ޢަލީ ރަމީޒްގެ "ޓަޗް ހުރިތޯ" ބަލަން ދޫކޮށްލި މަދަހައަށް ބޮޑު ތަރުޙީބެއް؛ ހަދިޔާއަކަށް މުޅި މަދަހަ ނެރެނީ!

ދާރިސް ޓީވީގެ ސްޓޭޝަން މެނޭޖަރު ޢަލީ ރަމީޒު، މަދަހަ ކިޔުމާއިވެސް ދުރުގައި ދުވަސްތަކަކަށް ހުރުމަށްފަހު، "ޓަޗް ހުރިތޯ" ބަލާލަން ކިޔާލައި ދޫކޮށްލި މަދަހައިގެ ތަންކޮޅަށް ގިނަ ބައެއްގެ ތަޢުރީފު އޮހެން ފަށައިފިއެވެ.

ޢަލީ ރަމީޒު އެންމެ ކުރިން މަދަހަ ކިޔަން ފެށިއިރުގެ މަދަހައެއް ކަމަށްވާ "ތިޔައޭ ރަސޫލަކީ" މަދަހައިގެ ކުޑަ ތަންކޮޅެއް، އަލުން ކިޔައި، އިއްޔެގެ ވަގުތެއްގައި އޭނާ ވަނީ މީސްމީޑިއާއަށް ދޫކޮށްލާފައެވެ. އެ ވީޑިއޯގެ ކެޕްޝަންގައި، އެއީ "އަދިވެސް ޓަޗް ހުރިތޯ ބަލާލަން" ކިޔާލި މަދަހައެއް ކަމަށް ބުނެފައިވެއެވެ.

ޢަލީ ގެ އެ މަދަހަ މީސްމީޑިއާއަށް ދޫކޮށްލުމާއިއެކު ކުޑަވަގުތުކޮޅެއްގެ ތެރޭގައި ސަތޭކައަށްވުރެ ގިނަ ޝެއާރ އާއި ކޮމެންޓް އަދި ލައިކް އެ ވީޑިއޯ އަށް ވަނީ ލިބިފައެވެ. އަދި މިހާތަނަށް އެ ވީޑިއޯ އަށް 2.8 ޝެއަރ، 1.9 ކޮމެންޓް، 14,000 އަށްވުރެ ގިނަ ލައިކްސް ލިބިފައިވާއިރު، 154,000 މީހުން ވަނީ ވީޑިއޯ ބަލާފައެވެ.

"ޓަޗް ހުރިތޯ ބަލާލަން" ޢަލީ ދޫކޮށްލި އެ މަދަހައަށް ތައުރީފް ކޮށް ކޮމެންޓް ކުރި އެންމެންވެސް ވަނީ ޢަލީގެ ހުނަރަށް ތަޢުރީފް ކޮށްފައެވެ. އަދި ޔަގީނުންވެސް "ޓަޗް" ހުރި ކަމަށް އެ ބަޔަކު ބުނެފައިވާއިރު، އަނެއް ބަޔަކު ވަނީ "ކުރިއަށްވުރެވެސް މާ ބޮޑަށް ޓަޗް" ހުރި ކަމަށް ބުނެފައެވެ.

"މާޝާ الله. ކުރިން ވެސް މިހާރު ވެސް ތިވަރުގެ ރަން އަޑެއް އަދި މިރާއްޖޭގައި އުފެދިފައި ނެތް. ރާއްޖޭގެ ރަން އަޑުގެ ވެރިޔާ" މީހަކު ކުރި ކޮމެންޓެއްގައި ވެއެވެ.

"ޓަޗްގެ ވާހަކަ ބަހައްޓާ. އަދިވެސް އައްޔަ އާ ހަމަ ކޮށްލެވޭ ވަރުގެ މީހެއް ނެތް."

"ގައި ހީބިހި ނަގައިގެން ގޮއްސި. ވަރަށް ފުރިހަމަ"

މީގެ އިތުރުން އެއަށް ކޮމެންޓް ކުރި ގިނަ ބަޔަކު ވަނީ، ޢަލީގެ އަޑުން ގިނަ ގިނައިން މަދަހަތައް ކިޔައިގެން ނެރުމަށް އެދިފައެވެ.

" މިދަހައިން ވަރަށް ބޮޑަށް އަސަރު ކޮށްފި. އަދިވެސް މިފަދަ ގިނަ މަދަހަތައް ކިޔުން އެދެން."

މި މަދަހައަށް ކޮމެންޓް ކުރި ގިނަ ބައެއްގެ އެދުމާއި އެކު، ރޭ ޢަލީ ފޭސްބުކު ގައި ކުރި ޕޯސްޓެއްގައި ވަނީ އެ އެންމެންނަށް އުފާވެރި ހަބަރެއް ދެއްވާފައެވެ. އެގޮތުން އަލީ ރަމީޒު ވިދާޅުވީ އެ މަދަހަ އެއްކޮށް ސުޓޫޑިއޯ ރެކޯޑް ވާޝަން ވަރަށް އަވަހަށް ނެރުއްވާނެ ކަމަށެވެ.

2000 ގެ ކުރީކޮޅު ތެރޭގައި ލަވަކިޔައި އުޅުނު ކަމުގައި ވިޔަސް، ދީނީ ގޮތުން އެކަން އޮންނަ ގޮތް އެނގިލެއްވުމުން ޢަލީ ވަނީ މިޔުޒިކާއި އެއްކޮށް ދުރުވެ، ދީނީ ކަންކަމުގައި އިސްކޮށް ހަރަކާތްތެރިވާން ފަށްޓަވާފައެވެ. އެގޮތުން، އޭނާ އަކީ ރާއްޖޭގެ އެންމެ ހިންގުންތެރި އެއް ޖަމިއްޔާ ކަމަށްވާ ޖަމިއްޔަތުއްސަލަފްގެ ހަރަކާތްތަކުގަޔާއި، ދީނީ ޗެނަލެއް ކަމަށްވާ 'ދާރިސް ޓީވީ' ގެ ޕްރޮގްރާމް ތަކުގައިވެސް އިސްކޮށް ހަރަކާތްތެރިވަމުން އަންނަ ބޭފުޅެކެވެ.

ލަވަކިޔުން ހުއްޓާލި ދުވަސްކޮޅު މަދަހަ ކީ ނަމަވެސް ފަހުން ޢަލީގެ މަދަހައެއް ވެސް ނެރެފައެއް ނުވެއެވެ.