ރިސޯޓް ލީގުގެ މީޑިއާ ޕާޓްނަރަކަށް ވޮއިސް!

ރާއްޖޭގެ ޓޫރިޒަމް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް "ރިސޯޓް ލީގު 2023" ގެ މީޑިއާ ޕާޓްނަރަކަށް ވޮއިސް ހަމަޖައްސައިފިއެވެ.

މީޑިއާ ޕާޓްނަރާއެކު ބޭއްވި ސޮއި ކުރުމުގެ ރަސްމިއްޔާތުގައި ބިގް ގޭމް މޯލްޑިވްސްގެ ފަރާތުން ސޮއިކުރެއްވީ ރިސޯޓް ލީގު 2023 ގެ ޕަބްލިކް ރިލޭޝަން އިސްމާއިލް މުފީދު (ބިއްލެ) އެވެ. އަދި ވޮއިސްގެ ފަރާތުން ސޮއިކުރެއްވީ ސީއީއޯ މުހައްމަދު ސައުޒަމް އެވެ.

ރިސޯޓް ލީގު ފުޓްސަލް މުބާރާތަކީ 2013 ވަނަ އަހަރު ބާއްވަން ފެއްޓުނު މުބާރާތެކެވެ. މިދިޔަ އަހަރުގެ މުބާރާތުގައި 52 ޓީމު ބައިވެރިވި އިރު، ޖުމްލަ 101 މެޗު ވަނީ ކުޅެވިފަ އެވެ. އަދި މުބާރާތުގެ ހުރިހާ މެޗެއް ވަނީ ސޯޝަލް މީޑިއާގައި ލައިވް ސްޓްރީމް ކުރެވިފައެވެ. އަދި މި މުބާރާތުގައި ރާއްޖެ ބޮޑިތި ހުރިހާ ރިސޯޓަކުން ބައިވެރިވެފައިވެއެވެ.

މިއަހަރުގެ މުބާރާތް މެއި 15 ގައި ފެށުމަށް ހަމަޖެހިފައިވާއިރު، މި މުބާރާތް ހަތަރު މަސް ދުވަހަށް ދިގުދެމިގެންދާއެވެ. އަދި 8 ޒޯނަކަށް ބަހާލައިގެން ކޮންމެ ޒޯނެއްގައި ވެސް މުބާރާތް ކުރިއަށް ގެންދިއުމަށް ހަމަޖެހިފައިވަނީ އެއް ރިސޯޓެއްގައެވެ.

މިއަހަރުގެ މުބާރާތުގައި ވެސް 100 އަށްވުރެ ގިނަ މެޗު ކުޅުމަށް ހަމަޖެހިފައިވާއިރު، މުބާރާތުގެ ހުރިހާ މެޗެއް ލައިވް ސްޓްރީމް ކުރުމަށް ވަނީ ހަމަޖެހިފައެވެ. މީގެއިތުރުންވެސް މުބާރާތުގެ މެޗުތަކުގެ މެން އޮފް ދަ މެޗަށް ހޮވޭ ފަރާތަކަށް އެވޯޑްގެ އިތުރުން ފައިސާގެ އިނާމު ދިނުމަށް ވަނީ ހަމަޖެހިފައެވެ.

މީގެއިތުރުން ދިގު އިންތިޒާރަކަށް ފަހު ބޮޑު އަދަދެއްގެ ފައިސާގެ އިނާމާއެކު ރިސޯޓް ސުޕަރ ލީގު މިއަހަރު ފެށިގެންދާއިރު މިއަހަރުގެ ރިސޯޓް ލީގުގެ ހުރިހާ ޗެމްޕިއަން ޓީމަކަށް ސުޕަރ ލީގުގެ އޮޓެމެޓިކް ޖާގައެއް ލިބިގެންދާނެއެވެ.