޮތުން، އެލައިޑް އެޕް މެދުވެރިކޮށް އާ ކަސްޓަމަރުންނަށް އާންމު އިންޝުއަރެންސް އޮޕްޝަންތައް އުނިކޮށް، އެ ފަރާތްތަކަށް ހަމައެކަނި ތަކާފުލްގެ ހިދުމަތްތައް ފެންނާނެހެން ވަނީ ބަދަލުުގެނެސްފައެވެ.
މިފަދަ އިސްނެގުންތަކާއި، މާކެޓިންގ ހަރަކާތްތަކާއި، ކަސްޓަމަރުން ހޭލުންތެރިކުރުމާއި، ރާއްޖޭގެ ބޮޑެތި ރަށްތަކުގައި ހިންގުނު އިޖުތިމާއީ ހަރަކާތްތަކުގެ ސަބަބުން 2024 އިން 2025 އަށް ތަކާފުލްއިން ލިބުނު އާމްދަނީ ބޮޑުތަނުން ވަނީ އިތުރުވެފައެވެ. އެލައިޑް ތަކާފުލް އަދި ކަމަނާ ތަކާފުލް އަށް ލިބުނު މި ބައިނަލްއަގުވާމީ ކާމިޔާބީން ރަމްޒުކޮށްދެނީ ތަކާފުލްގެ ހިދުމަތްތައް ފުޅާކުރުމަށާއި، އާންމުން ހޭލުންތެރިކުރުމަށާއި، ރާއްޖޭގެ އިސްލާމިކް ފައިނޭންސް ދާއިރާ ކުރިއެރުވުމަށް އެލައިޑުން ދެމުންދާ އިސްކަމެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
