ޔުއެފާ ނޭޝަންސް ލީގް؛ ކްރޮއޭޝިއާ އަތުން ސްޕެއިންއަށް ފަސޭހަ މޮޅެއް

ޔުއެފާ ނެޝަންސް ލީގްގައި ރޭ ދުނިޔޭގެ ޗެމްޕިއަން ސްޕެއިން އާއި ކްރޮއޭޝިއާ ބައްދަލުކުރި މެޗް ފަސޭހަކަމާއެކު ސްޕެއިން ކާމިޔާބުކޮށްފިއެވެ.

ސެވިއްޔާގެ ދަނޑުގައި ކުޅުނު މިމެޗް ސްޕެއިން ކާމިޔާބުކުރީ 4-1 ގެ ނަތީޖާއިންނެވެ. މެޗްގައި ސްޕެއިންނަށް ގޯލް ހުޅުވާލަދިނީ މެޗް ފަށައިގެން ދެވަނަ މިނެޓް ތެރޭގައި ޔަމާލް އެވެ. އޭނާ މި ލަނޑު ޖެހީ އޭރިއާގެ ބޭރުން ފޮނުވާލި ހިތްގައިމު ހަމަލާއަކުންނެވެ. ސްޕެއިނުން ލީޑް ނަގާފައިވަނިކޮށް، މެޗުގެ 28 ވަނަ މިނެޓުގައި ކްރޮއޭޝިއާގެ ދިއޮން ބެލްޖޯ ވަނީ ބޮލުން ލަނޑެއް ޖަހައި ނަތީޖާ ހަމަހަމަކޮށްފައެވެ. ނަމަވެސް ކްރޮއޭޝިއާއިން މެޗް އެއްވަރުކުރިތާ ކުޑަވަގުތުކޮޅެއްގެ ތެރޭގައި ސްޕެއިންގެ މާކް ޕުބިލް ވަނީ ލަނޑެއް ޖަހައި ދެވަނަ ފަހަރަށް ލީޑް ނަގައިދީފައެވެ. މިއީ ޔަމާލް ތަނަވަސްކޮށްދިން ފުރުސަތެއްގައި ޖެހި ލަނޑެކެވެ.

ދެވަނަ ހާފް ކުޅުން ފަށައިގެން ސްޕެއިނުން މެޗް ކޮންޓްރޯލްކޮށްގެން ކުޅެމުންދިޔައިރު، ޔަމާލް ވަނީ މިމެޗްގައި އެނާގެ ދެވަނަ ލަނޑު 63 ވަނަ މިނެޓްގައި ކާމިޔާބުކޮށްފައެވެ. ސްޕެއިންގެ ފަހު ލަނޑު ޖަހައިދިނީ މެރީނޯ ތަނަވަސްކޮށްދިން ފުރުސަތެއްގައި ވިލިއަމްސް އެވެ.

މެޗްގެ މޮޅު ކުޅުންތެރިޔާގެ މަގާމް ދެ ލަނޑު ޖެހި ޔަމާލް ހޯދިއިރު، މިމެޗުން ލިބުނު މޮޅާއެކު ސްޕެއިން ވަނީ ތާވަލްގެ އެއްވަނާގައި ތިން ޕޮއިންޓްގެ ލީޑެއް ނަގާފައެވެ.