ގޯތި މަޝްރޫއު ރިވިއު ކުރަނީ ކުރީ ސަރުކާރުގެ ނިޔަތާއި މެދު ސުވާލު އުފެދޭތީ: މިނިސްޓަރު

ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުން ފެށި ބިންވެރިޔާ ސްކީމާއި، ގެދޮރުވެރިޔާ ސްކީމުގެ ދަށުން ގޯއްޗާއި ފްލެޓު ލިބުނު ފަރާތްތަކުގެ ލިސްޓު ރީ-އިވެލުއޭޓުކުރަން ނިންމީ އިންތިގާލީ މަރުހަލާގައި އަވަސް އަރުވާލައިގެން އެކަން ކުރުމުން އެ ސަރުކާރުގެ ނިޔަތާއި މެދު ސުވާލު އުފެދޭތީ ކަމަށް ހައުސިން މިނިސްޓަރު ޑރ. ޢަލީ ހައިދަރު އަޙްމަދު ވިދާޅުވެއްޖެ އެވެ.

ހައުސިން މިނިސްޓްރީން ބޭއްވި ޕްރެސް ކޮންފަރެންސްގައި ނޫސްވެރިން ވަނީ ކުރީ ސަރުކާރުން ދޫކޮށްފައިވާ އެއްވެސް ފްލެޓެއް ނުވަތަ ގޯއްޗެއް އަތުނުލާނެ ކަމަށާއި، އެފަދަ މަޝްރޫއަކަށް އަލުން އެޕްލައި ކުރަން ވެސް ނުޖެހޭނެކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެފައި ވާއިރު، އެ ނިންމުމަށް ބަދަލު ގެނެސް އެ ދެ މަޝްރޫއު ރީ-އިވެލުއޭޓު ކުރާ ސަބަބާއި ގުޅޭގޮތުން މިނިސްޓަރާއި ސުވާލުކޮށްފަ އެވެ.

އެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ ރައީސުލްޖުމްހޫރިއްޔާ އޭރު ވެސް ވިދާޅުވި ގޮތަށް، ކުރީ ސަރުކާރުން ގޯއްޗެއް ނުވަތަ ފްލެޓެއް ދީފައިވާ ފަރާތެއްގެ އަތުން ގަސްދުގައި އެ ތަންތަން އަތުނުލާނެކަމުގެ ޔަގީންކަން ދެއްވާކަމަށް ވިދާޅުވެފަ އެވެ.

އެހެން ނަމަވެސް ސަރުކާރުގެ ފަހުކޮޅު ފެށި ގެދޮރުވެރިޔާ މަޝްރޫއާއި ބިންވެރިޔާ ސްކީމު ރީ-އިވެލުއޭޓު ކުރުމަށް ނިންމީ، އިންތިގާލީ މަރުހަލާގައި އަވަސް އަރުވާލައިގެން ކުރީ ސަރުކާރުން ގޯއްޗާއި ފްލެޓުތައް ބެހުމުގެ މަޝްރޫއު ކުރިއަށް ގެންދިއުމުން، އެ ސަރުކާރުގެ ނިޔަތާއި ދޭތެރޭ ސުވާލު އުފެދޭތީކަމަށް މިނިސްޓަރު ވިދާޅުވި އެވެ.

"އިންތިޚާބު ވެވަޑައިގަތުމަށްފަހު ރައީސް (ޑރ މުއިއްޒު) އިލްތިމާސް ކުރެއްވި އޭރުގެ ސަރުކާރަށް އެ މަސައްކަތް މަޑުޖައްސާލެއްވުމަށް. އެކަމަކު އެ މަޑުޖައްސާ ނުލެއްވީ ކީއްވެގެންތޯ، މަޑުޖައްސާލެއްވި ނަމަކަ މިހާ ހިސާބަކަށް ނައިސް، ފްލެޓުތަކެއް ހަދާފައި ހުރިކަމަށް ވާނަމަ، ހައްގުވާ މީހުން ހޯދައިގެން މި ސަރުކާރުން ވެސް ފެލްޓުތައް ހަވާލުކުރާނެ. އަވަސް އަރުވާލައިގެން އެ ކަންތައް އެގޮތަށް ކުރީމަ، އުފެދޭ ސުވާލުތަކެއް ވެސް އެބަހުރި. ކީއްވެގެންތޯ އެހާ އަވަހަކަށް އެ ކަންތައްތައް ކުރަން ބޭނުންވީ"

ހައުސިން މިނިސްޓަރު ޑރ ހައިދަރު

ވަކިން ޚާއްސަކޮށް ގެދޮރުވެރިޔާ ސްކީމުގެ ދަށުން ފްލެޓު ލިބޭ 4000 މީހުންގެ ލިސްޓު ނުނެރެ މަޑުކޮށްލުމަށް އެންޓި ކޮރަޕްޝަން ކޮމިޝަނުން ވެސް އަންގާފައި ވަނިކޮށް، އެއިން އެއްވެސް ކަމަކަށް ބެލުމެއް ނެތި ސަރުކާރުން ލިސްޓު އެކުލަވާލުމުން ރައްޔިތުންގެ ވެސް ބޮޑެތި ކަންބޮޑުވުންތަކެއް ހުރިކަން މިނިސްޓަރު ފާހަގަކުރެއްވި އެވެ.

އެއާއެކު މިނިސްޓަރު ވިދާޅުވީ މަޝްރޫއު ރީ-އިވެލުއޭޓު ކުރި ނަމަވެސް، އެންމެ ހައްގުވެރި ފަރާތްތައް ހޯދާ، އެ ފަރާތްތަކަށް ފްލެޓު ދިނުމުގެ މަސައްކަތް ކުރައްވަމުން ގެންދަވާނެ ކަމަށެވެ.