ނަދީމްގެ މަރުގެ ދައުވާ ލިބޭ މީހުން ބަންދު ނުކުރަން ނިންމި މައްސަލަ ސްޕްރީމް ކޯޓަށް ހުށައަޅައިފި

މީގެ ހަ އަހަރު ކުރިން  ޓާމިނަލް ކެފޭގެ ތެރެއަށް މޫނު ނިވާކޮށްގެން ތިބި ބަޔަކު ވަދެ ތޫނު އެއްޗަކުން ހަމަލާދީ މަރާލި ހއ.ތަކަންދޫ އިބްރާހިމީ ހިޔާ ނަދީމް ޢަބްދުއްރަޙީމް (ނަޑޭ) ގެ މަރުގެ މައްސަލައިގައި ދައުވާ ލިބޭ މީހުން ބަންދު ނުކުރުމަށް ހައި ކޯޓުން ނިންމި ނިންމުން ސުޕްރީމް ކޯޓުގައި އިސްތިއުނާފް ކުރަން ނިންމައިފިއެވެ.

ނަދީމް ގެ މަރުގެ މައްސަލައިގައި ދައުވާ އުފުލާފައިވަނީ ހަތަރު މީހަކަށެވެ. މިގޮތުން ތޫނު އެއްޗަކުން ހަމަލާދީ މީހަކު މެރުމުގެ ދައުވާ އުފުލީ ގ.ޝާރާޒް މުޙައްމަދު މަފާޒް ޙުސައިން ސަލީމްގެ މައްޗަށެވެ.

އޭގެ އިތުރުން ތޫނު އެއްޗެއް ބޭނުންކޮށްގެން ގަސްތުގައި މީހަކު މަރާލުމުގައި ބައިވެރިވި ކަމުގެ ދައުވާ ރ. އިންނަމާދޫ، ސަމަންތާ، ހުސައިން ޝާމިން އާއި ގއ. ގެމަނަފުށި، ހަވާސް، މުހައްމަދު ކަރަމް ސުހައިލް އަދި ލ. ގަން، ވިދާތަރި، އަލީ ނިފާޒުގެ މައްޗަށް ވަނީ އުފުލާފައެވެ.

ނޮވެމްބަރ 2022 ގައި ދައުވާ އުފުލުނު އެންމެންގެ މައްޗަށް ކުށް ސާބިތުނުވާކަމަށް ކްރިމިނަލް ކޯޓުން ނިންމިއެވެ. ދައުލަތުގެ ފަރާތުން ވަނީ އެ ނިންމުން އިސްތިއުނާފު ކޮށް މައްސަލަ ނިމެންދެން އެމީހުން ބަންދުގައި ބޭތިއްބުމަށް އެދިފައެވެ. އެހެންނަމަވެސް މިދިޔަ ހޯމަ ދުވަހު ހައި ކޯޓުން ނިންމީ އެމީހުން ބަންދެއް ނުކުރެވޭނެ ކަމަށެވެ. އެހެންކަމުން ދައުލަތުން ވަނީ މި ނިންމުން ހައި ކޯޓުގައި އިސްތިއުނާފް ކުރަން ނިންމާފައެވެ.

ޓާމިނަލް ކެފޭ ތެރޭގައި ނަދީމް އިންދައި، އޭނާގެ ބޮލަށް ވަޅިން ހަމަލާދިނީ ޖުލައި 27، 2017 ވަނަ ދުވަހުގެ ހަވީރު ވަގުތެވެ. އޭގެ ދެދުވަސް ފަހުން އައިސީޔޫގައި ފަރުވާ ދެމުން ދަނިކޮށް އޭނާ ވަނީ މަރުވެފައެވެ.