އަޅުގަނޑުގެ ޒަމީރު ގަބޫލުނުކުރާ ކަންކަންވެސް އީސީ ތެރޭގައި އެބަ ހިނގާ: ފުއާދު

އެބޭފުޅާގެ ޒަމީރު، އެއީ ރަނގަޅު ކަންކަމުގެ ގޮތުގައި ގަބޫލު ނުކުރާ ކަންކަން ވެސް އިލެކްޝަންސް ކޮމިޝަންގެ ތެރޭގައި ހިނގަމުންދާ ކަމަށް، އެ ކޮމިޝަންގެ ރައީސް ފުއާދު ތައުފީގު ވިދާޅުވެއްޖެއެވެ.

ފުއާދު އޮންލައިން ނޫހަކަށް ދެއްވި ބަސްދީގަތުމެއްގައި ވަނީ އޭނާ  އީސީގެ ރައީސް ކަމުން އިސްތިއުފާ ދެއްވައިފިނަމަ "މިހާރު މިވާ ވަރުވެސް ނުވާނެ" ކަމަށް ވިދާޅުވެފައެވެ. އެފަދައިން އެ ވިދާޅުވި ސަބަބު "ވޮއިސް" އަށް ދެއްވި ޚާއްސަ ބަސްދީގަތުމެއްގައި ފުއާދު ވަނީ ހިއްސާކުރައްވާފައެވެ.

"ބައެއް ކަހަލަ ކަންތައްތައް ހަމައެބަހުރި، ހަމަ އަޅުގަނޑުގެ ޒަމީރު ގަބޫލު ނުކުރާ ގޮތަށް މިތަނުން ހިނގާފައި ހުރި. ދެން އަޅުގަނޑު އެ ވާހަކަ ދައްކައިފިއްޔާ އެއީ މާ ބޮޑެތި މައްސަލަތަކަށް ވެގެންދާނެ."

ފުއާދު ތައުފީގު

މިއާއެކު ފުއާދު އެފަދައިން ވިދާޅުވަނީ، އިލެކްޝަންސް ކޮމިޝަންގެ ތެރޭގައި މިނިވަން އިންތިހާބަކަށް ހުރަސްއެޅޭ ފަދަ ކަންކަން ހިނގާތީތޯ ވޮއިސް އިން ސުވާލު ކުރުމުން ފުއާދު ވަނީ، އެކަމަށް އެއްބަސްވެ ވަޑައިގެންފައެވެ.

"ޕާޓީތަކަށް އަސަރު ކުރާކަހަލަ ކަންތައްތައް އޭގެ ތެރޭގައި އެބަހުރި. ހަމަ އަޅުގަނޑަށް ގަބޫލުކުރެވޭ ގޮތުގައި، އެ ތިން ބޭފުޅަކު އެ ގޮތަށް އެ ނަންގަވައިގެން އެ އުޅުއްވާ ސްޓޭންޑަކީ އެއްގޮތަކަށްވެސް ގަބޫލެއް ނުކުރެވޭ އެއީ ނަންގަވަންޖެހޭ ސްޓޭންޑެއްް ކަމަކަށް. އެ ބޭފުޅުންނަށް އެ ހުންނެވެނީ އެހާ ނިޔުޓްރަލް ގޮތެއްގައި ކަންކަން ނުގެންދެވޭ އެބޭފުޅުންގެ އަމަލުތައް ހުންނަ ގޮތުން."

"އަޅުގަނޑު ވަކިވެއްޖެއްޔާ، އަޅުގަނޑު އިސްތިއުފާ ދީފިއްޔާ އިންތިހާބަށް ވަރަށް ބޮޑެތި ގެއްލުންތައް އަންނާނެ، އުނިކަންތައް އަންނާނެ، އަދި އިންތިހާބުގައި ބައިވެރިވާ ކެންޑިޑޭޓުންނާއި، ސިޔާސީ ޕާޓީތަކަށް އުނިކަމެއް ލިބިގެން އަންނާނެ."

ފުއާދު ތައުފީގު

ފުއާދު އިސްތިއުފާ ދެއްވައިފި ނަމަ އިންތިހާބަށާއި ސިޔާސީ ޕާޓީ ތަކަށް ގެއްލުން ތަކެއް ވާނެ ކަމުގެ ހެއްކެއްގެ ގޮތުގައި އޭނާ ދެއްކެވީ ސިޔާސީ ޕާޓީ ތަކާއި އެކު ބޭއްވޭ ބައްދަލުވުން ތަކުގައި އޭނާ ފިޔަވައި އެހެން ގިނަ މެންބަރުން ބައިވެރި ނުވުމެވެ. އޭނާ ވިދާޅުވީ ސަރުކާރު ހިންގާ ޕާޓީ ނަމަވެސް އިދިކޮޅުު ޕާޓީ ނަމަވެސް، އީސީ އާއި ބައްދަލު ކުރަން ބޭނުން ނަމަ އެ ފުރުސަތު ލިބެން ވާނެ ކަމަށެވެ. އަދި 'ސެލެކްޓިވް' ވެގެން އިލެކްޝަންސް ކޮމިޝަން ނުހިންގޭނެ ކަމަށްވެސް އޭނާ ވިދާޅުވި އެވެ.

ފުއާދު އިތުރަށް ވިދާޅުވީ ރިޔާސީ އިންތިހާބު ނިމުމަށްފަހު އޭނާ މަގާމުން ވަކި ކުރި ނަމަވެސް މާ ބޮޑު ގެއްލުމެއް ނުވާނެ ކަމަށާ، އެހެން ނަމަވެސް މިފަދަ ދަނޑިވަޅެއްގައި އޭނާ އިސްތިއުފާ ދެއްވައިފިނަމަ ވަރަށް ބޮޑު އުނިކަމެއް އަންނާނެ ކަމަށެވެ.

މިމަހު 18 ވަނަ ދުވަހު ބޭއްވި، ކޮމިޝަންގެ 794 ވަނަ ޢާންމު ޖަލްސާގައި ފުއާދުގެ އިތުބާރު ނެތްކަމުގެ ވޯޓެއް ނަގާފައިވާއިރު، އެ ވޯޓުން، ފުއާދު އާ މެދު 3 މެންބަރެއްގެ އިތުބާރު ނެތްކަމަށް، ޖަލްސާގެ އަގުލަބިއްޔަތުން ވަނީ ފާސްކޮށްފައެވެ.

އެހެން ނަމަވެސް ކޮމިޝަނުގެ ގާނޫނުގެ 10 ވަނަ މާއްދާގެ ށ. ގައި ބުނެފައި އޮންނަނީ "ކޮމިޝަނުގެ ރައީސްގެ މަގާމު ނުވަތަ ނައިބު ރައީސްގެ މަގާމު ހުސްވެއްޖެ ކަމަށް ބެލޭނީ، ކޮމިޝަނުގެ މެމްބަރުކަމުގެ މަގާމު ހުސްވެއްޖެ ކަމަށް ބެލެވޭ ހާލަތެއް ކުރިމަތިވުމުން" ނުވަތަ "ރައީސާއި ނައިބު ރައީސް އާއި ދެމީހުންކުރެ މީހަކު އެމީހެއްގެ މަގާމުން އިސްތިއުފާދިނުމުން" ކަމަށެވެ.

މި އިންޓަވިއު މިރޭ 8:30 ގައި ވޮއިސް ފޭސްބުކް އަދި ޔޫޓިއުބް އިން ގެނެސްދެވޭނެއެެވެ.