މި ސަރުކާރުން ވަނީ ޚާރިޖީ އަޅުވެތިކަމެއްގެ ތެރެއަށް ޤައުމު ދުއްވާލާފައި: ޑރ މުއިއްޒު

މި ސަރުކާރުން ވަނީ ޚާރިޖީ އަޅުވެތިކަމެއްގެ ތެރެއަށް ޤައުމު ދުއްވާލާފައި ކަމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ވިދާޅުވެއްޖެ އެވެ.

އެމަނިކުފާނު މިފަދައިން ވިދާޅުވެފައި ވަނީ ދިވެހިރާއްޖޭގެ މިނިވަންކަމާއި އިސްތިގުލާލު މިއަދު އޮތް ހިސާބާއި މެދު ކަންބޮޑުވުން ފާޅުކުރައްވާ ހުޅުދުއްފާރުގައި ބޭއްވި އެމަނިކުފާނުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން ނެވެ.

ޑރ މުއިއްޒު ވިދާޅުވީ ދިވެހިރާއްޖެއަކީ މިނިވަންކަން ލިބުނު ހިސާބުން ފެށިގެންވެސް ހުރިހާ ގައުމުތަކާއެކު ހަމަހަމަ ގުޅުންތަކެއް ދަމަހައްޓަމުން އައި، ޚާރިޖީ ސިޔާސަތުގައި ވެސް ހަމަހަަމަކަން ތަންފީޒުކުރަމުން އައިސްފައިވާ ގައުމެއް ކަމަށެވެ.

ހުރިހާ ސަރުކާރަކުން ވެސް ޚާރިޖީ ސިޔާސަތު ބައްޓަންކޮށްފައި ވަނީ އެ އުސޫލުގެ މަތީގައި ކަމަށާއި، އެހެން ނަމަވެސް މި ސަރުކާރުން އެކަން ބަދަލުކޮށް ޚާރިޖީ އަޅުވެތިކަމަކަށް ގައުމު ދުއްވާލާފައިވާކަމަށް އެމަނިކުފާނު ވިދާޅުވި އެވެ. އަދި އެކަން އެގޮތަށް ކުރަން ފުރުސަތު ދިނުމުގެ ސަބަބުން އިންޑިއާ ސިފައިންނަށް ރާއްޖޭގައި ތިބުމަށް މަގުފަހިވެ، އިންޑިއާއާއެކު ހަދާފައިވާ ބައެއް އެއްބަސްވުންތައް ހާމަނުކުރެވޭ ވަރަށް ސަރުކާރު "ތާށި" ވެފައިވާކަން ޑރ މުއިއްޒު ފާހަގަކުރެއްވި އެވެ.

"އެއްވެސް ޤައުމަކުން އަޅުގަނޑުމެންގެ ދާޚިލީކަންތަކަށް އަތްގަދަކޮށް ބަސްކިޔާތަނެއް މީގެ ކުރީ ސަރުކާރު ތަކަކުން ނުފެނޭ. ނަމަވެސް މިސަރުކާރުންވަނީ ޚާރިޖީ އަޅުވެތިކަމެއްގެ ތެރެއަށް ޤައުމު ދުއްވާލާފައި. އެ އަޅުވެތިކަމުގެ ތެރޭގައި ބޭރު ޤައުމުތަކުގެ ސިފައިން މިތާ މިތިބީ. އެ އަޅުވެތިކަމުގައި ހެދިފައި ހުރި އެގްރިމަންޓުތައް ހާމަވެސް ކުރަން ނުކެރިގެން މިއުޅެނީ"

ޕީޕީއެމް-ޕީއެންސީގެ ކެންޑިޑޭޓު ޑރ މުއިއްޒު

އެކަން ފާހަގަކުރައްވާ ޑރ މުއިއްޒު ވިދާޅުވީ މީ ވަރަށް ބޮޑު ނުރައްކަލެއް ކަމަށެވެ. އަދި މީ ރައްޔިތުން ވަރަށް ބޮޑަށް ވިސްނަން ވެސް ޖެހޭ ކަމެއް ކަމަށެވެ.

ޑރ މުއިއްޒު ވިދާޅުވީ މި ވަގުތަކީ ގައުމަށްޓަކައި ރައްޔިތުން ބޮޑު ނިންމުމެއް ނިންމާނެ ފުރުސަތު ރައްޔިތުންނަށް ލިބިގެންދާނެ ވަގުތެއްކަމަށެވެ. އެހެންކަމުން ސިޔާސީ ޚިޔާލު ތަފާތުވުންތައް ހުއްޓަސް، މީ ޤައުމިއްޔަތު ނެގެހެއްޓުމަށް ޚިޔާލު އެއްގޮތް ކުރަންވީ ވަގުތުކަން އެމަނިކުފާނު ފާހަގަކުރެއްވި އެވެ.

އަދި ވިދާޅުވީ މި ފުރުސަތު ނަގާލައިފިނަމަ އެ ދެވެނީ ޤައުމިއްޔަތާއި ދުރަށް ކަމަށެވެ. އަދި އެ ހިސާބުން ރާއްޖޭގެ މިނިވަންކަމާއި އިސްތިގުލާލު ނުރައްކަލަށް ހުށައެޅިގެންދާނެ ކަަމަށާއި، މި ފުރުސަތުގެ ބޭނުން ގައުމީ ފިކުރު އިސްކޮށް ހިފައިގެން ނޫނީ ދެން ސަލާމަތްވާން ނޯންނާނެކަމަށް ޑރ މުއިއްޒު ވިދާޅުވި އެވެ.