އާރްޑީސީގެ އެމްޑީގެ މަގާމުން ނަޒީމް ވަކިކޮށްފި

‏ރޯޑް ޑިވެލޮޕްމަންޓް ކޯޕަރޭޝަންގެ މެނޭޖިންގ ޑިރެކްޓަރުގެ މަޤާމުންނާއި، ޑިރެކްޓަރުންގެ ބޯޑުން، އިބްރާޙިމް ނަޒީމް ވަކިކޮށްފިއެވެ.

ޕީސީބީން ބުނީ އެ މަގާމުމް ނަޒީމް ވަކިކޮށް އެކްޓިންގ މެނޭޖިންގ ޑިރެކްޓަރުގެ މަޤާމަށް އެމްޓީސީސީގެ މެނޭޖިން ޑިރެކްޓަރު އަޙުމަދު ސަޢުދީ އިއްޔެއިން ފެށިގެން އައްޔަނުކޮށްފައިވާ ކަމަށެވެ.

ހައުސިން މިނިސްޓްރީގެ ސްޓޭޓް މިނިސްޓަރު ކަމުގައި ހުންނަވަނިކޮށް އިބްރާހީމް ނަޒީމް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ގެ މެނޭޖިން ޑިރެކްޓަރު ކަމަށް އައްޔަނު ކުރެއްވީ ޖުލައި މަހުގެ ފަހުކޮޅުގައެވެ.

އާރްޑީސީގެ މެނޭޖިން ޑިރެކްޓަރު ކަމުން ނަޒީމް ވަކިކުރިއިރު، ސަރުކާރު ހިންގުމުގެ ޚަރަދު ކުޑަކުރުމުގެ ސިޔާސަތުގެ ދަށުން ފެނަކަ ކޯޕަރޭޝަން ލިމިޓެޑާއި، އާރްޑީސީ އެހެން ކުންފުނިތަކާ އެއްކޮށްލުމަށް ފަހު އެ ދެ ކުންފުނިވެސް އުވާލަން ސަރުކާރުން ވަނީ ނިންމާފައެވެ.

އެގޮތުން، ސްޓެލްކޯއާ އެއްކޮށްލަން ނިންމާފައިވާ ފެނަކަގެ މެނޭޖިން ޑިރެކްޓަރު މުޙައްމަދު އަފީފު ވެސް އިއްޔެ ވަނީ އެ މަގާމުން ވަކިކޮށްފައެވެ.