ސާކާއަށް ލިބުނު އަނިޔާ ސީރިއަސްވެ ބައެއް މެޗްތައް ގެއްލުމުގެ ނުތަނަވަސްކަން
ޗެމްޕިއަންސް ލީގުގައި ބަޔާން މިއުނިކާ ދެކޮޅަށް ކުޅުނު މެޗުގައި، އާސެނަލްގެ މުހިންމު ކުޅުންތެރިޔާ ބުކާޔޯ ސަކާގެ ފައިގެ ފަލަމަސްގަނޑަށް ލިބުނު އަނިޔާއާ ގުޅިގެން އޭނާ ގާތްގަނޑަކަށް އަށް ހަފުތާއަށް ކުޅުމާ ދުރަށް ދާންޖެހިދާނެ ކަމުގެ ބިރު ހީވެއްޖެއެވެ.
އުމުރުން 25 އަހަރުގެ ސަކާއަށް މި އަނިޔާ ލިބުނީ ބުދަ ދުވަހުގެ ރޭ ކުޅުނު މެޗު 2-2 އިން އެއްވަރުވެފައި ވަނިކޮށެވެ. މީޑިއާގެ ރިޕޯޓްތައް ބުނާގޮތުގައި އަނިޔާގެ ސީދާ މިންވަރު ދެނެގަތުމަށްޓަކައި ހުކުރު ދުވަހު އޭނާގެ އެމް.އާރް.އައި ސްކޭނެއް ހެދުމަށް ވަނީ ހަމަޖެހިފައެވެ. މި އަނިޔާގެ ސަބަބުން ސަކާއަށް މަދުވެގެން ހަ ހަފުތާގެ މުއްދަތެއް ގެއްލޭނެކަމަށް އާސެނަލްގެ މެޑިކަލް ޓީމުން ވަނީ ލަފާކޮށްފައެވެ.
މިކަމާ ގުޅިގެން އާސެނަލްގެ ކޯޗު މިކޭލް އާޓެޓާ ބުނީ، މިއީ ހަމަ ކުޅުންތެރިއަކަށްވެސް އަތުވެދާނެ ދުވަހެއް ކަމަށެވެ. އަނިޔާވި ހިސާބުގައި ފެން ހެދިފައި ހުރުމުގެ ސަބަބުން އަނިޔާގެ ފުންމިން ދެނެގަތުމަށް މިވަގުތު އުނދަގޫތަކެއް ހުރި ނަމަވެސް، އިތުރު ސްކޭންތަކަށްފަހު ވަރަށް އަވަހަށް ސީދާ ގޮތެއް އެނގޭނެ ކަމަށް އަޓޭޓާ ބުންޏެވެ.
ސަކާގެ މި އަނިޔާއަކީ ޕްރިމިއާ ލީގުގެ ތަށި ހޯދުމަށް މަސައްކަތްކުރާ އާސެނަލަށް ލިބުނު ވަރަށް ބޮޑު ލޮޅުމެކެވެ. މި އަނިޔާގެ ސަބަބުން، ލީގުގައި އެވަަޓަންއާ ދެކޮޅަށް ކުޅޭ މެޗުގެ އިތުރުން، އިންގްލެންޑް ގައުމީ ޓީމުން ކުރިއަށް އޮތް ޔޫއެފާ ނޭޝަންސް ލީގުގައި ކްރޮއޭޝިއާ އާއި ސްޕެއިނާ ދެކޮޅަށް ކުޅޭ މެޗުތައްވެސް ސަކާއަށް ގެއްލޭނެ ކަމަށް ބެލެވެއެވެ.
ފާއިތުވި ދެ ސީޒަނުގައިވެސް ސަކާއަށް ވަނީ ތަފާތު އަނިޔާގެ މައްސަލަތައް ކުރިމަތިވެފައެވެ. އެގޮތުން ކޯނާ މަސްގަނޑާއި، އުނަގަނޑު އަދި ފައިގެ ފަހަތު މަސްގަނޑަށް ލިބުނު އަނިޔާތަކާ ގުޅިގެން އޭނާ ވަނީ މީގެ ކުރިންވެސް މުހިންމު މެޗުތަކަކުން ބާކީވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
