މިވެރިކަން ކާމިޔާބު ވެރިކަމަކަށް ހެދުމަށް ދެމިހުންނާނަށް: މުޙައްމަދު ހުސެއިން ޝަރީފް

ރައީސް ޑރ މުޙައްމަދު މުޢިއްޒުގެ ވެރިކަން ކާމިޔާބު ވެރިކަމަކަށް ހެދުމަށް ދެމިހުންނަވާނެ ކަމަށް މިނިސްޓްރީ އޮފް ފޮރިން އެފެއާޒްގެ އެމްބެސެޑަރ އެޓް ލާރޖް މުޙައްމަދު ހުސެއިން ޝަރީފް (މުންދު) ވިދާޅުވެއްޖެއެވެ.

މުންދު މިހެން ވިދާޅުވީ އޭނާ ކުރެއްވެވި ޓްވީޓެއްގައެވެ.

މުންދުގެ ޓްވީޓުގައި ވިދާޅުވެފައިވަނީ ޕީ.ޕީ.އެމް/ޕީ.އެން.ސީ ގެ ހިތްވަރުގަދަ މެންބަރުން 5 އަހަރު ކުރި ބުރަ މަސައްކަތުން އެމް.ޑީ.ޕީ ވެރިކަމުން ދުރުކޮށް، ރައްޔިތުންގެ ބޮޑު އިތުބާރަކާއެކު، ޤައުމު ހިންގުން ރައީސް ޑރ. މުޢިއްޒާއި ޙަވާލުކުރުމުން، އެމަނިކުފާނުގެ ވެރިކަން ކާމިޔާބުކަރުމުގައިވެސް ދެމިތިބޭނީ ހަމަ އެބޭފުޅުން ކަމަށް މުންދު ވިދާޅުވެފައިވެއެވެ.

ޕީޕީއެމް/ޕީއެންސީ ކޯލިޝަންގެ އިސް ގިނަ ބޭފުޅުންތަކެއްގެ މިފަދަ ޓްވީޓްތަކެއް މިއަދާއި ރޭ ޓްވިޓާއިން ދަނީ ފެންނަމުންނެވެ.

މިފަދަ ޓްވީޓްތަކެއް އެބޭފުޅުންގެ ޓްވިޓަަރ ހެނޑްލް ތަކުން ފެންނަމުން މިދަނީ ޕީޕީއެމް/ޕީއެންސީގެ އިސް ބޭފުޅުންގެ ތެރޭގައި ބޮޑެތި ޚިޔާލު ތަފާތުވުން ތަކެއް އުފެދި ޕީޕީއެމްގެ ރައީސް އަދި ރާއްޖޭގެ ކުރީގެ ރައީސް ޢަބްދުﷲ ޔާމިން ޢަބްދުލް ޤައްޔޫމް ޕީޕީއެމް އިން ވަކިވެ ވަޑައިގެން އައު ޕާޓީއެއް އުފެއްދެވުމުގެ މަސައްކަތް ފައްޓަވައިފައިވާ ދަނޑިވަޅެއްގައެވެ.