ދައުލަތުގެ ޚަރަދުގައި މީހުން ހައްޖަށް ފޮނުއްވުމަށް ވީ ވަޢުދާއެއްގޮތަށް ފޮނުވާ ފުރަތަމަ ބެޗް އަންނަ އަހަރު!

ދަޢުލަތުގެ ޚަރަދުގައި މީހުން ހައްޖަށް ފޮނުއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވަޢުދުފުޅާއި އެއްގޮތަށް، ހައްޖަށް ފޮނުވާ ފުރަތަމަ ބެޗު، އަންނަ އަހަރު ފޮނުވޭނެ ކަމަށް އިސްލާމީ ކަންތައްތަކާއިބެހޭ ވުޒާރާގެ ވަޒީރު ޑރ މުހައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

މިކަން އިޢުލާން ކުރައްވައި ޝަހީމް މިއަދު ކުރެއްވި ޓްވީޓެއްގައި ވިދާޅުވީ، ދައުލަތުގެ ޚަރަދުގައި ހައްޖަށް ފޮނުއްވާ ފުރަތަމަ ބެޗުގައި ހައްޖަށް ފޮނުވާ މީހުންގެ އަދަދު ކޯޓާގެ ރަސްމީ އަދަދު ހަމަ ޖެހުމުން އިއުލާން ކުރެވޭނެ ކަމަށެވެ.

އަދި ދައުލަތުގެ ޚަރަދުގައި ހައްޖަށް ފޮނުވުމުގެ އުސޫލު ވަރަށް އަވަހަށް އިޢުލާން ކުރެވޭނެ ކަމަށްވެސް ޝަހީމް ވިދާޅުވި އެވެ.

ޑރ. މުހައްމަދު މުއިއްޒުގެ ރިޔާސީ ކެންޕެއިންގެ ތެރެއިން، މ. މުލަކުގައި ބޭއްވި ޖަލްސާގައި ވާހަކަ ދައްކަވަމުން އެމަނިކުފާނު ވަނީ، އެ މަނިކުފާނުގެ ވެރިކަމުގެ 5 އަހަރުގެ ތެރޭގައި ރާއްޖޭގެ 1000 ނިކަމެތިން ހިލޭ ހައްޖަށް ފޮނުއްވައިދެއްވާނެ ކަމަށް ވަޢުދުވެވަޑައިގެންފައެވެ.

އަދި އެގޮތުން މީހުން ހައްޖަށް ފޮނުވުމުގައި އަމިއްލަ ފައިސާއިން ހައްޖަށް ދިއުމަށް ނުކުޅެދިފައިވާ ނިކަމެތިންނަށް އިސްކަން ދެއްވާނެ ކަމަށް އެމަނިކުފާނު ވިދާޅުވިއެވެ.

މީގެ އިތުރުން ސައުދި އަރަބިއާއިން ރާއްޖެއަށް ދޫކުރާ ހައްޖު ކޯޓާ 1،000 އިން 2،000 އަށް އިތުރު ކުރަން މަސައްކަތް ކުރައްވާނެ ކަމަށް މުޢިއްޒު ވިދާޅުވެފައިވާއިރު, އެކަމާއި ގުޅޭ މަޝްވަރާތައް މިހާރު ފެށިފައިވާ ކަމަށް މިނިސްޓަރ ޝަހީމް ވަނީ ވިދާޅުވެފަ އެވެ.