ޕީޕީއެމް އޮފީހުން ނުކުމެ، ޕީއެންސީން ވަކި އޮފީހެއްގައި މަސައްކަތް ކުރަން ފަށައިފި!

ޕީޕީއެމާއި އެކު، އެއް އޮފީހެއްގައި މަސައްކަތް ކުރަމުންއައި، ވެރިކަންކުރާ ޕީއެންސީން ވަކި އޮފީހެއް ގާއިމްކޮށް ޕީޕީއެމާ ވަކި އިދާރާއެއްގައި މަސައްކަތް ފަށައިފި އެވެ.

ޕީޕީއެމާއި ވަކިން ޕީއެންސީން އެހެން އޮފީހެއްގައި މަސައްކަތް ފަށާފައިވަނީ ރޭގެ ވަގުތެއްގައެވެ. ޕީއެންސީގެ އެ އޮފީސް އިމާރާތް ހުންނަނީ ބޮޑުތަކުރުފާނުގެ މަގުން ކާނިވަލުގެ "ދޮންމަނިކު ސްކައިވިއު" ގެ ތިރީގައި ހުންނަ އިމާރާތުގައެވެ. އެތަނުގައި ޕީއެންސީގެ ނަން ބޯޑު ހަރުކޮށް އެ ޕާޓީގެ ޗެއާޕާސަން އަބްދުއްރަހީމް އަބްދުاللهގެ ބައްދަލުވުމެއްވެސް ކުރިޔަށް ގެންގޮސްފައިވާ ކަމަށް މަޢުލޫމާތު ލިބެއެވެ.

ޕީއެންސީގެ އޮފީހުގެ ގޮތުގައި ހަމަޖައްސާފައިވާ ތަނަކީ މިދިޔަ ރިޔާސީ އިންތިހާބުގައި ޕީޕީއެމާއި ޕީއެންސީގެ ކެމްޕޭން ޖަގަހައެއްގެ ގޮތުގައި ބޭނުން ކުރި ތަނެކެވެ.

މިކަމާއި ގުޅިގެން ޕީޕީއެމް/ޕީއެންސީގެ ބަހެއް އަދި މިހާތަނަށް ލިބޭގޮތް ވަނީ ނުވެފައެވެ.

ޕީޕީއެމްގެ ނާއިބު ރައީސްގެ މަގާމުގައި ކުރިން ހުންނެވި، އަދުގެ ރައީސުލްޖުމްހޫރިއްޔާ ޑރ މުހައްމަދު މުއިއްޒު ރިޔާސީ އިންތިހާބުގައި ވާދަ ކުރެއްވުމަށް އެޕާޓީން ވަކިވެ، ޕީއެންސީއާއި ގުޅިވަޑައިގެން، ރިޔާސީ އިންތިހާބުގައި ވާދަކުރެއްވީވެސް ޕީއެންސީގެ ޓިކެޓްގައެވެ. ނަމަވެސް، ރިޔާސީ އިންތިޚާބުގެ ތެރެއިން މުޢިއްޒުގެ ކެންޕެއިންގެ ކަންކަން ކޮށްފައިވަނީ ޕީޕީއެމްގެ އޮފީހުގައި ކަން ފާހަގަކޮށްލަންޖެހެއެވެ.