ރައީސް ޔާމީން އައު ޕާޓީއެއް އުފައްދަވަން ނިންމަވައިފި!
ކުރީގެ ރައީސް އަދި ޕީޕީއެމްގެ ލީޑަރ ރައީސް ޔާމީން އަބްދުލްގައްޔޫމް ޕީޕީއެމުން ވަކިވެވަޑައިގެން އައު ޕާޓީއެއް އުފައްދަވަން ނިންމަވައިފިއެވެ.
ރައީސް ޔާމީން ޕީޕީއެމުން ވަކިވެވަޑައިގަންނަވަން ނިންމެވިމަން އެމަނިކުފާނުގެ އިސް ގާނޫނީ ވަކީލު، ޑރ. މުހައްމަދު ޖަމީލް އަހުމަދު ޗެނަލް 13 އަށް ދެއްވި ބަސްދީގަތުމެއްގައި ވަނީ ކަށަވަރު ކޮށްދެއްވާފައިވާފައެވެ.
ޑރ. ޖަމީލް ވިދާޅުވި ގޮތުގައި، ރައީސް ޔާމީން ޕީޕީއެމުން ވަކިވެވަޑައިގަންނަވަން ނިންމެވީ، ރައީސުލްޖުމްހޫރިއްޔާ ޑރ މުހައްމަދު މުއިއްޒު ވެރިކަމަށް އިންތިޚާބުވެ ވަޑައިގެންނެވުމާއިއެކު، ޕީޕޯއެމްގެ ލީޑަރޝިޕްގެ ބޭފުޅުން، ސަރުކާރުގެ މަގާމްތަކަށް ވަޑައިގެން، އެމަނިކުފާނާ ދުރަށް ޖެހިވަޑައިގެން، ކަންކަމުގައި އެމަނިކުފާނުގެ މަޝްވަރާ ނުހޯއްދަވައި ނިންމެވުންތައް ނިންމަވަމުން ދާތީއެވެ.
އަދި މީގެ އިތުރުން، ރައީސް މުޢިއްޒުގެ ކެންޕެއިންގެ ތެރެއިން ރައީސް ޔާމީންގެ ފިކުރު ދިރުއްވާނެ ކަމަށް ވިދާޅުވެ، އެ ވާހަކަތައް ދައްކަވާފައި ވެރިކަމަށް ވަޑައިގެންނެވި ފަހުން، ރައީސް ޔާމީން ގުޅުއްވުމުންވެސް ރައީސް މުޢިއްޒު ފޯނު ނުނަންގަވާ ކަމަށް ޖަމީލް ވިދާޅުވި އެވެ.
މިއާއެކު، ޖަމީލް ވިދާޅުވީ، ރައީސް ޔާމީންގެ ތަރައްގީގެ ފިކުރު ކުރިއެރުވުމަށްޓަކައި، ކުރިއަށް އޮތް ތަނުގައި އެމަނިކުފާނުގެ ވިސްނުން ހުންނެވީ އައު ޕާޓީއެއް އުފެއްދެވުމަށް ކަމަށެވެ.
"ޕީޕީއެމްގެ ލީޑަރޝިޕްގެ އަމަލުތަކާއި، އެބޭފުޅުން ޢަމަލު ކުރައްވަމުން ގެންދަވާ ގޮތާއި، އަދި އެބޭފުޅުން އެމަނިކުފާނުގެ މަޝްވަރާ ހޯއްދަވަން ބޭނުން ނުވާތީއާ، އެމަނިކުފާނުގެ ޚިޔާލުވެސް އެބޭފުޅުން ބޭނުން ނުވާތީއާ، މިކަންތައްތައް މިހެން އޮތުމުން، މިރޭ ރައީސް ޔާމީން ނިންމަވާފައި މިވަނީ ޕީޕީއެމް ދޫކުރައްވަން. އަދި ހަމައެހެންމެ، އެމަނިކުފާނު މިހާރު ވަނީ ނިންމަފާައި އެމަނިކުފާނުގެ ސިޔާސީ މަސައްކަތްޕުޅު، އަދި އެމަނިކުފާނުގެ ސިޔާސީ ފިކުރު، ސިޔާސީ ވިސްނުން، ކުރިއަށް ގެންދިޔުމަށްޓަކައި އެމަނިކުފާނު ވަނީ ނިންމަވާފައި ސިޔާސީ ޕާޓީއެއްވެސް އުފައްދަވަން"
ޑރ. މުހައްމަދު ޖަމީލް އަހުމަދު
ޖަމީލްގެ ބަސްދީގަތުމުގައި އޭނާވަނީ، ރައީސް މުޢިއްޒު ވެރިކަމަށް ވަޑައިގެންނެވީ ރައީސް ޔާމީންގެ ނަންފުޅު ބޭނުންކުރައްވައިގެން ކަމަށްވީ ނަމަވެސް އެމަނިކުފާނާއި ޕީޕީއެމްގެ ލީޑަރޝިޕުން ރައީސް ޔާމީނަށް ވަރަށްބޮޑަށް ބޭވަފާތެރި ވެފައިވާ ކަމަށް ތަކުރާރުކޮށް ވިދާޅުވެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
