ރައީސް ޔާމިނަށް އިންސާފުވެރި ޝަރީއަތެއް ހޯދައިދޭން ކުރެވެން އޮތްހާ ކަމެއް ކުރާނަން: ދަ ޑިމޮކްރެޓްސް

ޕީޕީއެމްގެ ރިޔާސީ ކެންޑިޑޭޓު އަދި ވާދަވެރި ސިޔާސީ ލީޑަރު ރައީސް އަބްދުالله ޔާމީން އަބްދުލްގައްޔޫމަށް އިންސާފުވެރި ޝަރީއަތެއް ހޯދައިދިނުމަށް ކުރެވެން ހުރި ހުރިހާ މަސައްކަތްތަކެއް ކުރާނެކަމަށް "ދި ޑިމޮކްރެޓްސް" އިން ބުނެފި އެވެ.

ކުރިއަށް އޮތް ރިޔާސީ އިންތިޚާބުން މި ސަރުކާރު ބަދަލުކުރުމަށް ދި ޑިމޮކްރެޓްސް އާއި ޕީޕީއެމް ގުޅިގެން މަސައްކަތް ކުރަން ފަށާފައިވާއިރު، ޕީޕީއެމްގެ ރިޔާސީ ކެންޑިޑޭޓު ރައީސް ޔާމީން މިވަގުތު ގެންދަވަނީ އެމަނިކުފާނުގެ މައްޗަށް މިދިޔަ ޑިސެމްބަރު މަހު ކްރިމިނަލް ކޯޓުން ކުރި 11 އަހަރުގެ ޖަލު ހުކުމެއް ތަންފީޒު ކުރައްވަމުން ނެވެ.

ދި ޑިމޮކްރެޓްސްއާއި ޕީޕީއެމް ގުޅިގެން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ޕީޕީއެމްގެ ރިޔާސީ ކެންޑިޑޭޓަކީ ރައީސް ޔާމީންކަމަށް އެ ޕާޓީން ޔަގީންކަމާއެކު ބުނަމުން އަންނައިރު، މިހާރު އެމަނިކުފާނު ޖަލުހައި އެ ހުންނަވަނީ ނުހައްގުންކަމަށް ދި ޑިމޮކްރެޓްސްއިން ޤަބޫލުކުރަން ތޯ އަހާފަ އެވެ. އަދި އެމަނިކުފާނު މިނިވަންކުރުމަށް ޕީޕީއެމް-ޕީއެންސީ ކޯލިޝަނުން ކުރާ މަސައްކަތްތަކުގައި ބައިވެރިވާނެތޯ ސުވާލުކޮށްފަ އެވެ.

އެ ސުވާލަށް ޖަވާބުދެއްވަމުން ދި ޑިމޮކްރެޓްސްގެ ފަރާތުން ބައިވެރިވެ ވަޑައިގެންނެވި މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވީ އެމްއެމްޕީއާރުސީގެ ޚިޔާނާތުގައި ޝާމިލުވިކަމަށް ތުހުމަތުކުރެވޭ އެތައް ބައެއްގެ ތެރެއިން ހަމައެކަނި ރައީސް ޔާމިނުގެ މައްޗަށް ދައުވާ ކުރުމަކީ އިންސާފު ހޯދުމަށް ކުރާ ކަމެއްކަމަށް ޤަބޫލު ނުކުރައްވާ ކަމަށެވެ.

ރައީސް ޔާމިނުގެ މައްޗަށް އެކަނި ދައުވާ ކުރުމަކީ "ސެލެކްޓިވް ޕްރޮސެކިއުޝަން" ކަމަށާއި، އެއީ ދި ޑިމޮކްރެޓްސް އިން ވަރަށް ބޮޑަށް ކަންބޮޑުވާަމެއް ކަމަށް އާޒިމް ވިދާޅުވި އެވެ.

އެއާއެކު އޭނާ ވިދާޅުވީ ރައީސް ޔާމިނަށް އިންސާފުވެރި ޝަރީއަތެއް ހޯދައިދިނުމަށް އެ ޕާޓީއަށް ކުރެވެން ހުރި ހުރިހާ މަސައްކަތްތަކެއް ކުރާނެކަމުގެ ޔަގީންކަން ދެއްވާ ކަމަށެވެ.

"އިންސާފުވެރި ޝަރީއަތެއް މިހާރުވެސް ޔާމިނަށް ހޯދައިދޭން އެބަ ޖެހޭ.. އިންސާފުވެރި ޝަރީއަތެއް އިރާދަކުރެއްވިއްޔާ ޔާމިނަށް ހޯދައިދޭން ހުރި މަސައްކަތްތައް އަޅުގަނޑުމެން ކުރާނަން"

މެމްބަރު އަލީ އާޒިމް

ރައީސް ޔާމިނަކީ ޕީޕީއެމްގެ ރިޔާސީ ކެންޑިޑޭޓު ކަމަށާއި، އެމަނިކުފާނާއި ނުލާ މި އަހަރުގެ ރިޔާސީ އިންތިޚާބު ނުބޭއްވޭނެކަމަށް އިދިކޮޅުން ދަނީ ބުނަމުންނެވެ.

އެމަނިކުފާނުގެ މައްޗަށް ވ. އާރަށުގެ މުއާމަލާތާއި ގުޅުވާ އިއްވާފައިވާ ހުކުމް ހައިކޯޓުގައި އިސްތިއުނާފުކޮށްފައިވާއިރު، ހައިކޯޓުން އެމަނިކުފާނު މިނިވަންވެ ވަޑައިގަންނަވާނެ ކަމުގެ ޔަގީންކަން ވެސް އޮތްކަމަށް އިދިކޮޅުން ދަނީ ބުނަމުންނެވެ.

ސަރުކާރު ބަލިކުރުމަށް ޕީޕީއެމްއާއި ދި ޑިމޮކްރެޓްސް މަސައްކަތް ފަށާފައިވާއިރު، ރައީސް ޔާމިނުގެ ކެމްޕޭނު ޓީމުން ވެސް ގެންދަނީ އެމަނިކުފާނުގެ ކެމްޕޭނު ފެށުމުގެ މަސައްކަތް ކުރަމުންނެވެ.

އެގޮތުން އީދު ބަންދަށް ފަހު ރަސްމީކޮށް ކެމްޕޭނު ފަށާ، ރައީސް ޔާމިނުގެ 2023 ވަނަ އަހަރުގެ ރިޔާސީ މެނިފެސްޓޯ އިއުލާނުކުރައްވާނެކަމަށް ކެމްޕޭނު މެނޭޖަރު ވަނީ ވިދާޅުވެފަ އެވެ.