ޕީއެޗްޑީ ފެންވަރަށް ކިޔެވުމަށް އައިޔޫއެމްއަށް ސްކޮލަރޝިޕްތަކެއް ހުޅުވާލަނީ

ދިވެހިރާއްޖޭގެ އިސްލާމީ ޔުނިވަރސިޓީގެ މުވައްޒަފުން ޕީއެޗްޑީ ފެންވަރަށް ގެނައުމަށްޓަކައި އެ ޔުނިވަރސިޓީގެ މުވައްޒަފުންނަށް ޚާއްސަ ކުރެެވިގެން ސްކޮލަރޝިޕް ފުރުޞަޠުތަކެއް ހުޅުވާލުމަށް ރާވަމުން އަންނަކަން އިސްލާމިކް މިނިސްޓަރ ޑރ މުހައްމަދު ޝަހީމް އަލީ ސަޢީދު ހާމަކުރައްވައިފިއެވެ.

މިއަދު އިސްލާމީ ޔުނިވަރސިޓީގެ ހޯލުގައި ކުރިއަށްދިޔަ، ގދ ތިނަދޫ އިސްލާމީ މަރުކަޒު އެ ޔުނިވަރސިޓީގެ ކެމްޕަހެއްގެ ގޮތުގައި ހަމަޖައްސައި 10 އަހަރު ދުވަހުގެ މުއްދަތަކަށް ހަވާލުކުރުމުގެ ރަސްމިޔާތުގައި ވާހަކަދައްކަވަމުން އިސްލާމިކް މިނިސްޓަރ ޑރ ޝަހީމް ވިދާޅުވީ، ދާއިރާއިން ޚާއްސަވުމަށް ޔުނިވަރސިޓީގެ މުވައްޒަފުންނަށް ޚާއްސަ ކުރެވިގެން ޕީއެޗްޑީ ފެންވަރުގެ ސްކޮލަރޝިޕްތަކަކަށް ހުޅުވާލުމަށް ރާވަމުން އަންނަ ކަމުގައެވެ.

އައިޔޫއެމްގެ ސްޓާފުން ބިނާ ކުރުމަށް، ކޮންމެ އަހަރަކަށްވެސް ކަނޑައެޅިގެން ވަކިވަރަކަށް ސްކޯލާޝިޕްދޭން އަޅުގަނޑުމެން މި ތިބީ ތައްޔާރަށް. ސްކޯލާޝިޕް މި ދެނީ ހަމައެކަނި ޕީއެޗްޑީ ފެންވަރަށް. ހިލޭ ޑިގްރީއާ ކަންކަން އޮވޭތާ. އެހެންވީމާ ކޮންމެހެން ޑިގްރީއަކަށް އަޅުގަނޑުމެންނަށް ލާޒިމެން ނޫން. އެހެން ނަމަވެސް ސްޕެޝަލައިޒް ވުމަށް، ޕީއެޗްޑީ ފެންވަރަށް ކިޔެވުމަށް ބޭނުންވާ އެހީތެރިކަން އަޅުގަނޑުމެން މި ތިބީ އިސްލާމިކް ޔުނިވާސިޓީ އަށް ފޯރުކޮށްދޭން ތައްޔާރަށް.

ޑރ. ޝަހީމް ޢަލީ ސަޢީދު

މީގެ އިތުރުން މިނިސްޓަރ ވިދާޅުވީ، ކުރިއަށް އޮތް ދެ އަހަރުދުވަހުގެ ތެރޭގައި އިސްލާމީ ޔުނިވަރސިޓީގެ ޢިލްމު މުޅިރާއްޖެއަށް ފުޅާކުރެވޭނެ ކަމަށް ލަފާ ކުރެވޭ ކަމަށާއި އެކަމަށްޓަކައި ކިޔަވައިދެއްވާ ލެކްޗަރަރުން އެ ފެންވަރަށް ތަމްރީނު ކުރުމަކީ މުހިއްމުކަމެއްކަމުގައި ދެކިލައްވާކަމަށެވެ.

އިސްލާމިކް ޔުނިވަރސިޓީ މިދަނީ ވަރަށްބޮޑަށް ފުޅާވަމުން، ކުރިއަށް މި އޮތް ދެ އަހަރެއްހާ ދުވަހުގެ ތެރޭގައި ލަފާ ކުރެވޭ ގޮތުގައި މުޅި ރާއްޖެއަށް އިސްލާމިކް ޔުނިވަސިޓީގެ ބިނާތަށް ރާއްޖޭގެ ކަންކޮޅުތަކުގައި ބިނާވެގެންދާނެ، ޔުނިވަރސިޓީގެ ކޯސްތައް ފެށިގެންދާނެ

ޑރ ޝަހީމް

މީގެ އިތުރުން އެމަނިކުފާނު ވަނީ، ތަރުޖަމާ ކުރުމާއި ދިރާސާތައް ކުރުމުގެ ރޮނގުން މަސައްކަތައް ފުޅާކޮށް އިސްލާމީ ޙަޟާރާތާއި ޢިލްމާއި އިސްލާމީ ނޫރު މި ބިމުގައި ފެތުރުމުގެ މަސައްކަތް ކުރުމަށް ހުރި މައިގަނޑު މުއައްސަސާގެ ހައިސިއްޔަތުން ތަނުގައި ކިޔަވައިދެއްވާ ލެކްޗަރަރުން އެކަންކަމަށް ޚާއްސަ އިސްކަމެއް ދެއްވައިގެން އިސްލާމީ ޔުނިވަރސިޓީގެ ފަލްސަފާއާއި ލަނޑުދަނޑިތައް ޙާސިލްކުރުމަށް މަސައްކަތް ކުރެއްވުމަށް ގޮވާލައްވައިފައެވެ.