މުޒާހަރާ ހަލަބޮލިކުރީ ސަރުކާރުން ފޮނުވި ގޭންގަކުން، ފުލުހުން އަނިޔާކުރުން ކުށްވެރިކުރަން: އިދިކޮޅު

ވާދަވެރި ސިޔާސީ ލީޑަރު ރައީސް އަބްދުالله ޔާމީން އަބްދުލްގައްޔޫމު މިނިވަންކުރުމަށް ގޮވާލާ އިދިކޮޅުން ހޯމަ ދުވަހުގެ ރޭ މާލޭގައި ކުރިއަށް ގެންދިޔަ ސުލްހަވެރި ހަރަކާތުގެ ތެރެއަށް ވަދެ ހަމަނުޖެހުން އުފައްދާ، މުޒާހަރާ ހަލަބޮލިކުރީ ސަރުކާރުން ފޮނުވި ގޭންގަކުން ކަމަށް ޕްރޮގްރެސިވް ކޮންގްރެސް ކޯލިޝަން (އިދިކޮޅުން) ބުނެފި އެވެ.

އިދިކޮޅުން ހޯމަދުވަހުގެ ރޭ މާލޭގައި ކުރި މުޒާހަރާ ހުއްޓުވުމަށް ފުލުހުން ވަނީ ބާރުގެ ބޭނުންކޮށްފަ އެވެ. އަދި މީހުންގެ ތެރެއަށް ޕެޕާ ސްޕްރޭ ޖެހުމުގެ ސަބަބުން، ގިނަ ބަޔަކަށް އަނިޔާވެ ބައެއް ފަރާތްތަކަށް ހޮސްޕިޓަލުގައި ފަރުވާ ވެސް ދޭން ޖެހުނެވެ.

ފުލުހުންގެ އަމަލުތައް ކުށްވެރިކޮށް އިދިކޮޅުން ވަނީ ބަޔާނެއް ވެސް ނެރެފައެވެ.

އެގޮތުން އިދިކޮޅުގެ ބަޔާނުގައި ބުނެފައިވަނީ ސުލްޙަވެރިކަމާއެކު ދިވެހި ރައްޔިތުން ކުރިއަށް ގެންދިޔަ އިޙުތިޖާޖު ހަލަބޮލިކުރުމަށް ސަރުކާރުން ފޮނުވި ގޭންގަކުން އިޙުތިޖާޖުގެ ބައިވެރިންގެ ތެރެއަށް ފުޅި އުކާ، ސަރުކާރުގެ އެންގުމަށް ފުލުހުން ހާލަތާއި ނުބައްދަލު ބާރުގެ ބޭނުންކޮށް، އިޙުތިޖާޖުގެ ބައިވެރިންގެ މޫނަށާއި އަނގައަށް އަމާޒުކޮށް ޕެޕަރ ސްޕްރޭ ޖެހުން އެންމެ ހަރުކަށި އިބާރާތުން ކުށްވެރިކުރާ ކަމަށެވެ.

ރޭގެ އިޙުތިޖާޖުގެ ތެރޭގައި ޕިޕީއެމްގެ ސެނެޓަރ އަދި ފަރެސްމާތޮޑާ ދާއިރާގެ މެންބަރު ޙުސައިން މުޙައްމަދު ލަޠީފްގެ މޫނަށާއި އަނގައަށް އަމާޒުކޮށް ޕެޕަރ ސްޕްރޭ ޖެހުމުން، ނެވާއަށް އުނދަގޫވެ ހާސްވުމުގެ ސަބަބުން އެބޭފުޅާއަށް ހޮސްޕިޓަލުގައި އެޑްމިޓްކޮށްގެން ފަރުވާދޭން ޖެހުނުކަމަށާއި، ޕީޕީއެމްގެ ސެނެޓަރ މިކޯލިޝަންގެ ޙަރަކާތު ކޮމިޓިގެ ޗެއަރ މުޙައްމަދު އިސްމާޢީލްގެ ލޮލަށް އަމާޒުކޮށް ޕެޕަރ ސްޕްރޭ ޖުހުމުން ލޯލަށް ނުފެންނަ ވަރަށް ލޯ ދުޅަވެފައިވާކަމަށް އިދިކޮޅުން ވަނީ ބުނެފަ އެވެ.

އޭގެ އިތުރުން މީޑިއާ ފާސް އަޅުއްވައިގެން ތިއްބެވި ނޫސްވެރިންނަށް އަމާޒުކޮށް ޕެޕަރ ސްޕރޭ ޖަހާ ނޫސްވެރިން ގެންގުޅުނު އަގުބޮޑު ސާމާނަށްވެސް ފުލުހުން ގަސްތުގައި ގެއްލުން ދިނުމާއި ސުލްޙަވެރިކަމާއެކު ތިއްބެވި ބައިވެރިންގެ މޫނަށާއި އަނގަޔަށް ޢަމާޒުކޮށް ޕެޕަރ ސްޕްރޭ ޖަހާ އަނިޔާދީފައިވާކަން ވެސް އިދިކޮޅުން ފާހަގަކޮށްފައި ވެއެވެ.

އިދިކޮޅުން ބުނީ އްސަ އެހީއަށް ބޭނުންވާ ފަރާތަކަށާއި އަންހެނުންނަށާއި އިސް ރަށްވެހިންނަށްވެސް އެއްވެސް ބެލުމެއް ނެތި އަނިޔާވެރިވުމަކީ މިހާރަކަށްއައިސް ފުލުހުންގެ ކިބައިން ފެންނަމުންދާ ވަރަށްވެސް ދަށު ދަރަޖައިގެ އަމަލުތަކެއް ކަމަށެވެ.

ފުލުހުން ވަނީ ދިވެހި ރައްޔިތުންނަށް އަނިޔާވެރިވުމުގައި ހައްދުފަހަނަ އަޅާދިޔައީ، އެފަދަ ލާއިންސާނީ ޢަމަލުތައް ހުއްޓުވުމުގެ ޤާނޫނީ ޒިންމާ ޙަވާލުކުރެވިފައިވާ މުއައްސަސާތަކުން އެފަރާތްތަކާއި ޤާނޫނުއަސާސީއާއި ޤާނޫނުތަކުން ޙަވާލުކުރެވިފައިވާ ޒިންމާ އަދާ ކުރުމަށް ފަސްޖެހޭތީކަމަށް އިދިކޮޅުން ބުނެފައިވެއެވެ.

އެއާއެކު އިދިކޮޅުން ވަނީ އެކަންކަން ހުއްޓުވުމުގެ ޤާނޫނީ ޒިންމާ ޙަވާލުވެފައިވާ މުއައްސަސާތަކުން މިކަންކަމަށް ދޭންވާ ސަމާލުކަން ދިނުމަށާއި އަދި އަޅަންޖެހޭ ފިޔަވަޅުތައް އެޅުމުގައި ފަސް ނުޖެހުމަށް ނަސޭހަތްތެރިވެ، އެ މައްސަލަތައް ބަލައިދިނުމަށް ކަމާ ގުޅުންހުރި މުއައްސަސާތަކަށް ގޮވާލައްވާފަ އެވެ.