މުސާރަައިގެ މައްސަލަ ހޫނުވެ، ބަންގްލަދޭޝްގެ ފޭރާން ސިނާއަތް ހުއްޓުމަކަށް

ބަންގްލަދޭޝްގެ ގާމެންޓް ފެކްޓަރީތަކުގެ އެތައް ހާސް މަސައްކަތްތެރިންނެއް މަގުތަކަށް ނުކުމެ ކުރަމުންދާ ވަރުގަދަ މުޒާހަރާތަކުގެ ސަބަބުން، އެ ޤައުމުގެ އިޤްތިޞާދުގެ މައިބަދަ ކަމުގައިވާ އަންނައުނު އުފެއްދުމުގެ ސިނާއަތް މުޅިން ހުއްޓުމަކަށް އަތުވެއްޖެއެވެ.

އަލްޖަޒީރާއިން ރިޕޯޓްކޮށްފައިވާ ގޮތުގައި، ވެރިރަށް ޑާކާގެ މިރްޕޫރުގެ އިތުރުން ސަވަރު، އަޝުލިއާ، އަދި ޣާޒީޕޫރު ފަދަ މުހިންމު ސިނާއީ ސަރަހައްދުތަކުގައި މި މުޒާހަރާތައް ކުރިއަށްދާތާ މިއަދަށް ތިން ދުވަސް ވެފައިވާއިރު، އެ ސަރަހައްދުތަކުގެ އަމަންއަމާންކަން ދެމެހެއްޓުމަށް ސަލާމަތީ ބާރުތަކުން ވަނީ ވަރުގަދަ ފިޔަވަޅުތަކެއް އަޅަން ފަށާފައެވެ.

ހަމަނުޖެހުންތަކާ ގުޅިގެން މިހާތަނަށް 500 އަށްވުރެ ގިނަ ކާރުޚާނާ ވަގުތީ ގޮތުން ބަންދުކުރަން މަޖުބޫރުވެފައިވާއިރު، މަގުތަކަށް އެއްވެ ތިބި މުޒާހަރާގެ ބައިވެރިން ރޫޅާލުމަށްޓަކައި ފުލުހުން ވަނީ ކަރުނަގޭހާއި ސްޓަން ގްރެނޭޑް (އަޑުގަދަ ބޮން) ވެސް ބޭނުންކޮށްފައެވެ.

އަހަރަކު 38 ބިލިޔަން އެމެރިކާ ޑޮލަރުގެ ބޮޑު އާމްދަނީއެއް ހޯދައިދޭ މި ސިނާއަތަކީ ބަންގްލަދޭޝްގެ އެކްސްޕޯޓާއި ވަޒީފާގެ ބާޒާރުގެ އެންމެ މުހިންމު ބިންގާ ކަމުގައި ވީނަމަވެސް، މަސައްކަތްތެރިން ބުނަމުންދަނީ މިހާރު ލިބޭ އުޖޫރައިން އަސާސީ ދިރިއުޅުމުގެ ޚަރަދުތައް ދެކޮޅުނުޖެއްސޭ ކަމަށެވެ. މިހާރު މުވައްޒަފުންނަށް މިނިމަމް ވޭޖްގެ ގޮތުގައި މަހަކު ލިބެމުންދަނީ 12,500 ޓަކާ، ގާތްގަނޑަކަށް 101 އެމެރިކާ ޑޮލަރެވެ. ނަމަވެސް، މުޒާހަރާގެ ބައިވެރިން ގޮވާލަމުންދަނީ އެ އަދަދު ދެގުނައަށްވުރެ ބޮޑުކޮށް، މަހަކު މަދުވެގެން 30,000 ޓަކާ ގާތްގަނޑަކަށް 242 އެމެރިކާ ޑޮލަރަށް ބޮޑުކޮށްދިނުމަށެވެ.

މި މައްސަލައަށް އަވަސް ހައްލެއް ހޯދުމުގެ ގޮތުން ބަންގްލަދޭޝްގެ ސަރުކާރުން އިސްނަގައިގެން މިހާރު ވަނީ ކުއްލި ބައްދަލުވުމެއް ބާއްވާފައެވެ. އަދި މުވައްޒަފުންގެ މިނިމަމް ވޭޖް އަލުން މުރާޖަޢާ ކުރުމުގެ މަސައްކަތް ކުރުމަށްޓަކައި ޚާއްޞަ އައު ބޯޑެއްވެސް ސަރުކާރުން ވަނީ އެކުލަވާލާފައެވެ.

މި ކަމާ ގުޅޭގޮތުން ބަންގްލަދޭޝް އަންނައުނު އަދި ކާރުޚާނާތަކުގެ މަސައްކަތްތެރިންގެ ފެޑެރޭޝަންގެ ސެކްރެޓަރީ ޖެނެރަލް ބާބުލް އަޚްތަރު ވިދާޅުވީ، ފެކްޓަރީތަކުގެ ވެރިން އަބަދުވެސް މަސައްކަތްކުރަނީ މުވައްޒަފުންނަށް ހައްޤުވާ އެކަށީގެންވާ އުޖޫރަ ނުދީ ވޭތޯ ކަމަށެވެ. އަދި ބައިނަލްއަޤްވާމީ މާކެޓުގައި މުދާ ގަންނަ ފަރާތްތަކާ ވާހަކަދައްކައިގެން އުފެއްދުންތަކަށް ރަނގަޅު އަގެއް ހޯދުމަކީ ފެކްޓަރީތަކުގެ ވެރިންގެ ޒިންމާއެއް ކަމަށްވެސް އޭނާ ފާހަގަކުރެއްވިއެވެ.

ނަމަވެސް، މުވައްޒަފުންގެ މި ހަރަކާތްތަކާ މެދު ކަންބޮޑުވުން ފާޅުކުރައްވަމުން، ބަންގްލަދޭޝްގެ އަންނައުނު އުފެއްދުމާއި އެކްސްޕޯޓްކުރާ އެސޯސިއޭޝަން (ބީޖީއެމްއީއޭ) ގެ ރައީސް މަޙްމޫދު ޙަސަން ޚާން ވިދާޅުވީ، ސަރުކާރުން މައްސަލަ ދިރާސާކުރާނެ ބޯޑެއް އެކުލަވާލާފައިވާތީ، މުވައްޒަފުން އެކަމަށް ފުރުސަތު ދޭންޖެހޭނެ ކަމަށެވެ. އަދި މަސައްކަތް މެދުކަނޑާލައި މިފަދަ ގޮތަކަށް މުޒާހަރާތައް ކުރިއަށްގެންދާނަމަ، "މަސައްކަތް ނުކުރާނަމަ އުޖޫރައެއް ނުދެވޭނެ" މި އުސޫލު އިޚްތިޔާރުކުރަން ޖެހިދާނެ ކަމުގެ އިންޒާރުވެސް އޭނާ ވަނީ ދެއްވާފައެވެ.