ރައީސް ޑރ. މުޢިއްޒުގެ އަމާޒަކީ ރާއްޖެއަށް ސްޕޯޓްސް ޓޫރިޒަމް ތަޢާރަފް ކުރެއްވުން: ސަޢީދު

ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ އަމާޒަކީ ދިވެހިރާއްޖެއަށް ސްޕޯޓްސް ޓޫރިޒަމް ތަޢާރަފް ކުރެއްވުން ކަމަށް، ސަރުކާރުގެ އިކޮނަމިކް މިނިސްޓަރު މުހައްމަދު ސަޢީދު ވިދާޅުވެއްޖެއެވެ.

ރައީސް މުޢިއްޒު އެކުލަވާލައްވާފައިވާ ވިޒިޓަރ އިކޮނަމިކް ކައުންސިލުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ސަޢީދު ވިދާޅުވީ، ދިވެހިރާއްޖޭގެ އިގްތިސާދު ހަމައެކަނި އެއް ކަމަކަށް ބަރޯސާ ނުކުރުމަށްޓަކައި ރައީސް މުޢިއްޒު ރާވަވާފައިވާ ކަންކަމުގެ ތެރޭގައި، ފަތުރުވެރިކަމުގެ އިތުރު ސިނާއަތްތައް ތަޢާރަފް ކުރެއްވުމާއި، ފަތުރުވެރިކަމުގެ ތެރެއިންވެސް އެ ސިނާޢަތް ފުޅާކުރެއްވުން ހިމެނޭ ކަމަށެވެ.

އަދި އެމަނިކުފާނު އުފައްދަވާފައިވާ ވިޒިޓަރ އިކޮނަމިކް ކައުންސިލަކީ ދުރު ރާސްތާއާއި، މެދު ރާސްތާގެ އިތުރުން ކުރު ރާސްތާއަށް އަމާޒުކޮށްގެން، ވަކި ކަންކަން ހާސިލް ކުރުމަށް އަމާޒު ހިފައި، އެކަންކަން ތަންފީޒުކުރުމަށް މިނިސްޓްރީ ތަކާއި އެޖެންސީތަކަށް ފޯރުކޮށްދިނުމަށް މަސައްކަތްކުރާ ކައުންސިލެއް ކަމަށެވެ.

މީގެ އިތުރުން ރާއްޖޭގެ އަދުގެ އިގްތިސާދީ ހާލަތަށް ނަޒަރު ހިންގަވާ ލައްވަމުން ސަޢީދު ވިދާޅުވީ، މިވަގުތު ރާއްޖޭގެ ޖީޑީޕީއަކީ ގާތްގަނޑަކަށް 6 ބިލިއަން އެމެރިކާ ޑޮލަރު ކަމަށާ، އޭގެ ތެރެއިންވެސް 4.5 ބިލިއަނަކީ ފަތުރުވެރިކަމުގެ ދާއިރާއިން ވަންނަ ޖީޑީޕީ ކަމަށެވެ.

"މީގައި ވަރަށް ކުރު ރާސްތާގެ ޓާގެޓެއް އެބައޮތް، ރައީސް ގެވެސް، 6 ބިލިއަން އެމެރިކާ ޑޮލަރަށް ޓުއަރިޒަމް ރެވެނިއު ޖެއްސުން. އެއީ މިހާރުގެ ޓޯޓަލް ޖީޑީޕީ ހަމައެކަނި ޓޫރިޒަމް ސެކްޓާއަށް ޓާގެޓް ކޮށްފައި ޕުޝްކޮށްލުން. އެހެންވީމާ އެހެން ސެކްޓާ ތަކާ އެކު ވަރަށް ބޮޑަށް ކުރިއަރައިގެން ދާނެ."

އިކޮނަމިކް މިނިސްޓަރު މުހައްމަދު ސަޢީދު

ސަޢީދު އިތުރަށް ވިދާޅުވީ ވިޒިޓަރ އިކޮނޮމީ މޮޑެލް އަކީ ދުނިޔޭގެ ގިނަ ގައުމުތަކުގައިވެސް ވަރަށް އަމަލުކުރަމުންދާ މޮޑެލްއެއް ކަމަށެވެ. އެގޮތުން ދުބައިއާއި ސައުދީ އަރަބިއްޔާގައި އެ މޮޑެލް ފުޅާ ދާއިރާއެއްގައި ބޭނުންކުރަމުންދާ ކަމަށެވެ. އަދި އެ ތަޖުރިބާގެ އަލީގައި ރާއްޖޭގައިވެސް ކަންކަން ކުރުމަށް ސަރުކާރުން ވިސްނާފައިވާ ކަމަށް ވިދާޅުވި އެވެ.

"މިސާލަކަށް ސްޕޯޓްސް ގެ ދާއީރާއިން. ރައީސުލްޖުމްހޫރިއްޔާ ބޭނުންފުޅުއެބަވޭ ސްޕޯޓްސް ޓޫރިޒަމް ތަޢާރަފްކުރަން. އެއީ ޑރ. މުޢިއްޒުގެ ވަރަށް ބޮޑު ވިޝަން އެއް."

އިކޮނަމިކް މިނިސްޓަރު މުހައްމަދު ސަޢީދު

"އެގޮތުން، މިހާރުވެސް ޓޫރިޒަމަށް އިންވެސްޓްކުރާ ފަދައިން ފިޒިއޮތެރަޕީ އަށް، ރީހެބިލިޓޭޝަން މެޑިސިންއަށް މިސާލަކަށް އިންވެސްޓް ކުރަނީ، ކުރާއިރު، ހަމަ (ބޭރުގެ) ބޮޑެތި ކުލަބްތައް ރަނގަޅު އިންޝުއަރެންސް އާއެކު ޓައި ކުރެވިއްޖެއްޔާ، އެމީހުންގެ އޮފް ޕީކުގައި، ރާއްޖެ ޗޫސް ނުކުރަންވީ ސަބަބެއް ނެތް. އެއީ ފެމިލީގެ އެހެން ބޭފުޅުންނަށް ރާއްޖެ އައިސް ބީޗުގައިވެސް އުޅެވޭނެ. އެހެންވީމާ ސްޕޯޓްސް ޓޫރިޒަމް ރައީސް ވަރަށް ބޮޑަށް ބޭނުންފުޅުވޭ ތަޢާރަފް ކުރަން." ސަޢީދު ވިދާޅުވިއެވެ.

ސްޕޯޓްސް ޓޫރިޒަމް ރާއްޖެއަށް ތަޢާރަފް ކުރުމުގެ މަޝްވަރާތަކެއް ފެށިފައިވީ ނަމަވެސް އެކަމުގެ މާބޮޑު ތަފްސީލް އަދި ހާމަކޮށްފައެއް ނުވެއެވެ. ސައީދު ވިދާޅުވީ މަސައްކަތް ކުރިއަށްދާ މިންވަރަކުން އިތުރު ތަފްސީލް ކުރިއަށް އޮތް ތަނުގައި ދެއްވާނެ ކަމަށެވެ.