ރައީސް ޑރ މުއިއްޒުގެ ސިޔާސަތުތައް ތަންފީޛުކުރުމުގައި ސާބިތުވެ ތިބޭނަން: މިނިސްޓަރ ޒަމީރު
ކުރިއަށް އޮތް 5 އަހަރަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒުުގެ ސިޔާސަތުތައް ތަންފީޒުކުރުމުގައި ސާބިތުވެ ތިއްބަވާނެކަމުގައި ޚާރިޖީ ވަޒީރު މޫސާ ޒަމީރު ވިދާޅުވެއްޖެއެވެ.
ޕީޕީއެމްގެ ލީޑަރ އަދި ކުރީގެ ރައީސް ޔާމީނު އެ ޕާޓީން ވަކިވެވަޑައިގެން އައު ސިޔާސީ ޕާޓީއެއް އުފެއްދެވުމުގެ މަސައްކަތް ކުރައްވަމުން ގެންދަވާކަން އިއުލާނުކުރައްވައި އެކަމުގެ މަސައްކަތްތައް ކުރިއަށްދާ މި ދަނޑިވަޅުގައި ޚާރިޖީ ވަޒީރު މޫސާ ޒަމީރު ކުރެއްވި ޓުވީޓެއްގައި ބުނެފައިވަނީ، ކުރިއަށް އޮތް 5 އަހަރަށް ދިވެހި ރައްޔިތުން ނިންމާފައިވާ ނިންމުމާ އެއްގޮތަށް، ޕީޕީއެމް-ޕީއެންސީގެ ސަރުކާރެއް އެކުލަވާލައި ރައްޔިތުންނަށް ޚިދުމަތްކުރަން ފެށިފައިވާއިރު، އެ ބޭފުޅުން ތިއްބެވީ، ރައީސުލްޖުމްހޫރިއްޔާ ޑރ މުހައްމަދު މުއިއްޒުއާއެކުއެވެ.
ޕީޕީއެމް-ޕީއެންސީއާ އެކު އިޚްލާސްތެރިކަމާ އެކު ކުރިއަށްގޮސް، ރައީސުލްޖުމްހޫރިއްޔާ ޑރ. މުއިއްޒު ރައްޔިތުންނަށް ހުށައަޅުއްވާފައިވާ ސިޔާސަތުތައް ތަންފީޛްކުރުމުގައި އަޅުގަނޑުމެންގެ ބަދަހި ސަފުތައް ސާބިތުވެ ދެމިތިބޭނަން.
މިނިސްޓަރ މޫސާ ޒަމީރު
މީގެ އިތުރުން މިނިސްޓަރ ގެ ޓުވީޓުގައި ބުނެފައިވަނީ ދިވެހި ޤައުމަށާއި ރައްޔިތުންނަށް އުފާ ފާގަތިކަން ލިބެން އޮތް މަގަކީ ޑރ މުއިއްޒުއާއެކު ސާބިތުކަމާއެކު ތިބުން ކަމަށާއި ޤައުމާއި ރައްޔިތުންގެ އުންމީދުތައް އެހެން އެއްވެސް ބަޔަކާއި އެއްޗަކާއި ކަމަކަށް ވުރެ ބޮޑު ކަމުގައެވެ.
ޕީޕީއެމްއާއި ވަކިވެ ވަޑައިގެން ވަކިން ޕާޓީއެއް އުފައްދަވާކަން ހާމަކޮށްފައިވާއިރު ޕީޕީއެމްއަށް ނިސްބަތްވެ ވަޑައިގަންނަވާ އެކި ވުޒާރާތަކުގެ ވަޒީރުންނާއި އެހެނިހެން އިސްވެރިން އަންނަނީ ރައީސް ޑރ މުއިއްޒުއާއެކު ތިއްބެވިކަން ހާމަކުރައްވަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
