ސޯސަން ފުޓްސަލް ކަޕް 2025 ގެ ޗެންޕިއަންކަން ކާންޓް ޕްލޭ ހޯދައިފި

މިހާރު ކުރިއަށްދާ "ރިލެކްސް ކަމަނަ ސޯސަން ފުޓްސަލް ކަޕް 2025" ގެ ފައިނަލުގައި ވާދަވެރި ކުޅުމަކަށްފަހު 1-0 ގެ ނަތީޖާއަކުން ޔަންގް ސްޓަރސް ބަލިކޮށް ކާންޓް ޕްލޭ އިން މުބާރާތުގެ ޗެންޕިއަންކަން ހޯދައިފިއެވެ.

މުބާރާތުގެ ފައިނަލުން ކާންޓް ޕްލޭ ޖާގަ ހޯދީ ސެމީފައިނަލް ދެވަނަ މެޗުގައި އެންމެ ފަހުގެ ޗެންޕިއަން ހެލޯ ބޭބީ 2-1 ގެ ނަތީޖާއަކުން ބަލިކުރުމަށްފަހު އެވެ. އަދި ޔަންގް ސްޓަރސް ފައިނަލުން ޖާގަ ހޯދީ ސެމީފައިނަލުގެ ފުރަތަމަ މެޗުގައި ފަސޭހަކަމާއެކު 4-0 ގެ ނަތީޖާއަކުން އެފްސީ އަމިގޯސް ބަލިކުރުމަށްފަހު އެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިހާފުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބުނުކުރެވި 0-0 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފުހައި ވެސް ދެޓީމުގެ ފަރާތުން ފޯރިގަދަ ކުޅުމެއް ފެނިގެންދިޔައިރު، ދެވަނަ ހާފުގެ ވަރަށް ކުރީކޮޅު ކާންޓް ޕްލޭ އިން ވަނީ ލަނޑެއް ކާމިޔާބުކޮށް މެޗުގެ ލީޑުހޯދާފއެވެ. މިލަނޑު ދެވަނަ ހާފު ފެށިގެން ދެވަނަ މިނެޓުގައި އެޓީމަށް ކާމިޔާބުކޮށްދިނީ މެޗުގެ މޮޅު ކުޅުންތެރިއާގެ މަގާމު ހޯދި އަލީ މީސާގު އީސާ އެވެ.

މީގެ އިތުރުން ވެސް މިހާފުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން ކާންޓް ޕްލޭ ކުރީގައި އޮވެގެންނެވެ.

މި މުބާރާތުގެ އެންމެ މޮޅު ފަސް ކުޅުންތެރިންނަކީ އަލީ ޝަމާލް އަބްދުﷲ (ކާންޓް ޕްލޭ)، އަލީ ހުމޭޒް (ކާންޓް ޕްލޭ)، އަލީ މީސާގު އީސާ (ކާންޓް ޕްލޭ)، ޝަނާން ރަޝަދު (ޔަންގް ސްޓަރސް) އަދި ފައްޔާޒު ފަޔާޒު (ޔަންގް ސްޓަރސް) އެވެ.

މުބާރާތުގެ ފެއާޕްލޭ ޓީމަކީ އެފްސީ އަމިގޯސް އެވެ. އަދި އެންމެ އުންމީދީ ކުޅުނުްތެރިއަކީ އަހުމަދު އަފްލާޒް (އެފްސީ އަމިގޯސް) އެވެ. އެންމެ މޮޅު ކޯޗަކީ ކާންޓް ޕްލޭ ޓީމުގެ ކޯޗު މޫސާ އާޒިމް އެވެ.

މީގެ އިތުރުން މުބާރާތުގެ އެންމެ ގިނަ ލަނޑު ޖެހި ކުޅުންތެރިއަކަށް ހޮވުނީ އަހުނަފް ރަޝީދު (ހެލޯ ބޭބީ) އެވެ. އޭނާ ވަނީ މިމުބާރާތުގައި ޖުމްލަ 13 ލަނޑު ކާމިޔާބުކޮށްފައެވެ. އަދި މިމުބާރާތުގެ އެންމެ މޮޅު ކުޅުންތެރިއާ (ކިންގް އޮފް ދަ ޓޯނަމެންޓް) އަކީ ޝަނާން ރަޝަދު (ޔަންގް ސްޓަރސް) އެވެ.

30 މާރިޗު 2025 އިން 5 އެޕްރީލް 2025 ގެ ނިޔަލަށް ކުރިއަށް ގެންދާ މިމުބާރާތުގެ ޗެންޕިއަން ޓީމަށް 50،000 އަދި ރަނަރަޕް ޓީމަށް 15،000 ރުފިޔާގެ ފައިސާގެ އިނާމެއް ހުށަހަޅާފައިވާއިރު، މިއަހަރު މުބާރާތުގައި ޖުމްލަ 10 ޓީމަކުން ވަނީ ވާދަކޮށްފައެވެ.

މީގެ އިތުރުން މި މުބާރާތުގެ މެއިން ސްޕޮންސަރ އަކަށް "ރިލެކްސް ކަމަނަ" ފެރީ ސާރވިސް ހަމަޖައްސާފައިވާއިރު، މުބާރާތުގެ ކޯ ސްޕޮންސަރއަކީ ތޮއްޑޫ ކައުންސިލް އެވެ. އަދި މުބާރާތުގެ އޮފިޝަލް މީޑިއާ ޕާޓްނަރަކަށް ހަމަޖައްސާފައި ވަނީ ވޮއިސް ސްޕޯޓްސް އެވެ.