ތުރްކިޔޭގެ ދެކުނަށް އަނެއްކާވެސް ބިންހެލުމެއް

6.4 މެގްނިޓިޔުޓްގެ ބާރުމިނުގައި ތުރްކިޔޭގެ ދެކުނަށް އަނެއްކާވެސް ބިންހެލުމެއް އަތުވެއްޖެއެވެ.

މި ބިންހެލުން އައި ސަރަހައްދަކީ ތުރްކިޔޭ އާއި ސީރިޔާ ގުޅޭ ބޯޑަރު ހިމެނޭ ސަރަހައްދެވެ. ޔޫރަޕިއަން މެޑިޓޭރިއަމް ސެސިމޮލޮޖިކަލް ސެންޓަރ އިން ބުނެފައިފައިވަނީ ތުރްކިޔޭގެ ހަޓޭޔާ ޕްރޮވިންސަށް އަސަރުކުރި މި ބިންހެލުން އައިސް ފައިވަނީ އެ ޕްރްވިންސްގެ ބިމުގެ އަޑިން 2ކިލޯމީޓަރުގެ އަޑިއަށް ކަމަށެވެ.

ބިންހެލުން އައިސްފައިވަނީ ޖީއެމްޓީ ގަޑިން 17:04 ގައެވެ. އަދި ބިންހެލުމުގެ އިހްސާސް އަންޓާކްޔާ އަދި އަދާނާ ޕްރޮވިންސްއިން ވަރަށް ބޮޑަށް ކޮށްފައިވެއެވެ. އޭގެ ވަގުތު ކޮޅެއް ފަހުން 5.8 މެގްނިޓިޔުޓްގެ ބިންހެލުމެއްގެ އިހުސާސް ހަޓޭޔާ ޕްރޮވިންސްގެ ސަމަންދަގް ޑިސްޓްރިކް އިން  ވަނީ ކޮށްފައެވެ.

މަންޒަރު ދުށް މީހުން އަލްޖަޒީރާއަށް ބުނެފައިވަނީ ތުރްކިޔޭގެ ރެސްކިޔު ޓީމްތަކުން ވަނީ ހޭލަމޭލައަށް ދުވަން ފަށައިފައިކަމަށެވެ. މީހުން ތިބީ ހެޔޮ ހާލުގައި ތޯ ބެލުމަށް ރެސްކިޔު ވޯކަރުން ކޮޅު ކޮޅުމައްޗަށް ދުވެ ހެދިކަމަށް ބުނެފައިވެއެވެ.

އެހިސާބުގެ ރައްޔިތެއް ކަމަށްވާ މޮނާ އަލް އޮމަރް ބުނެފައިވަނީ އޭނާ އޭރު ހުރީ ވަގުތީ ހިޔާގެ ގޮތުގައި ހަދައިފައި ހުރި ޓެންޓް ތެރޭގައި ކަމަށެވެ.

"އަހަރެން ހީކުރީ އަހަރެންގެ ފައިދަށުން ބިންގަނޑު ދެފަޅި ވަނީ ކަމަށް، އަދިވެސް އިތުރު ހެލުންތައް އަންނާނެތަ" 7 އަހަރުގެ ދަރިފުޅު އުނގުގައި ބަހައްޓައިގެން ރޮމުން މޮނާ ސުވާލުކުރިއެވެ.

ފެބްރުއަރީ 6 ވަނަ ދުވަހު ތުރްކިޔޭ އާއި ސީރިޔާއަށް އައި ބިންހެލުން ތަކުގައި 47،000 މީހުން ވަނީ މަރުވެފައެވެ. އަދި ވެސް އެކާރިސާގައި ގެއްލުނު މީހުން ހޯދައި ނުނިމެއެވެ.