10:30 ގެ ފަހުން މަޖިލީހުން ރައީސް ނަޝީދު ނުފެނުމަކީ ބޮޑު ހިތާމައެއް: އިސްމާއީލް

ރައްޔިތުން މަޖިލީހުގެ ރައީސް މުހައްމަދު ނަޝީދު، 10:30 ގެ ފަހުން މަޖިލީހުގެ ޖަލްސާތަކުން ނުފެނުމަކީ ވަރަށް ބޮޑު ހިތާމައެއް ކަމަށް ދުވާފަރު ދާއިރާގެ މެންބަރު އިސްމާއީލް އަހްމަދު ވިދާޅުވެއްޖެ އެވެ.

މެމްބަރު އިސްމާއީލް މިފަދައިން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާ ފައްޓަވަމުން، މެންބަރުން ވަގުތަށް މަޖިލީހަށް ހާޒިރުނުވާތީ ރައީސް ނަޝީދު ނުރުހުން ފާޅުކުރެއްވުމާއި ގުޅިގެންނެވެ.

އެގޮތުން ރައީސް ނަޝީދަށް ރައްދުދެއްވަމުން އިސްމާއީލް ވިދާޅުވީ، ބޮޑު މުސާރައާއި އިނާޔަތްތައް ނަންގަވައިގެން ތިއްބަވައި މަޖިލީހުގެ ރައީސްއާއި ނައިބު ރައީސް ކޮންމެ ދުވަހަކު ދިހަގަޑި ބައިގެ ފަހުން ޖަލްސާއިން ނުފެނުމަކީ ބޮޑު ހިތާމައެއް ކަމަށެވެ.

"10:30 ގެ ފަހުން މަޖިލީހުގެ ރައީސް ޖަލްސާއިން ފެނުމަކީ ހުދު ކާޅެއް ފެނުން ކަހަލަ ކަމެއް." އިސްމާއީލް ވިދާޅުވި އެވެ.

ރައްޔިތުންގެ މަޖިލީހުގެ މިއަދުގެ ޖަލްސާ ފައްޓަވައިދެއްވަމުން މެންބަރުންގެ ހާޒިރީ ވިދާޅުވަމުން ރައީސް ނަޝީދު ވިދާޅުވީ ރައްޔިތުންގެ މަޖިލީހުގައި ޖުމުލަ 87 މެންބަރުން ތިއްބަވާ ކަމަށެވެ. އެހެން ނަމަވެސް, މަޖިލީހަށް ހާޒިރުވާން ޖެހޭ ވަގުތު ފަހަނަ އަޅައި ގޮސް، ރަންގަބީލު ޖެހުމަށްފަހުގައި ހާޒިރުވެ ތިބި މެންބަރުންގެ އަދަދު ކަމަށްވެސް އެމަނިކުފާނު ވިދާޅުވިއެވެ.

"އެނގިވަޑައިގަންނަވާނެ މިއީ 87 މެންބަރުންގެ މަޖިލީހެއް. އަދި ކޮންމެ އިއްޒަތްތެރި މެންބަރަކަށްވެސް އިންތިހާއަށް މުސާރަ ލިބިވަޑައިގަންނަވާނެ. ކޮމިޓީ އެލަވަންސް އެހާމެ ގިނައިން ލިބިވަޑައިގަންނަވާ. މެންބަރެއްގެ މުސާރައިގެ ގޮތުގައި 80 ހާހަށްވުރެ ގިނަ ރުފިޔާ، އެބަ ގެއަށް ގެންދަވާ." ރައީސް ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ، މެންބަރުން މަޖިލީހަށް އިންތިހާބުވެވަޑައިގެންފައިވަނީ ރައްޔިތުންގެ ވާކީލުންގެ ގޮތުގައި ކަމަށެވެ. އަދި އެ ރައްޔިތުން މެންބަރުން އިންތިޚާބުކުރީ ރައްޔިތުން މަޖިލީހުގައި ތަމްސީލް ކުރުމަށް ކަން ފާހަގަކުރައްވައި ރައީސް ނަޝީދު ވިދާޅުވީ، ކަން އެހެން އޮތް އިރު މެންބަރުން މަޖިލީހަށް "ވަޑައިނުގަންނަވާ ކަމީ ވަރަށް ބޮޑު ހިތާމައެއް" ކަމަށެވެ.