ރައީސްއާއި ވަޒީރުންނަށް ލިބޭ މުސާރައިގެ ކުރިއެރުން އިޖުތިމާޢީ ފަންޑަކަށް ހަދިޔާ ކުރަން ނިންމައިފި!

ރައީސުލްޖުމްހޫރިއްޔާ އާއި ނާއިބު ރައީސް އަދި ސަރުކާރުގެ ވަޒީރުންގެ މުސާރަ ބޮޑުކުރުމަށް އެމްޑީޕީ މެޖޯރިޓީ އޮންނަ މާލިއްޔަތު ކޮމިޓީން އިއްޔެ ނިންމި ނިންމުމާއިއެކު މުސާރައަށް ލިބޭ ކުރިއެރުން، އިޖުތިމާޢީ ފަންޑަކަށް ހަދިޔާ ކުރަން ރައީސުލްޖުމުހޫރިއްޔާ ޑރ މުހައްމަދު މުޢިއްޒާއި ސަރުކާރުގެ އިސްވެރިން ނިންމަވައިފިއެވެ.

ރައީސުލްޖުމްހޫރިއްޔާ އާއި ނާއިބު ރައީސް އާއި ވަޒީރުންގެ މުސާރަ ބޮޑު ކުރަން އިއްޔެ މާލިއްޔަތު ކޮމިޓީން ފާސް ކުރުމާއި ގުޅިގެން، ރައީސް މުޢިއްޒު ކުރެއްވި ޓްވީޓެއްގައި ވިދާޅުވީ، އެ ނިންމެވުމަކީ ސަރުކާރުން އެދިގެން ނިންމަވާފައިވާ ނިންމެވުމެއް ނޫން ކަމަށެވެ.

އަދި މުސާރަ ބޮޑު ކުރާން ބޭނުންވެސް ނުވާ ކަމަށް އެމަނިކުފާނު ވަނީ ވިދާޅުވެފަ އެވެ.

އެއްވެސް މަޝްވަރާ ކުރުމެއްނެތި މި ގެނައި ބަދަލުގެ ސަބަބުން ލިބޭ މުސާރައިގެ ކުރިއެރުން ކުޑަކުދިންގެ ހިޔާ ފަދަ އިޖުތިމާޢީ ފަންޑަކަށް ހަދިޔާ ކުރަން އަޅުގަނޑުމެން ނިންމައިފިން

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

އިއްޔެ މާލިއްޔަތު ކޮމިޓީން ވަނީ މަޖިލީސް މެންބަރުންނާއި ސަރުކާރުގެ އިސްވެރިންނާއި އެނޫންވެސް ބައެއް ފަރާތްތަކުގެ މުސާރަ ބޮޑު ކުރަން ފާސްކޮށްފައެވެ. އެގޮތުން ނިންމެވި ނިންމެވުމާއި އެކު އެލަވަންސް އަކާއި ނުލާވެސް ބޮޑު މުސާރައެއް އެފަރާތަކަށް ލިބެއެވެ.

މިބަދަލު ފާސްވެއްޖެ ނަމަ އެފަރާތްތަކަށް މުސާރަ އަކަށް ލިބޭނެ މިންވަރަކީ؛

ރައީސުލްޖުމްހޫރިއްޔާ 120،000ރ.

ރައީސުލްޖުމްހޫރިއްޔާގެ ނައިބު - 93،000ރ.

ވަޒީރުން - 72،000ރ.

ރައްޔިތުންގެ މަޖިލިސް މެންބަރުން - 80،000ރ.

މަޖިލީހުގެ ރައީސް - 90،000ރ.

މަޖިލީހުގެ ނައިބު ރައީސް - 88،000ރ.

އުއްތަމަ ފަނޑިޔާރު - 91،000ރ.

ގަވަރުނަރު - 74،000ރ.

އޮޑިޓާ ޖެނެރަލް - 74،000ރ.

ޕްރޮސެކިއުޓާ ޖެނެރަލް - 74،000ރ.

މޭޔަރު - 46،000ރ.

ޑެޕިއުޓީ މޭޔަރު- 40،500ރ.

ސިޓީ ކައުންސިލް މެންބަރުން 35،000ރ.

އަތޮޅު ކައުންސިލް ރައީސް 33،000ރ.

ރަށު ކައުންސިލް ރައީސް 25،500ރ.

ރަށު ކައުންސިލް ނައިބުން 20،000ރ.

ރަށު ކައުންސިލަރުން 18،000ރ.

މާލިއްޔަތު ކޮމިޓީން މުސާރަތައް ބޮޑުކުރަން ފާސްކުރި ނަމަވެސް މިކަމާ މެދު ފަހުގެ ނިންމުން ނިންމާނީ ކޮމިޓީ ރިޕޯޓަށް ބަހުސްކުރުމަށްފަހު މަޖިލީހުގެ ތަޅުމުންނެވެ.