ފެން ބިލުތަކަށް ފައިސާ ނުދައްކައިގެން ފެނަކަ އިން ފެން ކަނޑާލައިފި
ފާއިތުވި ހަތަރު އަހަރުގެ އެއްވެސް ފެން ބިލެއް ފެނަކަ ކޯޕަރޭޝަންގެ ހެޑް އޮފީހުން ދައްކައިފައި ނުވާތީ އެ އޮފީހުގެ ފެނުގެ ހިދުމަތް ކަނޑާލައިފިއެވެ.
2019 ވަނަ އަހަރުން ފެށިގެން ފެނަކައިން ދައްކަން ޖެހޭ ފެން ބިލްތަކަށް ލައްކައަކަށް ވުރެ ގިނަ ރުފިޔާ އަރާފައިވެއެވެ. އެ ބިލްތަކަށް ފައިސާ ދައްކަން އެމްޕީއެލް އިން ތަކުރާރުކޮށް ވަނީ ނޯޓިސް ފޮނުވާފައެވެ.
އެހެންނަމަވެސް އެމްޕީއެލްއިން އެދުނު ގޮތަށް ފެނަކައިން ބިލު ދައްކާފައި ނުވާތީ މިއަދު މިވަނީ އެ ކުންފުނީގެ މައި އޮފީހުން ފެން ކަނޑާލާފައެވެ. މިކަމާ ގުޅޭ ގޮތުން އަދި އެއްވެސް އިދާރާއެއްގެ ރަސްމީ ބަހެއްވެސް އަދި ލިބިފައެއް ނުވެއެވެ.
ނިމިގެން ދިޔަ ރައީސް އިބްރާހީމް މުހައްމަދު ސޯލިހުގެ ސަރުކާރުގައި ކޮރަޕްޝަންގެ ބޮޑެތި ތުހުމަތުތަކެއް ފެނަކައަށް ވަނީ ކޮށްފައިއެވެ. އަދި ފެނަކައިން 2022 ވަނަ އަހަރުގެ ނިޔަލަށް އެކަނި ވެސް 4.1 ބިލިއަން ރުފިޔާ ދަރަނީގެ ގޮތުގައި ވަނީ ދައްކަން ޖެހިފައެވެ.
ފެނަކަ ކޯޕަރޭޝަންގެ މައި އޮފީސް ހިންގަނީ އެމްޕީއެލްގެ އިމާރާތެއް ކަމަށްވާ ޕޯޓްސް ކޮމްޕްލެކްސްގަ އެވެ. އެ އިމާރާތުގެ ތިން ފްލޯއެއްގައި ފެނަކައިގެ އޮފީސްތައް ހިންގަމުންދާއިރު އެއްވެސް ފްލޯއަކުން ފެން ބިލެއް ދައްކާފައެއް ނުވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
