އެމްޖޭއެސް ރާބަދި ޗެލެންޖު; ރޭ ކުޅުނު މެޗްތައް ކާމިޔާބުކުރީ މާމުނަގައު އަދި ފާރުފުށި

ރ.މީދޫގައި މިހާރު ކުރިއަށްދާ އެމްޖޭއެސް ރާބަދި ޗެލެންޖުގައި ރޭ ކުޅުނު މެޗްތައް މާމުނަގައު އަދި ފާރުފުށި ކާމިޔާބުކޮށްފިއެވެ.

އެމަރަލްޑް ފާރުފުށި ރިސޯޓް ބައްދަލުކުރީ ދިގަލި މޯލްޑިވްސް އާ ދެކޮޅަށެވެ. މިމެޗް 3-1 ގެ ނަތީޖާއަކުން ކާމިޔާބުކުރީ ފާރުފުއްޓެވެ. ދިގަލި މޮޅަށް ކުޅުނު މިމެޗްގައި ފާރުފުށިން ވަނީ މެޗްގެ ވަރަށް ކުރީކޮޅު ލީޑް ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ފުރަތަމަ މިނެޓް ތެރޭގައި މުހައްމަދު އަލީފެވެ. ފާރުފުށިން ލީޑް ނެގިތާ މިނެޓެއް ނުވެ ޝުއައިދު ވަނީ އިތުރު ލަނޑެއް ޖަހައި ލީޑް ފުޅާކޮށްދީފައެވެ.

ފާރުފުށިން ލަނޑެއް ޖަހާފައިވަނިކޮށް ދިގަލީގެ ހަސަން ވަނީ 21 ވަނަ މިނެޓް ތެރޭގައި ލަނޑެއް ޖަހައި މެޗްގެ ނަތީޖާ 2-1 އަށް ބަދަލުކޮށްފައެވެ. މެޗްގައި ފާރުފުށިން ޖެހި ތިންވަނަ ލަނޑު ކާމިޔާބުކޮށްދިނީ މުހައްމަދު އަލީފެވެ. މިމެޗްގައި ފާރުފުށިން ޖެހި ތިން ލަނޑުޖަހަން އެސިސްޓްކޮށްދިނީ އިބްރާހިމް ޒައިދެވެ.

ރޭ ކުޅުނު އަނެއް މެޗްގައި އިންޓަރ ކޮންޓިނެންޓަލް މޯލްޑިވްސް މާމުނަގައު އާއި އެމަރަލްޑް މޯލްޑިވްސް ބައްދަލުކުރިމެޗް މާމުނަގައު ކާމިޔާބުކުރީ 3-2 ގެ ނަތީޖާއަކުންނެވެ.

މެޗްގައި އެންމެ ފުރަތަމަ ލަނޑެއް ޖަހައި ކުރި ހޯދީ އެމަރަލްޑެވެ. އެއީ މެޗް ފަށައިގެން ދެވަނަ މިނެޓް ތެރޭގައި ޝައްމޫން ކާމިޔާބުކޮށްދިން ލަނޑުންނެވެ. މެޗްގައި ފެނިގެންދިޔަ ދެވަނަ ލަނޑަކީ އެމަރަލްޑްގެ މުހައްމަދު އަހުމަދުގެ އަތުން ބައިކޮޅަށްވަތް ލަނޑެކެވެ. މެޗްގައި ދެން މާމުނަގައުގެ ލަނޑުތައް ޖަހައިދިނީ ފަރޮމުޒު އަދި އިބްރާހީމް ރާއީއެވެ. އެމަރަލްޑްގެ ދެވަނަ ލަނޑު ޖަހައިދިނީ އަހުމަދު އަޝްފާގުއެވެ.

އެމްޖޭއެސް ރާބަދި ޗެލެންޖުގެ ދެ މެޗެއްގެ ކުޅުން މިރޭވެސް އޮންނާނެއެވެ. ފުރަތަމަ މެޗްގައި ރާޔާ ނިކުންނާނީ ޖޯއްޔާ ދެކޮޅަށެވެ. ދެވަނަ މެޗްގައި ސްޓާންޑަޑް ނިކުންނާނީ ކޮތައިފަރާ ދެކޮޅަށެވެ.