11 އަހަރު ތެރޭގައި ބިދޭސީން ގެންނަން، 5 ލައްކައަަށް ވުރެ ގިނަ ކޯޓާ ދޫކުރިކަން ހާމަވެއްޖެ

ދިވެހި ރާއްޖެއަށް ބިދޭސީން ގެނައުމަށް ފާއިތުވެދިޔަ 11 އަހަރު ތެރޭގައި 5 ލައްކަ އަށް ވުރެ ގިނަ ކޯޓާ ދޫކޮށްފައިވާކަން ހާމަވެއްޖެއެވެ.

އިކޮނޮމިކް މިނިސްޓްރީން އާންމުކުރި ތަފާސްހިސާބުތަކާއި އެކްސްޕެޓް ސިސްޓަމްގެ ރިޕޯޓުގައި ވަނީ 2013 ވަނަ އަހަރުން ފެށިގެން މި އަހަރާ ހަމަޔަށް، 523،755 ކޯޓާ ދޫކޮށްފައިވާ ކަމަށެވެ.

އެންމެ ގިނަ އަދަދަކަށް ކޯޓާ ދޫކޮށްފައިވަނީ 2018 ވަނަ އަހަރުއެވެ. އެ އަހަރު ވަނީ 97،263 ކޯޓާ ދޫކޮށްފައިއެވެ. ދެން އެންމެ ގިނަ ކޯޓާ ދޫކޮށްފައިވަނީ 2013 ވަނަ އަހަރު ކަމަށާއި އެ އަހަރު 93،312 ކޯޓާ ދޫކޮށްފައި ވާކަމަށް އިކޮނޮމިކް މިނިސްޓްރީ ތަފާސް ހިސާބު ތަކުން ދައްކައެވެ.

އެންމެ މަދުން ކޯޓާ ދޫކޮަށްފައިވާ އަހަރު ކަމަށް  ތަފާސްހިސާބުތަކާއި އެކްސްޕެޓް ސިސްޓަމްގެ ރިޕޯޓުން ދައްކަނީ 2020 ވަނަ އަހަރެވެ. އެއީ 7،774 ކޯޓާއެވެ. މީގެ ސަބަބެއް ކަމަށް ބޮޑަށް ބެލެވެނީ ކޮވިޑްގެ ބަލިމަޑު ކަމާއި އެއަހަރު ކުރިމަތި ލާން ޖެހުމެވެ.

މި ހިނގާ 2023 ވަނަ އަހަރުގެ ނިމުމަމަކާއި ހިސާބަށް އައިސްފައި ވާއިރު މިއަހަރު ތެރޭގައި ޝަރުތު ހަމަވާ 33،254 ކޯޓާ ވަނީ ދޫކޮށްފައެވެ.

މިނިސްޓްރީގެ ރިޕޯޓުގައި ކޯޓާތަކަށް ކޮންމެ އަހަރަކުވެސް ފާހަގަ ކުރެވޭ ބަދަލެއް އައިސްފައި ވާކަން ވަނީ ފާހަގަ ކުރައްވާފައެވެ. އަދި ހުށަހަޅާފައިވާ ޑޭޓާއިން ދައްކުވައިދެނީ ހަމައެކަނި ދޫކޮށްފައިވާ ޝަރުތު ހަމަވާ ކޯޓާ ތަށް ކަމަށާއި އެއީ މިހާރު ބޭނުންކުރާ ކޯޓާ ސްލޮޓްތައް ނޫންކަމަށްވެސް ބުނެފައިވެއެވެ.

ކޯޓާ ސްލޮޓްތަކުގެ ސައްހަކަން ގުޅިފައިވަނީ އެ ސްލޮޓްތަކުގެ ކޯޓާއާއި ސްލޮޓް ފީ ދެއްކުމުގެ މުއްދަތާ އެވެ. ޕެއިޑް ސްލޮޓްތަކުގައި ހުންނައިރު، ސިސްޓަމް ސްލޮޓްތަކުގައި މުއްދަތެއް ނެތް ސައްހަ މުއްދަތެއް ކަނޑައެޅިފައިވެ އެވެ.