ތަފާތު ޚާރިޖީ ސިޔާސަތަކަށް ތަބާވިޔަސް،އިންޑިއާއާ އޮންނަ ގުޅުމަށް ބަދަލު އަތުވެގެންނުވާނެ:ނަޝީދު
އާ ސަރުކާރުން ތަފާތު ޚާރިޖީ ސިޔާސަތަކަށް ތަބާވި ނަމަވެސް އެކަމުގެ ސަބަބުން ދިވެހި ރާއްޖެއާއި އިންޑިއާއާ ދެމެދު އޮންނަ ގުޅުމަށް ބަދަލެއް އަތުވެގެން ނުވާނެ ކަމަށް ރައްޔިތުންގެ މަޖިލީހުގެ ކުރީގެ ރައީސް މައްޗަންގޯޅި އުތުރު ދާއިރާގެ މެމްބަރު މުހައްމަދު ނަޝީދު ވިދާޅުވެއްޖެއެވެ.
ނަޝީދު މިފަދައިން ވިދާޅުވީ އިންޑިއާގެ ނިއު ދިއްލީގެ ނިއުސް އެޖެންސީއެއް ކަމުގައިވާ 'އަނި' އަށް ދިން ބަސްދީގަތުމެއްގައެވެ.
"އަޅުގަނޑަށް އެނގޭ ރާއްޖޭގައި ތިބި އިންޑިއާ ސިފައިން ފޮނުވާލުމަށް ކޮންމެވެސް ވަރަކަށް ވާހަކަ ދެއްކިކަން، އެކަމަކު މިއީ ރާއްޖޭގެ ރައްޔިތުންނަށް ފައިދާ ކުރާނެ މަގެއް ކަމަކަށް ނުދެކެން"
ނަޝީދު ވިދާޅުވިއެވެ.
މީގެ އިތުރުންވެސް ނަޝީދުގެ ބަސްދީގަތުމުގައި ވިދާޅުވީ، މި މައްސަލައާއި ބެހޭގޮތުން އޭނާ ރައްޔިތުންގެ މަޖިލީހުގައި ވާހަކަ ދެއްކިކަމަށާއި، މުސްތަޤްބަލްގައި އޮތީ ދިވެހި ރާއްޖެއާއި އިންޑިއާއި ދެމެދު ދުވަހެއް ދުވަހަކަށް ވަރުގަދަ ވަމުން ދާނެ ގުޅުމެއް ކަމަށް ދެކިލައްވާކަމަށެވެ. އަދި އިންޑިއާ އާއި ގުޅުން ހީނަރު ވެއްޖެ ނަމަ އެކަމުގައި ދިވެހި ރާއްޖެއަށް ކުރިމަތި ވެގެން ދާނެ އުދަގޫތައް އާ ސަރުކާރަށް އަދި ވިސްނޭނެ ކަމަށްވެސް ނަޝީދު ވިދާޅުވިއެވެ.
ނަޝީދު ދަނީ އިންޑިއާ ދިފާއުކޮށް ވާހަކަފުޅު ދައްކަވަމުންކަން ފާހަގަ ކޮށްލަން ޖެހެއެވެ. މިގޮތުން ރައްޔިތުންގެ މަޖިލީހުގެ މިއަހަރުގެ ތިންވަނަ ދައުރުގެ 24 ވަނަ ޖަލްސާއަށް، އަންނަ އަހަރަށް ލަފާކޮށް ހުށައެޅި ދައުލަތުގެ ބަޖެޓަށް އަލިއަޅުވާލާ ދެއްކެވި ވާހަކަފުޅުގައިވެސް ބަޖެޓު މުޅިންހެން ބިނާވަނީ ބޭރު ގައުމުތަކުން ރާއްޖެއަށް ލިބެން އޮތް ފަންޑަށް ކަމަށާއި އެހެންކަމުން އިންޑިއާއަށް ބަދު ބަސް ބުނުމަކީ ކޮށްގެންވާނެ ކަމެއް ނޫން ކަމަށް ވެސް ވަނީ ވިދާޅުވެފައެވެ.
އަދި އިންޑިއާ އާއި އިދިކޮޅަށް ދިވެހިން ކަންކަން ކުރުމަކީ ދިވެހިންނަށް ރަނގަޅު ގޮތަކަށް ނުވާނެ ކަމަށްވެސް ދާދި ފަހުން އެބޭފުޅާ ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
