އިސްރާއީލް މީހުން ރާއްޖެ އެތެރެވުން މަނާކުރުމަށް ހުށަހެޅި ޕެޓިޝަން ކޮމިޓީން ފާސްކޮށްފި
އިސްރާއީލްގެ ޕާސްޕޯޓުގައި އެ ގައުމުގެ އެއްވެސް ރައްޔިތަކަށް ރާއްޖެ އެތެރެވުން މަނާކުރުމަށް އެދި ރައްޔިތުންގެ މަޖިލީހުގެ ޕެޓިޝަން ކޮމިޓީއަށް ހުށަހެޅި ޕެޓިޝަން މިއަދު އެ ކޮމިޓީން ފާސްކޮށްފިއެވެ.
މި ޕެޓިޝަން ފާސްކޮށްފައިވަނީ ކޮމިޓީއަށް ހާޒިރުވި ހުރިހާ މެންބަރުންގެ އިއްތިފާގުންނެވެ.
މިއީ "ރައިޓް މޫވްމަންޓުން" އިސްނަގައިގެން ގިނަ އަދަދެއްގެ ޖަމިޔާތަކާއި ކްލަބްތައް ގުޅިގެން، އިސްރާއީލުގެ ހައްދުފަހަނަ އަޅާފައިވާ ޔަހޫދީ ސަރުކާރުން ފަލަސްތީނު ނައްތާލުމަށް ކުރަމުންގެންދާ ލާއިންސާނީ އަމަލުތަކާއި ފަލަސްތީނުގެ ލޮބުވެތި އަހުންނާއި އުހްތުންނާ ދެކޮޅަށް ހިންގަމުންގެންދާ ލާއިންސާނީ އަމަލުތަކާއި ދެކޮޅަށް ދިވެހިން ތިބިކަން ހާމަކުރުމުގެ ގޮތުން އިސްރާއީލުގެ ރަށްވެހިން ރާއްޖެ އެތެރެކުރުން ހުއްޓުވުމަށް އެދި ހުށަހަޅާއިފައިވާ ޕެޓިޝަނެކެވެ.
މިއަދުގެ ކޮމިޓީގެ ބައްދަލުވުމުގައި ޕެޓިޝަނާ ގުޅޭ ގޮތުން ވާހަކަ ދައްކަވަމުން މަޖިލިހުގެ އުނގޫފާރު ދާއުރާގެ މެންބަރު މުހައްމަދު ވަހީދު (ވައްޑެ) ވިދާޅުވީ ރާއްޖެއަކީ އެއްވެސް ދައުލަތަކާ ދެކޮޅު ބައެއް ނޫން ކަމަށާއި ނަމަވެސް ދައުލަތަކުން އިންސާނިއްޔާތާ ހިލާފު ބޮޑު ޖަރީމާއެއް ހިންގަމުންދާނަމަ އެ ދައުލަތަކާ ދޭތެރޭގައި ފިޔަވަޅުތައް އަޅަން ޖެހޭ ކަމަށާއި ބައިނަލްއަގްވާމީ މަޖިއްޔާތަކާއި ގައުމުތަކުން ކަންތައްކުރާ ގޮތް ކަމަށާއި އެ ހައްގު ރާއްޖެއަށް ވެސް އޮންނާނެ ކަމަށެވެ.
މީގެ އިތުރުން ހެންވޭރު ހުނޅަގު ދާއިރާގެ މެންބަރު ހަސަން ލަތީފް ވިދާޅުވީ، ދުނިޔޭގެ މަދު ގައުމުތަކެއް ފިޔަވައި ފަލަސްތީނުގައި ހިނގަމުންދާ ކަންކަމަކީ ރަނގަޅު ކަމެއްގެ ގޮތުގައި ބަލައެއް ނުގަންނަ ކަމަށާއި އެ ކަންކަމަކީ ރަނގަޅު ކަމެއްގެ ގޮތުގައި ދިވެހިން ގަބޫލްނުކުރާ ކަމަށެވެ. ފަލަސްތީނުގައި އެ ހިނގަނީ ހަނގުރާމާއެއް ކަމަށް ސިފަ ނުކުރެވޭ ކަމަށާއި އެއީ ގަތުލުއާމުގެ އަމަލުތަކެއް ކަމަށް ވިދާޅުވިއެވެ.
މަޖިލީހަށް ހުށަހަޅާފައިވަނީ ޕެޓިޝަންގައި ސޮއި ކުރި މީހުންގެ ތެރެއިން 1000 ސޮއިއެވެ. ޕްޓިޝަންގައި ސޮއިކުރުން ޑިސެމްބަރު މަހުގެ 15 އާއި ހަމައަށް ކުރިޔަށް ދާނެއެވެ. އެއަށްފަހު އެހާތަނަށް ލިބޭ ހުރިހާ ސޮޔަކާއެކު ރައީސުލްޖުމްހޫރިއްޔާއަށް ޕެޓިޝަން ހުށަހެޅުމަށް ރައިޓް މޫވްމަންޓުން ވަނީ ނިންމާފައެވެ.
މިހާތަނަށް މާލެއިން 10،000 އަށްވުރެން ގިނަ ސޮއެ ލިބިފައިވާއިރު ރާއްޖޭގެ އެކި ކަންކޮޅުތަކުގައި ވެސް ސޮއި ކުރުމުގެ މަސައްކަތް ވަނީ ފަށާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
