ހުސްވެފައިވާ 18 މަގާމަށް ކުރިމަތިލާން ޖޭޕީން ހުޅުވާލައިފި

ޖުމްހޫރީ ޕާޓީގެ ޑެޕިއުޓީ ލީޑަރުގެ މަގާމާއި އެކު އިތުރު 18 މަގާމަކަށް ކުރިމަތިލާން އެ ޕާޓީން ހުޅުވާލައިފިއެވެ.

ޖޭޕީން މިއަދު ކުރި އިއުލާނެއްގައި ބުނެފައި ވަނީ އެ ޕާޓީގެ ކައުންސިލްގެ ހުސްވެފައިވާ މަގާމުތަކުގެ އިންތިހާބަށް ނަން ހުށައެޅުމަށް ހުޅުވާލަން ނިންމާފައިވާ ކަމަށެވެ. އަދި އެ މަގާމުތަކަށް ކުރިމަތިލުމަށް ޝައުގުވެރިވާ މެންބަރުން އެކަމަށް އެދި ހުށަހެޅުމުގެ ފުރުސަތު މި މަހުގެ 29 ވަނަ ދުވަހާ ހަމައަށް ވަނީ ހުޅުވާލާފައެވެ.

ޖޭޕީން ކުރިމަތި ލުމަށް ހުޅުވާލާފައިވާ މަގާމުތަކުގެ ތެރޭގައި ޑެޕިއުޓީ ލީޑަރު، އަންހެނުންގެ ލީގުގެ ރައީސް، ޒުވާނުންގެ ލީގުގެ ރައީސް، ޕާޓީގެ ގައުމީ ކޮންފަރެންސް އިންތިހާބުކުރާ 25 މެމްބަރުންގެ ތެރެއިން ހުސްވެފައިވާ 8 މެމްބަރުންގެ މަގާމް، ކޮމިޓީ އޮފް އެޑިއުކޭޝަންގެ ޗެއާ، ކޮމިޓީ އޮފް ހެލްތުގެ ޗެއާ، ކޮމިޓި އޮފް ޑިފެންސްގެ ޗެއާ، ކެމްޕެއިން އެންޑް އިލެކްޝަންސްގެ ޗެއާ، ކޮމިޓީ އޮފް ސޯޝަލް މީޑިއާގެ ޗެއާ، ކޮމިޓީ ފޯ ޑަޔަސްޕޯރާ - އިންޑިއާގެ ޗެއާ، ޕާޓީގެ ގައުމީ ކޮންފަރެންސް އިންތިހާބުކުރާ 25 މެމްބަރުންގެ ތެރެއިން، ހުސްވެފައިވާ މަގާމަށް 155 ވަނަ ކައުންސިލް ބައްދަލުވުމުގެ ތެރެއިން އިންތިހާބުކޮށްފައިވާ މެމްބަރުންގެ ތެރެއިން ހުސްވެފައިވާ މަގާމަށް 1 މެންބަރު ގެ މަގާމް ހިމެނެއެވެ.

ނިމިދިޔަ ރިޔާސީ އިންތިހާބަށް ފަހު ޖުމްހޫރީ ޕާޓީގައި ހިމެނޭ އާންމު މެންބަރުންގެ އިތުރުން ޕާޓީގެ ބައެއް އިސް ލީޑަރުންވެސް ދަނީ ޖޭޕީ ދޫކޮށް ސަރުކާރު ހިންގާ މައި ޕާޓީ ޕީއެންސީއާ ގުޅެމުންނެވެ.

ޖޭޕީން ވަނީ ނިމިދިޔަ ރިޔާސީ އިންތިހާބުގެ ފުރަތަމަ ބުރުގައި ވެސް ވާދަ ކޮށްފައެވެ. ޕާޓީގެ ލީޑަރު އަދި މާމިނގިލި ދާއިރާގެ މެންބަރު ގާސިމް އިބްރާހިމް ނުކުންނަވާ އިންތިހާބުގައި ބައިވެރިވެވަޑައިގެންނެވި ނަމަވެސް އެ ޕާޓީއަށް މާބޮޑު ތަރުހީބެއް ލިބިފައެއް ނުވެއެވެ.