"ކުރީ ސަރުކާރުން އޮތީ ބުރިޖް ނިންމުން 2026 އަށް ފަސްކޮށްފަ؛ އެކަން ކުރީ މަޝްވަރާކުރުމެއްނެތި"
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރު ނިމެން އެއް ދުވަހަށް ވެފައިވަނިކޮށް ތިލަމާލެ ބުރިޖުގެ އެއްބަސްވުން އައުކޮށް، އެ މަޝްރޫއު ނިންމާ ތާރީޚް 2026އަށް ފަސްކޮށްފައިވާ ކަމަށް މި ސަރުކާރުގެ އިމާރާތް ކުރުމާއި ބިނާރާ ބެހޭ ވުޒާރާގެ ވަޒީރު ޑރ. އަބުދުالله މުއްތަލިބު ވިދާޅުވެއްޖެއެވެ.
ތިލަމާލޭ ބުރިޖުގެ މަސައްކަތާއި ގުޅޭގޮތުން މަޢުލޫމާތު ދެއްވުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްވަމުން މިނިސްޓަރ މުއްތަލިބު ވަނީ، ބްރިޖުގެ މަސައްކަތް އެންމެ ކުރިން ޕްލޭން ކުރެވުނު ގޮތަށް ކުރިއަށް ދެވުނު ނަމަ، ނިމެންޖެހޭ ތާރީޚާއި, އަދި މިހާރު އެ މަސައްކަތް ކުރިއަށް ގޮސްފައިވާ ތާރީޚަށް އަލިއަޅުވާ ލައްވައި ވާހަކަ ދައްކަވާފައެވެ.
މިނިސްޓަރު ވިދާޅުވި ގޮތުގައި އެ މަސައްކަތް ލަސްވުމުގައި ކުރީ ސަރުކާރާއި އެފްކޮންސްގެ ފަރާތުންވެސް ޝަކުވާތައް ހުށަހަޅާފައިވާ ކަމަށެވެ. ޚާއްސަކޮށް އެފްކޮންސް އިން އެ މަސައްކަތް ކުރިއަށް ގެންދިޔުމަށް ހުރި ދަތިތަކާއި ގުޅިގެން ގިނަ ޝަކުވާތަކެއް ކޮށްފައިވާ ކަން މިނިސްޓަރ ފާހަގަކުރެއްވިއެވެ. އެ ޝަކުވާ ތަކަށް ބަލައި، ކުރީ ސަރުކާރު ނިމެން ކައިރިވެފައި ވަނިކޮށް އެކުންފުންޏާއި އެކުވެފައިވާ އެއްބަސްވުން އަލުން އައު ކޮށްފައިވާ ކަން މިނިސްޓަރ ވަނީ ހާމަކުރައްވާފައެވެ.
"އެ މަސައްކަތް ލަސްވެގެން ދިޔައީމާ ކޮންޓްރެކްޓަރ އަށް ލަސްވުމަށް އަރާ ޖޫރިމަނާގެ އަދަދަކީވެސް ފުދޭވަރަކަށް ބޮޑު އަދަދެއް. އެހެންވީމާ ދެފަރާތުން (ކުރީ ސަރުކާރާއި އެފްކޮންސް) މަޝްވަރާކޮށްފައި 16 ނޮވެމްބަރ 2023 ގައި، ސަޕްލިމެންޓްރީ އެގްރީމެންޓެއްގައި ސޮއި ކޮށްފައި މިއޮތީ. އާ ސަރުކާރާއި ހަވާލުވުމުގެ ކުރިން މިއޮތީ ސަޕްލިމެންޓްރީ އެގްރީމެންޓެއްގައި ސޮއި ކޮށްފައި. އެގްރީމެންޓް ގައި ވާގޮތުން މިހާރު މަސައްކަތް ނިންމަންޖެހެނީ 30 ސެޕްޓެމްބަރު 2026"
އިމާރާތް ކުރުމާއި ބިނާރާ ބެހޭ ވުޒާރާގެ ވަޒީރު ޑރ. އަބުދުالله މުއްތަލިބު
މިނިސްޓަރު މުއްޠިބު ވިދާޅުވީ އެ އެއްބަސްވުމަކީ ކުރީ ސަރުކާރާ ދެމެދު ހަދާފައިވާ އެއްބަސްވުމަކަށް ވީ ނަމަވެސް، މި ސަރުކާރުންވެސް އެ އެއްބަސްވުމަށް އިހުތިރާމް ކުރާންޖެހޭނެ ކަމަށާ، އަދި އެއްބަސްވުމަށް އިހްތިރާމް ކުރައްވާނެ ކަމަށެވެ.
އުސޫލެއްގެ ގޮތުން އަޅުގަނޑުމެންނަށް މިހާރު ކުރެވޭނެ ކަމަކީ މި ޝެޑިއުލުން ކައްސައިނުލާ ދިއުން. އެއީ މިހާރު އެންމެ މުހިއްމު އެއް ކަންތައް. ދެވަނަ ކަމަކީ ޝެޑިއުލުން ކައްސައިނުލާ އަދި އަޅުގަނޑުމެންނަށް އަވަސް ކުރެވޭނެ ގޮތްތަކެއް ހުރިތޯ ބަލާފައި އަވަސް ކުރެވޭނެ ގޮތްތަކެއް ހޯދުން.
އިމާރާތް ކުރުމާއި ބިނާރާ ބެހޭ ވުޒާރާގެ ވަޒީރު ޑރ. އަބުދުالله މުއްތަލިބު
މީގެ އިތުރުން މުއްތަލިބު ވިދާޅުވީ ސަޕްލިމެންޓްރީ އެއްބަސްވުމެއްގައި ސޮއި ކޮށްފައިވަނީ މަޝްރޫއަށް އިތުރު ޚަރަދެއް ނުދާގޮތަށް ކަމަށެވެ.
ތިލަމާލެ ބުރިޖު ނިންމާނެ ކަމަށް ކުރީ ސަރުކާރުން އެކި ތާރީޚް ދީފައިވާއިރު, އެންމެ ފަހުން ދިން ތާރީޚަކީ 27 މެއި 2024 އެވެ. ނަމަވެސް އެ މަޝްރޫއުގެ މިހާތަނަށް ނިމިފައިވަނީ 29 އިންސައްތަ ކަމަށް މިނިސްޓަރ ވަނީ ފާހަގަކުރައްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
