ގާއުނގޫދޫއަކީ ހުޅުދުއްފާރު ރައްޔިތުންނަށް ނަފާލިބޭ ރަށަކަށް ހަދާނަން: ޑރ މުއިއްޒު

ރ ހުޅުދުއްފާރުގެ އިހުތިޞާސްގެ ތެރޭގައި ހިމެނޭ ގާއުނގޫދޫއަކީ ހުޅުދުއްފާރުގެ ރައްޔިތުންގެ ނަފާލިބޭނެ ރަށެއްގެ ގޮތުގައި ހައްދަވާދެއްވާނެ ކަމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑޮޑޭޓު ޑރ މުހައްމަދު މުއިއްޒު ވިދާޅުވެއްޖެ އެވެ.

ޑރ މުއިއްޒު މިފަދައިން ވިދާޅުވެފައި ވަނީ ރ އަތޮޅަށް އެމަނިކުފާނު ކުރެއްވި ރިޔާސީ ކެމްޕޭނުގެ ދަތުރުފުޅުގައި ހުޅުދުއްފާރުގައި ބޭއްވި ޖަލްސާއެއްގައި ވާހަކަދައްކަވަމުން ނެވެ.

ހުޅުދުއްފާރުގެ ތަރައްގީއަށް ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި ކޮށްދެއްވާނެ ކަންކަން ހާމަކުރައްވަމުން ޑރ މުއިއްޒު ވިދާޅުވީ ހުޅުދުއްފާރު ކަރިީގައި އޮންނަ ގާއުނޑޫދޫއަކީ އެ ރަށުގެ އިހުތިޞާސްގެ ތެރޭގައި ހިމެނޭ ރަށަކަށް ވާއިރު، އެ ރަށުން ހުޅުދުއްފާރުގެ ރައްޔިތުންނަށް ނަފާ ލިބެން ޖެހޭ ކަމަށެވެ.

އެހެންކަމުން މިހާރު އެރަށް ބަލަހައްޓަމުން އަންނަ ފަރާތްތަކާއި މަޝްވަރާކޮށްގެން ހެދިފައިވާ އެއްބަސްވުމުގެ ތެރެއިން ގާއުނގޫދޫއަކީ ހުޅުދުއްފާރުގެ ރައްޔިތުންނަށް ނަފާލިބޭނެ ރަށަކަށް ހައްދަވާދެއްވާނެކަމަށް ޑރ މުއިއްޒު ވިދާޅުވި އެވެ.

"އިޤްތިޞާދީ ނަފާހޯދުމަށް ހުޅުދުއްފާރުގެ އިޙްތިޞާސްތެރޭގައި އޮންނަ ގާއުނގޫދޫއަކީ އެރަށް ދެވިފައިވާ ފަރާތާއި ވާހަކަ ދައްކައިގެން ހެދިފައިވާ އެއްބަސްވުމުގެ ތެރެއިން ތިޔަބޭފުޅުންނަށް ފައިދާއާއި ނަފާލިބޭނޭ ތަނެއް ކަމުގައި ހަދައިދިނުމަށް ވަރަށް މަސައްކަތްކޮށްދޭނަން"

ޕީޕީއެމް-ޕީއެންސީގެ ކެންޑިޑޭޓު ޑރ މުހައްމަދު މުއިއްޒު

އޭގެ އިތުރުން ވެސް ހުޅުދުއްފާރުގައި ހިންގާނެ ބައެއް މަޝްރޫއުތައް ޑރ މުއިއްޒު ވަނީ ވިދާޅުވެދެއްވާފަ އެވެ.

އެގޮތުން ލޭންޑު ޔޫސް ޕްލޭނުގެ ތެރެއިން މޫދަށް އެރޭނެ ޚާއްސަ ސަރަހައްދެއް ތަރައްގީކުރުމާއި ރަށުގެ ފުޓުބޯޅަ ދަނޑު ފީފާ ސްޓޭންޑާޑް ދަނޑަކަށް އަޕްގްރޭޑްކުރުމާއި އެކު، ޒުވާނުންނަށް ޚާއްސަކޮށްގެން ކުޅިވަރު ކުޅޭނެ ވަސީލަތްތައް ތަރައްގީކޮށްދެއްވާނެ ކަމަށް ޑރ މުއިއްޒު ވަނީ ވިދާޅުވެފަ އެވެ.

އެމަނިކުފާނު އިތުރަށް ވިދާޅުވީ ހުޅުދުއްފާރުގައި މިޙާރު ސަރުކާރުން ފަށާފައިވާ އެއްވެސް މަޝްރޫއެއް ހުއްޓާނުލައްވާނެ ކަމަށެވެ. އަދި މަސައްކަތްޕުޅު ކުރައްވާނީ މިހާރަށްވުރެ ބާރު ދުވެލީގައި އެ މަޝްރޫއުތައް ވެސް ނިންމާ، ރައްޔިތުންނަށް ބޭނުންވާ އެހެނިހެން ޚިދުމަތްތައް ވެސް ވީހާ ވެސް އަވަހަށް ފޮރުކޮށްދިނުމަށް ކަމަށެވެ.