ކޮރެއާ އަތުން މޮޅުވެ ކޮލަމްބިއާ އިން މުބާރާތް ފެށީ އިތުބާރާއެކު

އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް އެޗްގައި މި އަދު ހެނދުނު ކުޅެވުނު ފުރަތަމަ މެޗުގައި 2-0 ގެ ނަތީޖާއަކުން ސައުތު ކޮރެއާ ބަލިކޮށް ކޮލަމްބިޔާ އިން މުވާރާތުގެ ފެށުން ރަނގަޅުކޮށްފި އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަމަ ހާފުގައި ކޮލަމްބިޔާ ޓީމުން މެޗުގެ ލީޑު ހޯދީ ފުރަތަމަ ހާފުގެ 30 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ނެވެ. މި ލަނޑު އެޓީމަށް ކާމިޔާބުކޮށްދިނީ ފޯވާޑް ކެޓަލީނާ އެވެ. މިއީ ސައުތު ކޮރެއާގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއެއްގެ އަތުގައި ބޯޅަ ޖެހުމުން ރެފްރީ ދިން ޕެނަލްޓީއެކެވެ.

މި މެޗުގައި ކޮލަމްބިއާ އިން ކާމިޔާބުކުރި ދެވަނަ ލަނޑު ފުރަތަމަ ހާފުގެ 39 ވަނަ  މިނެޓުގައި ކާމިޔާބުކޮށްދިނީ އެޓީމުގެ ރެއާލް މެޑްރިޑް ފޯވާޑް ލިންޑާ ކެއިސެޑޯ އެވެ.

މިއީ ކޮރެއާގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއެއް ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. މި ލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން ކޮލަމްބިޔާ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ކޮލަމްބިޔާ އިން އެޓީމުގެ ކުޅުން އިތުރަށް ވަރުގަދަކޮށް ގިނަ ހަމަލާތަކެއް ކޮރެއާގެ ގޯލަށް ފޮނުވާލިއިރު، މި ހާފުގައި ކޮރެއާގެ ފަރާތުން ފެނިގެންދިޔައީ ވަރަށް އާދައިގެ ކުޅުމެކެވެ.

ދެވަނަ ހާފުގައި ކޮލަމްބިޔާ އިން ކޮރެއާގެ ގޯލަށް 10 ހަނަކާއެއް ފިނުވާލި ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 2-0 ގެ ނަތީޖާއަކުން ކޮލަމްބިޔާ ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ގުރޫޕް އެޗުގެ ދެވަނައިގައި މި ވަގުތު ލަނޑުގެ ތަފާތުން އޮތީ ކޮލަމްބިއާ އެވެ. އެއްވަނައިގައި އޮތީ ތިން ޕޮއިންޓާއި ފައިދާ 6 އެކު އޮތް ޖަރުމަނެވެ. އަދި މި މެޗުން ބަލިވި ކޮރެއާ އަށާއި މި ގުރޫޕްގައި ދެން ހިމެނެނީ މޮރޮކޯ އަށް އަދި ޕޮއިންޓެއް ނުލިބެއެވެ.