ސޮރީ، ރައީސް ޞާލިހަށް ދެވަނަ ދައުރެއް ދެވޭކަށް ނެތް: އާޒިމް
"އަމާން ރާއްޖެ" ހޯދައިދޭނެކަމަށް ވައުދުވެވަޑައިގެން ނަމަވެސް މި ފަސް އަހަރުގައި ފެންނަމުންދާ ކަންކަމަށް ބައްލަވާފައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ވެރިކަމުގެ ދެވަނަ ދައުރެއް ދެވެން ނެތްކަމަށް ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެންބަރު ޢަލީ އާޒިމް ވިދާޅުވެއްޖެ އެވެ.
އާޒިމް މިފަދައިން ވިދާޅުވެފައި މިއަހަރުގެ ރިޔާސީ އިންތިޚާބުގެ ކެމްޕޭނުގައި ރައީސް ޞާލިހުގެ ސްލޯގަން "އަމާން ރާއްޖެ" އަށް ފާޑުވިދާޅުވެ ދަ ޑިމޮކްރެޓްސްގެ ޖަގަހަ ޖަލްސާގައި ވާހަކަދައްކަވަމުން ނެވެ.
އާޒިމް ވިދާޅުވީ ރައީސް ޞާލިހުގެ ވެރިކަމުގެ ފަސް އަހަރަކީ ރާއްޖޭގެ ތާރީހުގައި ނުދެކޭފަދަ ނުރައްކާތެރި މަރުތައް ހިނގާފައިވާ ފަސް އަހަރު ކަމަށެވެ. އަދި ގޮތް ނޭނގޭ މަރުތައް ވެސް އިންތިހާއަށް ގިނަ ދައުރެއް ކަމަށެވެ.
އޭގެ އިތުރުން މަސްތުވާތަކެތި އާންމުވެ، މާރާމާރީތައް އިންތިހާއަށް ރައީސް ޞާލިހުގެ ވެރިކަމުގެ މި ދައުރުގައި އިތުރުވެފައިވާކަމަށް އާޒިމް ވިދާޅުވި އެވެ.
އޭގެ އިތުރުން އޭނާ ވިދާޅުވީ މި ވެރިކަމުގައި ތާރީޚުގައި ވެސް ޝަރުއީ ނިޒާމަށް "އަތް ނުބާނާ" ވަރަށް އަތްބާނާ ނުފޫޒު ފޯރުވާފައިވާ ކަމަށެވެ. އަދި ތާރީޚުގައި ވެސް ނުދެކޭފަދަ ބޮޑެތި ކޮރަޕްޝަން ރައީސް ޞާލިހުގެ ވެރިކަމުގެ ފުރަތަމަ ދައުރުގައި ހިންގާފައިވާކަމަށް އާޒިމް ވިދާޅުވި އެވެ.
އެކަންކަން ފާހަގަކުރައްވާ އާޒިމު ވިދާޅުވީ މީ އަމާން ރާއްޖެ ކަމުގައި ވާނަމަ، މިފަދަ ދެވަނަ ދައުރެއް ހޯދަން އެމަނިކުފާނު އިންތިޚާބު ކުރުމަކީ ކުރެވޭނެ ކަމެއް ނޫން ކަމަށެވެ. އަދި އަމާން ރާއްޖެއެއް ހޯދަން ރައީސް ޞާލިހަށް ދެވަނަ ދައުރެއް ދޭން ޖެހޭ އެއްވެސް ސަބަބެއް ނެތްކަމަށް އާޒިމް ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
