އިސޫ، މުއާ އަދި އަހަނދުގެ މައްސަލަ މަދަނީ މިންގަނޑުން ކުރިއަށް ނުގެންދެވޭނެކަމަށް ނިންމައިފި

ނޫސްވެރިޔާ އަހުމަދު ރިލްވާން އާއި ބްލޮގަރު ޔާމީނު ރަޝީދުގެ މަރުގެ ތުހުމަތުގައި ހައްޔަރު ކުރި އިސްމާއިލް އަބްދުއްރަހީމް (އިސޫ) އާއި އަޙްމަދު މުޢާޒު (ގަޓު މުއާ) އާއި އަޙްމަދު އިސްމާޢީލް (އަހަނދު) އަށް ކުރާ ދައުވާ މަދަނީ މިންގަނޑުން ކުރިއަށް ނުގެންދެވޭނެކަމަށް ކްރިމިނަލް ކޯޓުން ނިންމައިފިއެވެ.

މި މައްސަލައިގައި އިސޫގެ މައްޗަށް އުފުލާފައި ވަނީ ޓެރެރިޒަމްގެ އަމަލެއް ކުރުމުގައި އެހީވެދިނުމުގެ ކުށުގެ ދައުވާ އާއި ރިލްވާނު މަރާލުމުގައި ހަރަކާތްތެރިވި ކަމުގެ ކުށުގެ ދައުވާ އަދި ބްލޮގަރު ޔާމީން ރަޝީދަކީ އިސްލާމް ދީނާ ހިލާފު މީހެއްކަމަށް ބުނެ އޭނާ މަރާލުމުގައި ހަރަކާތްތެރިވިކަމަށް ތުހުމަތުކޮށް ޓެރަރިޒަމުގެ ދައުވާ އެވެ.

އަދި ގަޓު މުއާގެ މައްޗަށް އުފުލާފައިވަނީ، ޓެރަރިޒަމްގެ އަމަލެއް ރޭވުމުގެ ކުށުގެ އެއް ދައުވާ އެއް ކޮށްފައިވާއިރު، އަޙްމަދު އިސްމާޢީލް (އަހަނދު) އަށް ކުރަނީ، ޓެރަރިޒަމް އަމަލެއް ކުރަން ރޭވުމުގެ ކުށުގެ ދައުވާއަކާއި ޓެރަރިޒަމް އަމަލެއް ކުރުމަށް ރޭވުމުގެ ދައުވާ އެވެ.

އިއްޔެ ކްރިމިނަލް ކޯޓުގައި ސިއްރުން ކުރިއަށް ގެންދިޔަ މި  ޝަރީއަތުގެ އަޑުއެހުމުގައި އެކޯޓުންވަނީ، އެމީހުންގެ މައްޗަށް ތުހުމަތު ކުރެވޭ ކަންކަމުގެ ހެކި ނެތްކަމަށް ބަޔާންކޮށް، މައްސަލަ މަދަނީ މިންގަޑުން ކުރިއަށް ނުގެންދެވޭނެ ކަމަށް ނިންމައި މައްސަލަ އަނބުރާ ޕީޖީ އޮފީހަށް ފޮނުވާފައެވެ. އެކަން ޕީޖީ އޮފީހުން 'ވޮއިސް' އަށް ވަނީ ކަށަވަރު ކޮށްދީފައެވެ.

މީގެއިތުރުން އެ މީހުން ބަންދުން ދޫކޮށްލިއިރު ފައިގައި އެޅުވި މޮނިކޮން ޓެގް ނައްޓައިލުމަށް ވެސް އެ ކޯޓުން ވަނީ އަމުރުކޮށްފައެވެ.